അമേരിക്കയിൽ നടക്കാനിരിക്കുന്നത് ഫുട്ബോൾ ചരിത്രത്തിലെ ഏറ്റവും മോശം വേൾഡ് കപ്പോ?

വാഷിങ്ടൺ: ലോകമെമ്പാടുമുള്ള ഫുട്ബോൾ ആരാധകർ ഏറെ ആകാംക്ഷയോടെ കാത്തിരിക്കുന്ന 2026 ഫിഫ വേൾഡ് കപ്പിന് ഇനി മാസങ്ങൾ മാത്രമാണ് ബാക്കി. 48 ടീമുകൾ അണിനിരക്കുന്ന, ചരിത്രത്തിലെ ഏറ്റവും വലിയ ടൂർണമെന്റ് എന്ന വിശേഷണത്തോടെയാണ് വടക്കേ അമേരിക്കൻ ഭൂഖണ്ഡം ഈ മാമാങ്കത്തിന് വേദിയാകുന്നത്. എന്നാൽ ആവേശത്തിനൊപ്പം തന്നെ വലിയ ആശങ്കകളും വിവാദങ്ങളുമാണ് ഇപ്പോൾ ഈ വേൾഡ് കപ്പിനെ ചുറ്റിപ്പറ്റിയുള്ളത്. ഇതുവരെയുണ്ടായതിൽ വെച്ച് ഏറ്റവും മോശം ലോകകപ്പായി ഇത് മാറുമോ എന്ന ചോദ്യമാണ് ഫുട്ബോൾ നിരീക്ഷകർ ഇപ്പോൾ ഉയർത്തുന്നത്.

ആരാധകരെ ഏറ്റവും കൂടുതൽ ഞെട്ടിക്കുന്നത് ടൂർണമെന്റിന്റെ അമിതമായ ചെലവുകളാണ്. ലോകകപ്പ് ഫൈനലിന്റെ ടിക്കറ്റ് നിരക്ക് ഏതാണ്ട് 11,990 ഡോളർ അഥവാ ഇന്ത്യൻ രൂപ പത്തുലക്ഷത്തോളം രൂപയായാണ് ഉയർത്തിയിരിക്കുന്നത്. ഫുട്ബോൾ ചരിത്രത്തിലെ തന്നെ ഏറ്റവും ഉയർന്ന ടിക്കറ്റ് നിരക്കാണിത്. സാധാരണക്കാരായ ആരാധകർക്ക് ചിന്തിക്കാൻ പോലും കഴിയാത്ത ഈ തുക ടൂർണമെന്റിന്റെ ആവേശം കുറയ്ക്കുമെന്ന് ഉറപ്പാണ്. ടിക്കറ്റ് നിരക്കിന് പുറമെ വിമാനയാത്രയ്ക്കും ഹോട്ടൽ താമസത്തിനുമായി ചെലവാക്കേണ്ടി വരുന്ന വൻ തുക ആരാധകരെ കടുത്ത നിരാശയിലാക്കുന്നു.

യാത്രാ നിയന്ത്രണങ്ങളും വിസ നിബന്ധനകളുമാണ് മറ്റൊരു പ്രധാന വെല്ലുവിളി. അൾജീരിയ, സെനഗൽ, ഐവറി കോസ്റ്റ്, ടുണീഷ്യ തുടങ്ങിയ രാജ്യങ്ങളിൽ നിന്നുള്ള ആരാധകർക്കും കളിക്കാർക്കും അമേരിക്കയിലേക്ക് കടക്കണമെങ്കിൽ 15,000 ഡോളറിന്റെ ബോണ്ട് തുക കെട്ടിവെക്കണമെന്ന യുഎസ് ഗവൺമെന്റിന്റെ കർശന നിർദ്ദേശം വലിയ പ്രതിഷേധത്തിന് കാരണമായിട്ടുണ്ട്. ഇതിന് പുറമെ ബ്രസീൽ, മൊറോക്കോ തുടങ്ങിയ രാജ്യങ്ങളിൽ നിന്നുള്ളവർക്കും കടുത്ത യാത്രാ നിയന്ത്രണങ്ങൾ ഏർപ്പെടുത്തിയിട്ടുണ്ട്. ഒരു ലോകകപ്പിന്റെ ആവേശം അതിന്റെ ഗാലറികളിലെ വൈവിധ്യമാർന്ന ആരാധകക്കൂട്ടമാണ് എന്നിരിക്കെ ഇത്തരം വിവേചനങ്ങൾ ടൂർണമെന്റിന്റെ നിറം കെടുത്തുന്നു.

ആകെ നടക്കുന്ന 104 മത്സരങ്ങളിൽ 78 എണ്ണവും നടക്കുന്നത് അമേരിക്കയിലാണ്. എന്നാൽ മത്സരങ്ങൾ നടക്കുന്ന നഗരങ്ങൾക്കായി അനുവദിച്ച 625 മില്യൺ ഡോളറിന്റെ ഫെഡറൽ ഫണ്ട് ഇതുവരെയും ഈ നഗരങ്ങളിൽ എത്തിച്ചേർന്നിട്ടില്ല എന്നത് സംഘാടനത്തിലെ വലിയ പാളിച്ചയായി ചൂണ്ടിക്കാണിക്കപ്പെടുന്നു. അടിസ്ഥാന സൗകര്യ വികസനവും സുരക്ഷാ ക്രമീകരണങ്ങളും പൂർത്തിയാക്കാൻ ഈ ഫണ്ട് വൈകുന്നത് വലിയ പ്രതിസന്ധിയാണ് സൃഷ്ടിക്കുന്നത്.

സുരക്ഷാ കാര്യത്തിലും വലിയ ആശങ്കകളാണ് നിലനിൽക്കുന്നത്. മെക്സിക്കോയിൽ ഡ്രഗ് കാർട്ടൽ തലവന്റെ കൊലപാതകത്തെ തുടർന്നുണ്ടായ ആഭ്യന്തര കലാപം ടൂർണമെന്റിന് വലിയ ഭീഷണിയാണ്. സുരക്ഷ ഉറപ്പാക്കാൻ ഒരു ലക്ഷത്തിലധികം സൈനികരെയാണ് മെക്സിക്കോയിലുടനീളം വിന്യസിച്ചിരിക്കുന്നത്. ലോകകപ്പിലെ പ്രധാനപ്പെട്ട 13 മത്സരങ്ങൾ നടക്കേണ്ടത് മെക്സിക്കോയിലാണ് എന്നതുകൊണ്ടുതന്നെ ഈ സാഹചര്യം ഏറെ ഗൗരവകരമാണ്. ഇതിനുപുറമെ, നിലവിൽ തുടരുന്ന ഇറാൻ-യുഎസ് യുദ്ധപ്രതിസന്ധിയും ടൂർണമെന്റിനെ ബാധിക്കുമോ എന്ന ഭയം ആഗോളതലത്തിലുണ്ട്.

ഏറ്റവും ഒടുവിൽ പുറത്തിറങ്ങിയ വേൾഡ് കപ്പ് തീം സോങ്ങും ആരാധകരെ തൃപ്തിപ്പെടുത്തിയിട്ടില്ല. ലോകകപ്പ് ചരിത്രത്തിലെ തന്നെ ഏറ്റവും മോശം തീം സോങ്ങായാണ് ഇതിനെ ഫുട്ബോൾ ലോകം വിലയിരുത്തുന്നത്. ഷക്കീറയുടെയും കെനാൻറെയും ഗാനങ്ങൾ നൽകിയ ആവേശത്തിന്റെ പത്തുശതമാനം പോലും പുതിയ ഗാനത്തിന് നൽകാൻ കഴിയുന്നില്ലെന്നാണ് പൊതുവായ അഭിപ്രായം.

ചുരുക്കത്തിൽ, ടീമുകളുടെ എണ്ണം കൂട്ടിയത് കൊണ്ടുമാത്രം ഒരു ലോകകപ്പ് മികച്ചതാകില്ല. സാധാരണക്കാരായ ആരാധകരെ അകറ്റി നിർത്തുന്ന സാമ്പത്തിക നയങ്ങളും സുരക്ഷാ ഭീഷണികളും രാഷ്ട്രീയ അസ്ഥിരതകളും പരിഹരിക്കപ്പെട്ടില്ലെങ്കിൽ 2026 ലോകകപ്പ് വെറുമൊരു കച്ചവട മാമാങ്കമായി മാത്രം അവശേഷിക്കുമെന്നാണ് ഫുട്ബോൾ ലോകത്തിനുള്ളിലെ വിലയിരുത്തൽ.