ഡൽഹിയിൽ കേന്ദ്രത്തിനെതിരെ പ്രതിഷേധിക്കാൻ ഒരു ട്രെയിൻ മുഴുവനായി വാടകയ്ക്കെടുത്ത് സിപിഐ; അഡ്വാൻസ് 9 ലക്ഷം
തിരുവനന്തപുരം: കേന്ദ്ര സർക്കാരിന്റെ നയങ്ങൾക്കെതിരെ ഡൽഹിയിൽ നടത്തുന്ന വൻ പ്രതിഷേധ മാർച്ചിൽ പങ്കെടുക്കാൻ ഒരു ട്രെയിൻ മുഴുവനായി വാടകയ്ക്കെടുക്കാൻ സി.പി.ഐ സംസ്ഥാന നേതൃത്വം തീരുമാനിച്ചു. 18 കോച്ചുകളുള്ള ഒരു ട്രെയിൻ പൂർണ്ണമായും ബുക്ക് ചെയ്താണ് കേരളത്തിൽ നിന്നുള്ള സി.പി.ഐ പ്രവർത്തകർ രാജ്യതലസ്ഥാനത്തേക്ക് യാത്ര തിരിക്കുന്നത്. ഇതിനായുള്ള പ്രാഥമിക നടപടികളുടെ ഭാഗമായി ഒമ്പത് ലക്ഷം രൂപ അഡ്വാൻസായി പാർട്ടി റെയിൽവേയ്ക്ക് കൈമാറിയിട്ടുണ്ട്. കേരളത്തിലെ ഒരു രാഷ്ട്രീയ പാർട്ടി തങ്ങളുടെ പ്രവർത്തകർക്ക് മാത്രമായി ഒരു പ്രത്യേക തീവണ്ടി മുഴുവനായി വാടകയ്ക്കെടുത്ത് സമരം ചെയ്യാൻ പോകുന്നത് ചരിത്രത്തിൽ ഇതാദ്യമായാണ്.
വരുന്ന സെപ്റ്റംബർ ഒന്നിനാണ് സി.പി.ഐ കേന്ദ്ര സർക്കാരിനെതിരെ ഡൽഹിയിൽ ദേശീയതലത്തിലുള്ള വൻ പ്രതിഷേധ പരിപാടി സംഘടിപ്പിച്ചിരിക്കുന്നത്. കേരളത്തിൽ നിന്നുള്ള 1500-ഓളം പാർട്ടി പ്രവർത്തകരാണ് ഈ മാർച്ചിൽ അണിനിരക്കുക. ഇത്രയധികം ആളുകൾക്ക് ഒന്നിച്ച് യാത്രാസൗകര്യം ഒരുക്കുന്നതിന് വേണ്ടിയാണ് പാർട്ടി നേതൃത്വം ട്രെയിൻ ബുക്ക് ചെയ്തത്. ഓഗസ്റ്റ് 29-ന് തിരുവനന്തപുരത്തെ കൊച്ചുവേളി റെയിൽവേ സ്റ്റേഷനിൽ നിന്ന് പുറപ്പെടുന്ന ഈ പ്രത്യേക തീവണ്ടി ഓഗസ്റ്റ് 31-ന് ഡൽഹിയിൽ എത്തിച്ചേരും. തുടർന്ന് സമരം കഴിഞ്ഞ് സെപ്റ്റംബർ 2-ന് ഡൽഹിയിൽ നിന്ന് തിരിച്ച് പുറപ്പെട്ട് സെപ്റ്റംബർ 4-ന് ട്രെയിൻ തിരുവനന്തപുരത്ത് മടങ്ങിയെത്തും.
റെയിൽവേയുടെ അധികവരുമാന മാർഗങ്ങളിലൊന്നായ ‘സ്പെഷൽ ട്രെയിൻ’ വ്യവസ്ഥ പ്രകാരമാണ് സി.പി.ഐ ഈ സൗകര്യം പ്രയോജനപ്പെടുത്തുന്നത്. യാത്ര ചെയ്യുന്ന റൂട്ട്, ആകെ ദൂരം, യാത്രക്കാരുടെ എണ്ണം, നിശ്ചയിച്ചിട്ടുള്ള സ്റ്റോപ്പുകൾ, ഇതിനായി വേണ്ടി വരുന്ന സമയം എന്നിവയെല്ലാം കണക്കാക്കിയാണ് റെയിൽവേ ഇത്തരം പ്രത്യേക സർവീസുകൾക്കുള്ള ആകെ വാടക നിശ്ചയിക്കുന്നത്. ഈ തുക സംബന്ധിച്ച അന്തിമ കണക്കുകൾ റെയിൽവേ പാർട്ടി നേതൃത്വത്തെ ഔദ്യോഗികമായി അറിയിക്കാനിരിക്കുന്നതേയുള്ളൂ.
