‘മതം പറഞ്ഞ് ഭിന്നിപ്പുണ്ടാക്കാൻ അണിയറയിലിരുന്ന് ചരടുവലി നടക്കുന്നു”-‘ജനം ടി.വി’ വിട്ടതിനു പിന്നാലെ തുറന്നടിച്ച് അനിൽ നമ്പ്യാർ | Anil Nambiar Janam TV Controversy

കൊച്ചി: ‘ജനം ടിവി’യിൽനിന്നുള്ള പടിയിറക്കത്തിന് പിന്നാലെ സ്ഥാപനത്തിന്റെ നേതൃത്വത്തിനെതിരെയും ചാനൽ പ്രഭാരി എ ജയകുമാറിനെതിരെയും അതിരൂക്ഷമായ ആരോപണങ്ങളുമായി മാധ്യമപ്രവർത്തകൻ അനിൽ നമ്പ്യാർ(Anil Nambiar Janam TV Controversy). തന്നെ ചാനലിൽനിന്ന് പുറത്താക്കിയെന്ന തരത്തിൽ ഉയർന്ന പ്രചാരണങ്ങൾ തള്ളിക്കളഞ്ഞ അദ്ദേഹം, രാജിക്കു കാരണവും വ്യക്തമാക്കി. മതം പറഞ്ഞ് ഭിന്നിപ്പുണ്ടാക്കാൻ അണിയറയിൽ നടന്ന നീക്കങ്ങളെ എതിർത്തു. അനന്തമായി നീളുന്ന വിചാരണ നടപടികൾക്കെതിരെയും മനുഷ്യാവകാശ സംരക്ഷണത്തിന് വേണ്ടിയും നിലപാടെടുത്തതിന്റെ പേരിൽ തനിക്കെതിരെ തീവ്രവാദ ചാപ്പകുത്താൻ ബോധപൂർവമായ ശ്രമം നടന്നുവെന്നും അനിൽ നമ്പ്യാർ ആരോപിച്ചു.

‘പടിയിറങ്ങിയത് ആലോചിച്ചുറപ്പിച്ച തീരുമാനം’ | Anil Nambiar Janam TV Controversy

‘ജനം ടിവി’യിൽനിന്നു തന്നെ ചവിട്ടിപ്പുറത്താക്കിയെന്ന തരത്തിലുള്ള പ്രചാരണങ്ങൾ വസ്തുതാവിരുദ്ധമാണെന്ന് അനിൽ നമ്പ്യാർ വ്യക്തമാക്കി. കഴിഞ്ഞ ജൂലൈ 14ന് തന്നെ ചാനൽ മാനേജ്‌മെന്റിന് മുൻപാകെ ഔദ്യോഗികമായി രാജി സമർപ്പിച്ചിരുന്നു. രാജി അംഗീകരിച്ച് റിലീവ് ചെയ്യണമെന്ന് ആവശ്യപ്പെട്ട് തുടർ ഇമെയിലുകൾ നൽകിയെങ്കിലും അനുകൂല പ്രതികരണമുണ്ടായില്ല. ഇതിനിടെ ജോലിയിൽ തിരികെ പ്രവേശിക്കണമെന്ന് മാനേജിങ് ഡയറക്ടർ ഡോ. ചെങ്കൽ എസ് രാജശേഖരൻ നായർ നിരന്തരം ആവശ്യപ്പെടുകയും റിലീവിങ് ലെറ്റർ കൈമാറരുതെന്ന് എച്ച്ആർ വിഭാഗത്തിനും ജനറൽ മാനേജർക്കും കർശന നിർദേശം നൽകുകയും ചെയ്തിരുന്നു.

എന്നാൽ, സ്ഥാപനത്തിലെ അനിശ്ചിതത്വങ്ങൾ തുടർന്ന പശ്ചാത്തലത്തിൽ ആഗസ്ത് 31ന് നേരിട്ട് ഓഫീസിലെത്തി സഹപ്രവർത്തകരോടും മാനേജ്‌മെന്റിനോടും വിടപറഞ്ഞ് സ്വന്തം സാധനസാമഗ്രികളുമായി പടിയിറങ്ങുകയായിരുന്നു. കഴിഞ്ഞ ജൂലൈ 13ന് ഉച്ചവാർത്ത വായിച്ച ശേഷം പിന്നീട് താൻ സ്‌ക്രീനിൽ പ്രത്യക്ഷപ്പെട്ടിട്ടില്ല. രാജി ഔദ്യോഗികമായി അംഗീകരിച്ച ശേഷം ഓഫീസിൽനിന്ന് സൗഹാർദപരമായി മടങ്ങുന്നതിന്റെ ദൃശ്യങ്ങൾ പങ്കുവച്ചതും പുറത്താക്കപ്പെട്ടുവെന്ന കള്ളപ്രചാരണങ്ങൾക്കുള്ള മറുപടിയായാണെന്ന് അദ്ദേഹം കുറിച്ചു.

‘മനുഷ്യാവകാശത്തിന് മതമില്ല’ | Anil Nambiar Janam TV Controversy

നിരോധിത സംഘടനകളായ പിഎഫ്ഐയുടെയും എന്‍ഡിഎഫിന്‍റെയും നേതാവായിരുന്ന ഇ അബൂബക്കറിന്റെ മനുഷ്യാവകാശ വിഷയത്തിൽ നിലപാടെടുത്തതിനെ മുൻനിർത്തി തനിക്കെതിരെ തീവ്രവാദ ബന്ധം ആരോപിക്കാൻ ശ്രമിക്കുകയാണെന്ന് അനിൽ നമ്പ്യാർ കുറ്റപ്പെടുത്തി. വർഷങ്ങളോളം ചാനലിലിരുന്ന് ഇസ്ലാമിക തീവ്രവാദ നിലപാടുകൾക്കെതിരെ സംസാരിച്ചതിന്റെ പേരിൽ താനും തന്റെ കുടുംബവും ക്രൂരമായ സൈബർ ആക്രമണങ്ങൾക്കും ഭീഷണികൾക്കും ഇരയായിട്ടുണ്ട്. ആ സാഹചര്യങ്ങളിലൊന്നും സ്ഥാപനത്തിലെ ഇപ്പോഴത്തെ പ്രഭാരി ഒപ്പമുണ്ടായിരുന്നില്ല.

മതം നോക്കാതെ മനുഷ്യാവകാശത്തിന് വേണ്ടി ഇനിയും നിലകൊള്ളുമെന്നും എഴുതുകയും വാദിക്കുകയും ചെയ്യുമെന്നും അനിൽ നമ്പ്യാർ വ്യക്തമാക്കി. അനന്തമായി നീണ്ടുപോകുന്ന വിചാരണ നടപടികളിൽ പെട്ടുഴലുന്ന വലിയൊരു വിഭാഗം മനുഷ്യർ രാജ്യത്തുണ്ട്. അവരിൽ ഹിന്ദുക്കളും മുസ്ലിംകളും ക്രൈസ്തവരും സിഖുകാരും പാഴ്‌സികളുമെല്ലാമുണ്ട്. ഇന്ത്യൻ നീതിന്യായ വ്യവസ്ഥയുടെ ഇത്തരം അനിശ്ചിതത്വങ്ങൾ ഇല്ലാതാകണമെന്ന് ആഗ്രഹിക്കുന്നത് ഒരിക്കലും വലിയ അപരാധമല്ല. ഇത്തരം വിഷയങ്ങളിൽ മതപരമായ ഭിന്നിപ്പുണ്ടാക്കാൻ അണിയറയിലിരുന്ന് ചിലർ ചരടുവലിക്കുകയും അതിന്റെ പഴി മുഴുവൻ തന്റെ മേൽ കെട്ടിവെയ്ക്കാൻ ശ്രമിക്കുകയും ചെയ്തതിനാലാണ് സ്ഥാപനം വിടാൻ തീരുമാനിച്ചതെന്നും അദ്ദേഹം വ്യക്തമാക്കി.

ആദർശ കാപട്യം തുറന്നുകാട്ടി വിമർശനം | Anil Nambiar Janam TV Controversy

ആദർശാത്മക നിലപാടുകളുടെ പേരിലുള്ള എ ജയകുമാറിന്റെ ഇരട്ടത്താപ്പുകളെയും അനിൽ നമ്പ്യാർ കടുത്ത ഭാഷയിൽ വിമർശിച്ചു. രാജ്യത്തിന്റെ പ്രധാനമന്ത്രിയെ പൊതുവേദിയിലും പാട്ടുകളിലൂടെയും അധിക്ഷേപിച്ച വേടനെ ന്യൂഡൽഹിയിൽ നടന്ന ജനോത്സവത്തിൽ എത്തിക്കാൻ മുൻകൈയെടുത്തത് ഇതേ ജയകുമാറായിരുന്നുവെന്ന് അദ്ദേഹം വെളിപ്പെടുത്തി. വേടന്റെ വിവാഹത്തിന് മുഖ്യ കാർമികത്വം വഹിച്ചതും ഗൃഹപ്രവേശനത്തിന് ഉപഹാരം നൽകിയതും ഇതേ വ്യക്തിയാണ്. അന്ന് സ്ഥാപനത്തിനും പ്രവർത്തകർക്കും എതിരെ സമൂഹമാധ്യമങ്ങളിൽ കടുത്ത രോഷം ഉയർന്നപ്പോൾ, ജനോത്സവത്തിൽ വേടന്റെ പങ്കാളിത്തം ഉണ്ടാവില്ലെന്ന് പരസ്യമായി നിലപാടെടുക്കാൻ താൻ മാത്രമാണ് ധൈര്യം കാട്ടിയതെന്നും അന്ന് ജയകുമാറിന് അതിനുള്ള ആർജവം ഉണ്ടായിരുന്നില്ലെന്നും അനിൽ നമ്പ്യാർ പറഞ്ഞു.

‘മാധ്യമ ധാർമികതയും സ്ഥാപനത്തിലെ ഉപജാപങ്ങളും’ | Anil Nambiar Janam TV Controversy

മാധ്യമപ്രവർത്തന രംഗത്തെ മൂന്ന് പതിറ്റാണ്ടിനിടയിൽ ഒരു രാഷ്ട്രീയ ഇടപെടലുകൾക്കും പണത്തിനും ആനുകൂല്യങ്ങൾക്കും മുന്നിലും നട്ടെല്ല് വളച്ചിട്ടില്ലെന്ന് അനിൽ നമ്പ്യാർ പറഞ്ഞു. അന്യന്റെ മുതലോ അവിഹിത നേട്ടങ്ങളോ ആഗ്രഹിച്ചിട്ടില്ലാത്തതുകൊണ്ടാണ് തലയുയർത്തിപ്പിടിച്ച് മുന്നോട്ടുപോകുന്നത്. മുൻപ് നാഗ്പൂരിൽ സർസംഘ് ചാലകിനു തൊട്ടടുത്ത് സുപ്രധാന ചുമതലകളിൽ ഇരുന്ന ഒരു വ്യക്തി ഇന്ന് ജനം ടിവിയുടെ പ്രഭാരി സ്ഥാനത്തേക്ക് ചുരുങ്ങിപ്പോയത് എന്തുകൊണ്ടാണെന്ന് സ്വയം ആത്മപരിശോധന നടത്തുന്നത് നന്നായിരിക്കും.

മകളുടെ പ്രായമുള്ള സബ് എഡിറ്റർക്ക് അർധരാത്രിയിൽ അശ്ലീല ചുവയുള്ള സന്ദേശങ്ങൾ അയച്ച കേസിൽ പെട്ടിട്ടും ഒരു അച്ചടക്ക നടപടിയും നേരിടാതെ സംരക്ഷിക്കപ്പെട്ടവരും കാലാവധി നീട്ടി വാങ്ങിയവരുമാണ് ഇപ്പോഴത്തെ ഉപജാപക സംഘത്തിലുള്ളത്(Anil Nambiar Janam TV Controversy). തനിക്കെതിരെ അടിസ്ഥാനരഹിതമായ പ്രചാരണങ്ങളുമായി മുന്നോട്ടുപോകാനാണ് ഭാവമെങ്കിൽ കൂടുതൽ കാര്യങ്ങൾ തുറന്നുപറയേണ്ടി വരുമെന്നും അദ്ദേഹം മുന്നറിയിപ്പ് നൽകി. ചാനലിന്റെ എംഡി ഉൾപ്പെടെയുള്ളവർ നേതൃത്വത്തിലുള്ളപ്പോൾ പ്രഭാരിയുടെ ഇത്തരം ജൽപനങ്ങളെ അവജ്ഞയോടെ തള്ളിക്കളയുന്നുവെന്നും, സ്ഥാപനം നിലനിൽക്കണമെങ്കിൽ ഇത്തരം പ്രവണതകളെ ഒഴിവാക്കണമെന്നും അനിൽ നമ്പ്യാർ ഫേസ്ബുക്ക് പോസ്റ്റിൽ വ്യക്തമാക്കി.