ഒന്നാം ക്ലാസില് ചേരുന്ന ഓരോ കുട്ടിക്കും 2,000 രൂപ! ‘സര്പ്രൈസ് ഗിഫ്റ്റു’മായി ഞെട്ടിച്ച് അധ്യാപകന്
യാദ്ഗിരി: കർണാടകയിലെ ഒരു സർക്കാർ സ്കൂൾ അധ്യാപകൻ മാതാപിതാക്കളെ തങ്ങളുടെ കുട്ടികളെ സ്കൂളിൽ ചേർക്കാൻ പ്രോത്സാഹിപ്പിക്കുന്നതിനായി വേറിട്ടൊരു സംരംഭത്തിന് തുടക്കമിട്ടിരിക്കുകയാണ്. തണ്ടകളിലെ (ആദിവാസി ഗ്രാമങ്ങൾ) രക്ഷിതാക്കൾ കുട്ടികളെ പ്രാദേശിക സർക്കാർ സ്കൂളിൽ ചേർക്കാനും, വിവിധ സർക്കാർ പദ്ധതികളുടെയും വിദ്യാഭ്യാസ സൗകര്യങ്ങളുടെയും പ്രയോജനം അവർക്ക് ലഭ്യമാക്കാനും ലക്ഷ്യമിട്ടാണ് അധ്യാപകനായ രമേശ് അങ്കാടി ഈ മാതൃകാപരമായ പ്രവർത്തനം ആരംഭിച്ചത്.
കഴിഞ്ഞ വർഷം ഒന്നാം ക്ലാസ്സിൽ 11 കുട്ടികളാണ് ഈ സ്കൂളിൽ പ്രവേശനം നേടിയത്. എന്നാൽ ഈ പുതിയ പദ്ധതിയിലൂടെ ഈ വർഷം കൂടുതൽ കുട്ടികളെ സ്കൂളിലേക്ക് ആകർഷിക്കാൻ കഴിയുമെന്നാണ് രമേശ് അങ്കാടിയുടെ പ്രതീക്ഷ.
“മരണപ്പെട്ടുപോയ എന്റെ മൂത്ത സഹോദരൻ ശിവശരണപ്പ അങ്കാടിയുടെ ഓർമ്മയ്ക്കായിട്ടാണ് ഒന്നാം ക്ലാസിൽ പുതുതായി ചേരുന്ന ഓരോ വിദ്യാർത്ഥിയുടെയും പേരിൽ 2,000 രൂപ വീതം ബാങ്കിൽ നിക്ഷേപിക്കാൻ ഞാൻ തീരുമാനിച്ചത്. കുട്ടികളെ മുടങ്ങാതെ സ്കൂളിലേക്ക് അയയ്ക്കാനും അവരുടെ വിദ്യാഭ്യാസത്തെ പിന്തുണയ്ക്കാനും മാതാപിതാക്കൾക്ക് ഇതൊരു പ്രചോദനമാകട്ടെ എന്ന് ഞാൻ കരുതുന്നു,” രമേശ് അങ്കാടി പറഞ്ഞു.
നിലവിൽ മൂന്ന് സുസജ്ജമായ ക്ലാസ് മുറികളുള്ള ഒരു പുതിയ കെട്ടിടം ഈ സ്കൂളിന് അടുത്തിടെ ലഭിച്ചിട്ടുണ്ട്. രണ്ട് അധ്യാപകരാണ് ഇവിടെയുള്ളത്. മറ്റ് സർക്കാർ ആനുകൂല്യങ്ങൾക്ക് പുറമേ, എല്ലാ ദിവസവും കുട്ടികൾക്ക് ഉച്ചഭക്ഷണം, പാൽ, മുട്ട എന്നിവ കൃത്യമായി സ്കൂളിൽ നൽകുന്നുണ്ടെന്ന് ഹെഡ്മാസ്റ്റർ ബസപ്പ വ്യക്തമാക്കി. പുതിയ അധ്യയന വർഷത്തെ പ്രവേശന നടപടികൾ ആരംഭിച്ചതായും, അധ്യാപകൻ്റെ ഈ നല്ല തീരുമാനം കുട്ടികളുടെ എണ്ണം കൂട്ടാനും വിദ്യാഭ്യാസ പുരോഗതി മെച്ചപ്പെടുത്താനും സഹായിക്കുമെന്നും പ്രധാനാധ്യാപകൻ കൂട്ടിച്ചേർത്തു.
ഈ അധ്യാപകൻ്റെ വലിയ മനസ്സിന് പ്രദേശവാസികളിൽ നിന്നും സ്കൂൾ വികസന സമിതി (SDMC) അംഗങ്ങളിൽ നിന്നും വലിയ അഭിനന്ദനങ്ങളാണ് ലഭിക്കുന്നത്. വ്യക്തിപരമായ സമ്പാദ്യത്തിൽ നിന്ന് രമേശ് അങ്ങാടി മുൻപും വിദ്യാർത്ഥികളെ നിരന്തരം സഹായിക്കാറുണ്ടെന്ന് എസ്ഡിഎംസി പ്രസിഡൻ്റ് കൃഷ്ണനായക് പറഞ്ഞു. കഴിഞ്ഞ വർഷവും അദ്ദേഹം തന്റെ സ്വന്തം പണം ഉപയോഗിച്ചാണ് സ്കൂളിലെ എല്ലാ വിദ്യാർത്ഥികൾക്കും സ്പോർട്സ് യൂണിഫോമുകൾ വാങ്ങി നൽകിയത്. കുട്ടികളുടെ വിദ്യാഭ്യാസത്തോടുള്ള അദ്ദേഹത്തിൻ്റെ ഈ താല്പര്യം ശരിക്കും പ്രശംസനീയമാണെന്ന് അദ്ദേഹം ഓർമ്മിപ്പിച്ചു.
ഇത്തരം സ്വകാര്യ ശ്രമങ്ങൾ സർക്കാർ സ്കൂളുകളിലുള്ള പൊതുജനങ്ങളുടെ ആത്മവിശ്വാസം ഇരട്ടിയാക്കുമെന്നും, ഗ്രാമീണ-ആദിവാസി മേഖലകളിൽ നിന്നുള്ള കൂടുതൽ കുട്ടികൾക്ക് മികച്ച വിദ്യാഭ്യാസം ഉറപ്പാക്കാൻ സഹായിക്കുമെന്നും പ്രദേശവാസികൾ പറയുന്നു.
