മഹാരാഷ്ട്രയില് വന് സര്പ്രൈസ് നീക്കം; ബിജെപി-എഐഎംഐഎം സഖ്യം, ബിജെപിയും ഉവൈസിയുടെ എഐഎംഐഎമ്മും കൈകോര്ക്കുന്നു
മുംബൈ: മഹാരാഷ്ട്രയില് അപൂര്വ രാഷ്ട്രീയ സഖ്യത്തിന് നീക്കം. അകോല ജില്ലയിലെ അകോട്ട് നഗരസഭയില് ബിജെപിയും അസദുദ്ദീന് ഉവൈസിയുടെ എഐഎംഐഎമ്മും തമ്മില് രൂപപ്പെട്ട പ്രാദേശിക സഖ്യം മഹാരാഷ്ട്ര രാഷ്ട്രീയത്തില് വന് വിവാദത്തിന് തിരിതെളിച്ചിരിക്കുകയാണ്. കോണ്ഗ്രസിനെ മാറ്റിനിര്ത്തി നഗരസഭാ ഭരണം പിടിക്കാന് വേണ്ടിയാണ് ഇരുപാര്ട്ടികളുടെയും പ്രാദേശിക ഘടകങ്ങള് ‘അകോട്ട് വികാസ് മഞ്ച്’ എന്ന പേരില് രൂപീകരിച്ച സഖ്യത്തിലൂടെ ഒന്നിച്ചിരിക്കുന്നത്.
35 അംഗങ്ങളുള്ള അകോട്ട് നഗരസഭയില് കേവല ഭൂരിപക്ഷത്തിന് 18 സീറ്റുകളാണ് വേണ്ടത്. തെരഞ്ഞെടുപ്പില് ബിജെപി 11 സീറ്റുകള് നേടി ഏറ്റവും വലിയ ഒറ്റക്കക്ഷിയായെങ്കിലും ഭരിക്കാനുള്ള ഭൂരിപക്ഷം ലഭിച്ചില്ല. ഇവിടെയാണ് രണ്ട് സീറ്റുകളുള്ള എഐഎംഐഎമ്മിന്റെ നിലപാട് നിര്ണായകമായത്. ഭരണം പിടിക്കുന്നതിനായി ബിജെപി പ്രാദേശിക നേതൃത്വം എഐഎംഐഎമ്മുമായും മറ്റ് സ്വതന്ത്രരുമായും ധാരണയിലെത്തുകയായിരുന്നു. ഈ സഖ്യത്തിന്റെ അടിസ്ഥാനത്തില് ബിജെപിയുടെ മായ ധുലെ നഗരസഭാ അധ്യക്ഷയാകുമെന്നും റിപ്പോര്ട്ടുകളുണ്ട്. കോണ്ഗ്രസ്, ശിവസേന (യുബിടി) തുടങ്ങിയ പ്രതിപക്ഷ പാര്ട്ടികളെ പുറത്തിരുത്തുക എന്ന ലക്ഷ്യത്തോടെയാണ് ഈ നീക്കം.
ബിജെപിയും എഐഎംഐഎമ്മും തമ്മിലുള്ള ഈ അപ്രതീക്ഷിത കൂട്ടുകെട്ടിനെതിരെ നിശിത വിമര്ശനവുമായി മഹാ വികാസ് അഘാഡി നേതാക്കള് രംഗത്തെത്തി. എഐഎംഐഎമ്മിനെ ബിജെപിയുടെ ‘ബി ടീം’ എന്ന് കോണ്ഗ്രസും ശിവസേനയും (യുബിടി) കാലങ്ങളായി ആരോപിക്കാറുണ്ട്. വോട്ടുകള് ഭിന്നിപ്പിച്ച് ബിജെപിയെ സഹായിക്കാനാണ് ഉവൈസിയുടെ പാര്ട്ടി മത്സരിക്കുന്നതെന്നായിരുന്നു ഇവരുടെ വാദം.
എന്നാല്, അകോലയിലെ സംഭവത്തോടെ ഈ ‘ബി ടീം’ ഇപ്പോള് ഔദ്യോഗികമായി ബിജെപിയുടെ ‘എ ടീം’ ആയി മാറിയിരിക്കുകയാണെന്ന് ശിവസേന (യുബിടി) നേതാവ് സഞ്ജയ് റാവത്ത് പരിഹസിച്ചു. ഹിന്ദുത്വത്തെക്കുറിച്ച് വാചാലരാകുന്ന ബിജെപി അധികാരത്തിന് വേണ്ടി ആരുമായും സഖ്യമുണ്ടാക്കും എന്നതിന്റെ തെളിവാണിതെന്നും റാവത്ത് കുറ്റപ്പെടുത്തി.
വാര്ത്ത വിവാദമായതോടെ മുഖം രക്ഷിക്കാനുള്ള ശ്രമത്തിലാണ് ഇരുപാര്ട്ടികളുടെയും സംസ്ഥാന നേതൃത്വം. അകോലയിലെ സഖ്യത്തിന് പാര്ട്ടി അനുമതി നല്കിയിട്ടില്ലെന്ന് ഉപമുഖ്യമന്ത്രി ദേവേന്ദ്ര ഫഡ്നാവിസ് വ്യക്തമാക്കി. ‘പ്രാദേശിക തലത്തില് എന്താണ് സംഭവിച്ചതെന്ന് പരിശോധിക്കും. എഐഎംഐഎമ്മുമായി സഖ്യമുണ്ടാക്കുന്നത് ബിജെപിയുടെ നയമല്ല. ഇതിന് ഉത്തരവാദികളായവര്ക്കെതിരെ കര്ശന നടപടിയുണ്ടാകും,’ ഫഡ്നാവിസ് പറഞ്ഞു.
ബിജെപി സംസ്ഥാന അധ്യക്ഷന് ചന്ദ്രശേഖര് ബാവന്കുലെയും സമാനമായ പ്രതികരണമാണ് നടത്തിയത്. പ്രാദേശിക ഘടകം പാര്ട്ടി നയത്തിന് വിരുദ്ധമായാണ് പ്രവര്ത്തിച്ചതെന്നും, ആരെങ്കിലും എഐഎംഐഎമ്മിന് വോട്ട് ചെയ്യുകയോ പിന്തുണ സ്വീകരിക്കുകയോ ചെയ്താല് അവരെ പാര്ട്ടിയില്നിന്ന് പുറത്താക്കുമെന്നും അദ്ദേഹം മുന്നറിയിപ്പ് നല്കി.
മറുവശത്ത്, എഐഎംഐഎം സംസ്ഥാന അധ്യക്ഷന് ഇംതിയാസ് ജലീലും വാര്ത്ത നിഷേധിച്ചു. ബിജെപിയുമായി സഖ്യമുണ്ടാക്കാന് പാര്ട്ടി ആര്ക്കും അനുമതി നല്കിയിട്ടില്ലെന്നും, ഇത്തരം നീക്കങ്ങള് നടത്തിയ കൗണ്സിലര്മാര്ക്കെതിരെ അച്ചടക്ക നടപടി സ്വീകരിക്കുമെന്നും അദ്ദേഹം അറിയിച്ചു.
അടുത്തിടെ ഗോണ്ടിയ ജില്ലയില് കോണ്ഗ്രസ് വിമതനെ പിന്തുണച്ച് ബിജെപി ഭരണം പിടിച്ച സംഭവത്തിന് പിന്നാലെയാണ് അകോലയിലെ ഈ പുതിയ രാഷ്ട്രീയ നാടകം അരങ്ങേറുന്നത്.
