സൗദിയിലെ അത്ഭുതദ്വീപിൽ ക്രിസ്റ്റ്യാനോയ്ക്ക് അത്യാഡംബര വില്ല; യാത്ര ബോട്ടിലോ സീപ്ലെയിനിലോ മാത്രം

ജിദ്ദ: ഫുട്‌ബോൾ ഇതിഹാസം ക്രിസ്റ്റ്യാനോ റൊണാൾഡോയും കുടുംബവും സൗദി അറേബ്യയിലെ ചെങ്കടൽ തീരത്ത് (Red Sea) സ്ഥിതി ചെയ്യുന്ന അത്യാധുനിക റിസോർട്ടിൽ രണ്ട് ആഡംബര വില്ലകൾ സ്വന്തമാക്കി. റെഡ് സീയിലെ ഉമ്മഹത് ദ്വീപുകളിലുള്ള (Ummahat Islands) പ്രശസ്തമായ ‘നുജുമ റിറ്റ്‌സ് കാൾട്ടൺ റിസർവി’ലാണ് (Nujuma, a Ritz-Carlton Reserve) റൊണാൾഡോ നിക്ഷേപം നടത്തിയിരിക്കുന്നത്.

യാത്ര ബോട്ടിലോ വിമാനത്തിലോ മാത്രം

പ്രധാന കരയിൽ നിന്ന് 26 കിലോമീറ്റർ അകലെ കടലിലാണ് ഈ വില്ലകൾ സ്ഥിതി ചെയ്യുന്നത്. ഇവിടേക്ക് എത്തിച്ചേരാൻ റോഡ് മാർഗ്ഗങ്ങളില്ല. പ്രത്യേക ചാർട്ടേഡ് ബോട്ടുകളിലോ സീപ്ലെയിനുകളിലോ (Seaplane) മാത്രമേ ഇവിടേക്ക് പ്രവേശനമുള്ളൂ എന്നത് ഈ ലൊക്കേഷന്റെ സ്വകാര്യതയും സുരക്ഷയും വർദ്ധിപ്പിക്കുന്നു.

കുടുംബത്തിനായി അഞ്ച് ബെഡ്‌റൂമുകൾ

പങ്കാളി ജോർജിന റോഡ്രിഗസിനും മക്കൾക്കും ഒപ്പം അവധിക്കാലം ആഘോഷിക്കാനായി രണ്ട് വില്ലകളാണ് താരം വാങ്ങിയിരിക്കുന്നത്. ഒന്നിൽ മൂന്ന് കിടപ്പുമുറികളും മറ്റൊന്നിൽ രണ്ട് കിടപ്പുമുറികളുമാണുള്ളത്. ഇതോടെ നുജുമ റിസോർട്ടിലെ ആദ്യത്തെ ഉടമകളിൽ ഒരാളായി റൊണാൾഡോ മാറി.

തന്റെ പുതിയ നിക്ഷേപത്തെക്കുറിച്ച് റൊണാൾഡോ പറയുന്നതിങ്ങനെ: “എല്ലാ അർത്ഥത്തിലും അസാധാരണമായ ഒരിടമാണിത്. ആദ്യ സന്ദർശനം മുതൽ ഇവിടുത്തെ പ്രകൃതിഭംഗിയോട് വല്ലാത്തൊരു അടുപ്പം തോന്നി. എനിക്കും കുടുംബത്തിനും ശാന്തമായി സമയം ചെലവഴിക്കാൻ പറ്റിയ ഇടമാണിത്”.

പരിസ്ഥിതി സൗഹൃദ നിർമ്മിതി

വെറുമൊരു ആഡംബരത്തിനപ്പുറം പരിസ്ഥിതി സംരക്ഷണത്തിന് വലിയ പ്രാധാന്യമാണ് ഈ പദ്ധതി നൽകുന്നത്. പൂർണ്ണമായും സൗരോർജ്ജത്തിലാണ് (Solar power) ദ്വീപ് പ്രവർത്തിക്കുന്നത്. 2040-ഓടെ ഈ പ്രദേശത്തെ പവിഴപ്പുറ്റുകളുടെയും കണ്ടൽക്കാടുകളുടെയും വളർച്ച 30 ശതമാനം വർദ്ധിപ്പിക്കാനാണ് റെഡ് സീ ഗ്ലോബൽ ലക്ഷ്യമിടുന്നത്. റൊണാൾഡോയെയും കുടുംബത്തെയും റെഡ് സീ ഗ്ലോബൽ സിഇഒ ജോൺ പഗാനോ സ്വാഗതം ചെയ്തു.

വിനോദസഞ്ചാരികൾക്കായി റെഡ് സീ ഇന്റർനാഷണൽ എയർപോർട്ട് (RSI) ഇപ്പോൾ സജീവമാണ്. ദുബൈ, റിയാദ്, ജിദ്ദ എന്നിവിടങ്ങളിൽ നിന്നും ഇറ്റലിയിലെ മിലാനിൽ നിന്നും ഇവിടേക്ക് നേരിട്ടുള്ള വിമാന സർവീസുകളുണ്ട്. ലോകജനസംഖ്യയുടെ 85 ശതമാനം ആളുകൾക്കും എട്ട് മണിക്കൂർ യാത്ര കൊണ്ട് ഇവിടെ എത്തിച്ചേരാനാകും.