ജോലി രാജിവെച്ച് അച്ചാർ വിൽപ്പന ആരംഭിച്ചു; ഇന്ന് 81 കോടി രൂപ മൂല്യമുള്ള സ്റ്റാർട്ടപ്പ് പടുത്തുയർത്തി ജെൻ സി സുഹൃത്തുക്കൾ

രണ്ട് വർഷം മുമ്പ് ലീ മാർക്കസും യാസമൻ ബക്തിയാറും ചേർന്ന് ‘ഗുഡ് ഗേൾ സ്നാക്സ്’ എന്ന ഫുഡ് ബ്രാൻഡ് ആരംഭിച്ചു. ഇതിന്റെ തുടക്കത്തെക്കുറിച്ചുള്ള കഥ ആളുകളെ ഇപ്പോഴും ആവേശഭരിതരാക്കുന്നു.

സി.എൻ.ബി.സി (CNBC) റിപ്പോർട്ട് അനുസരിച്ച്, അമേരിക്ക ആസ്ഥാനമായുള്ള ഈ സ്റ്റാർട്ടപ്പ് 8.5 മില്യൺ ഡോളർ മൂല്യനിർണ്ണയത്തിൽ 3 മില്യൺ ഡോളറിന്റെ സീഡ് ഫണ്ടിംഗ് സമാഹരിച്ചു. സ്ഥാപകർ ടിക് ടോക്കിൽ അച്ചാറുമായി ബന്ധപ്പെട്ട വിവരങ്ങൾ പങ്കുവെക്കാൻ തുടങ്ങിയതിന് ശേഷം 2024 ഫെബ്രുവരിയിലാണ് കമ്പനി തങ്ങളുടെ ‘ഹോട്ട് ഗേൾ പിക്ക്ൾസ്’ ബ്രാൻഡ് പുറത്തിറക്കിയത്. ഈ ബ്രാൻഡ് ആദ്യം ഓൺലൈനായാണ് വിറ്റഴിച്ചതെങ്കിലും, പിന്നീട് ഹോൾ ഫുഡ്സ് മാർക്കറ്റ്, എറെവോൺ എന്നിവയുൾപ്പെടെയുള്ള അമേരിക്കൻ റീട്ടെയിൽ സ്ഥാപനങ്ങളിലേക്ക് വ്യാപിച്ചു.

യൂണിവേഴ്‌സിറ്റി ഓഫ് സതേൺ കാലിഫോർണിയയിൽ പഠിക്കുമ്പോഴാണ് മാർക്കസും ബക്തിയാറും കണ്ടുമുട്ടിയത്. സോഷ്യൽ മീഡിയ കേന്ദ്രീകരിച്ചുള്ള ബ്രാൻഡിംഗിലൂടെയും ഉപഭോക്താക്കളുമായുള്ള നേരിട്ടുള്ള ബന്ധത്തിലൂടെയുമാണ് അവർ ഈ ബിസിനസ്സ് കെട്ടിപ്പടുത്തത്. ഈ രണ്ട് ജെൻ സീ സ്ഥാപകരും തങ്ങളുടെ ജോലി ഉപേക്ഷിച്ചാണ് ഈ സ്റ്റാർട്ടപ്പ് നിർമ്മിച്ചത്. കമ്പനിയുടെ വെബ്‌സൈറ്റിൽ പലതരം രുചികളിലുള്ള അച്ചാറുകൾ വിൽപ്പനയ്ക്ക് വെച്ചിട്ടുണ്ട്. അടുത്തിടെ പുറത്തിറക്കിയ രണ്ടെണ്ണത്തിന് 2.2 ഔൺസ് പൗച്ചിന് 3.66 ഡോളറാണ് വില.

മൈൻഡ്സെറ്റിന് അനുസരിച്ചുള്ള ബ്രാൻഡ് ഐഡന്റിറ്റി

‘ഗുഡ് ഗേൾ സ്നാക്സ്’, ‘ഹോട്ട് ഗേൾ പിക്ക്ൾസ്’ എന്നീ ആശയങ്ങൾക്ക് പിന്നിലെ കാരണം വിശദീകരിച്ച കമ്പനി, ‘ഹോട്ട് ഗേൾ വോക്സ്’ (hot girl walks), ‘ഗേൾ ഡിന്നേഴ്സ്’ (girl dinners) തുടങ്ങിയ സോഷ്യൽ മീഡിയ ട്രെൻഡുകളിൽ നിന്നാണ് ഈ പേരുകൾക്ക് പ്രചോദനം ഉൾക്കൊണ്ടതെന്ന് വ്യക്തമാക്കി. ഊർജ്ജം, ആത്മവിശ്വാസം, അനുദിന സന്തോഷം എന്നിവയുമായി ബന്ധപ്പെടുത്തിയാണ് ‘ഗേൾ’ എന്ന വാക്ക് ഇവിടെ ഉപയോഗിച്ചിരിക്കുന്നത്.

1.8 ലക്ഷത്തിലധികം സോഷ്യൽ മീഡിയ ഫോളോവേഴ്‌സുള്ള കമ്പനിയുടെ ഡിജിറ്റൽ ജനപ്രീതി വർണ്ണാഭമായ ദൃശ്യങ്ങൾ പങ്കുവെക്കുന്നതിലൂടെയാണ് ലഭിക്കുന്നത്. ഇത് ചെറുപ്പക്കാരായ ഉപഭോക്താക്കളെ ഏറെ ആകർഷിക്കുകയും അവർ ഈ ആശയത്തെ ‘പുതുമയുള്ളത്’ എന്ന് വിശേഷിപ്പിക്കുകയും ചെയ്തു.

സി.എൻ.ബി.സി (CNBC) റിപ്പോർട്ട് അനുസരിച്ച്, സ്ഥാപകരായ മാർക്കസും (26) ബക്തിയാറും (27) 2023 മുതൽ ദിവസവും അച്ചാറുകളെക്കുറിച്ചുള്ള ടിക് ടോക് വീഡിയോകൾ പരസ്പരം കൈമാറാൻ തുടങ്ങുകയും, ഒടുവിൽ ആ താല്പര്യത്തെ ഒരു ബിസിനസ്സാക്കി മാറ്റുകയുമായിരുന്നു.