‘നമ്മുടെ GenZ അപ്രഖ്യാപിത എമർ-GenZ-യേക്കാൾ മികച്ചത് അർഹിക്കുന്നു’; ഡൽഹിയിലെ നിയന്ത്രണങ്ങളെ രൂക്ഷമായി വിമർശിച്ച് ശശി തരൂർ

ന്യൂഡൽഹി: ജന്തർ മന്തറിൽ കോക്രോച്ച് ജനതാ പാർട്ടി (സിജെപി) സംഘടിപ്പിച്ച പ്രതിഷേധത്തിന്റെ പശ്ചാത്തലത്തിൽ ഡൽഹിയിൽ അധികാരികൾ ഏർപ്പെടുത്തിയ കടുത്ത സുരക്ഷാ നിയന്ത്രണങ്ങളെ രൂക്ഷമായി വിമർശിച്ച് കോൺഗ്രസ് എംപി ശശി തരൂർ. തെരഞ്ഞെടുപ്പുകളുടെ നീതിയുക്തതയിൽ ആത്മവിശ്വാസമുള്ള ഒരു സർക്കാർ ചോദ്യങ്ങളെ സ്വാഗതം ചെയ്യുകയാണ് വേണ്ടതെന്നും, എന്നാൽ അതിനെ അടിച്ചമർത്താൻ ശ്രമിക്കുന്നത് സംശയം വർധിപ്പിക്കുകയാണ് ചെയ്യുന്നതെന്നും ശശി തരൂർ എക്സിൽ കുറിച്ചു.

“തെരഞ്ഞെടുപ്പ് കമ്മീഷനിലുള്ള വിശ്വാസം പുനഃസ്ഥാപിക്കാൻ ബാരിക്കേഡുകൾ ഒന്നും ചെയ്യില്ല, പൊതുജനങ്ങളുടെ ചോദ്യങ്ങൾക്ക് അവർ എത്രയും വേഗം ഉത്തരം നൽകുന്നുവോ അത്രയും വേഗം ശാന്തത പുനഃസ്ഥാപിക്കപ്പെടും,” എന്ന് അദ്ദേഹം കൂട്ടിച്ചേർത്തു. ദേശീയ തലസ്ഥാനത്തെ തന്റെ സ്വന്തം അനുഭവം വിവരിച്ചുകൊണ്ട്, ഡൽഹിയിൽ ഇത്തരം അങ്ങേയറ്റത്തെ നടപടികൾ അപൂർവ്വമായി മാത്രമേ താൻ കണ്ടിട്ടുള്ളൂവെന്ന് തരൂർ ചൂണ്ടിക്കാട്ടി.

“പുലർച്ചെ 2 മണിക്ക് ശേഷം ഞാൻ ദേശീയ തലസ്ഥാനത്ത് തിരിച്ചെത്തി, ഇപ്പോൾ ഡൽഹിയിൽ കാണുന്നത് പോലെയുള്ളതൊക്കെ ഞാൻ വളരെ അപൂർവമായി മാത്രമേ കണ്ടിട്ടുള്ളൂ. ഓരോ നൂറു മീറ്ററിലും ചെക്ക്പോസ്റ്റുകൾ, റോഡുകളിൽ കോൺക്രീറ്റ് ബാരിയറുകളും സ്പൈക്ക് സ്ട്രിപ്പുകളും സ്ഥാപിച്ചിരിക്കുന്നു, നഗരത്തിലുടനീളം 22,000 പൊലീസിന്റെയും അർധസൈനികരുടെയും യുദ്ധസമാനമായ വിന്യാസം, 250 ട്രെയിനുകൾ റദ്ദാക്കി, 45 മെട്രോ സ്റ്റേഷനുകൾ അടച്ചുപൂട്ടി, ഡൽഹിയിലും പരിസര പ്രദേശങ്ങളിലും സ്വന്തം വീടുകളിൽ നിന്നും തെരുവുകളിൽ നിന്നും യുവാക്കളെ കസ്റ്റഡിയിലെടുത്തതായി റിപ്പോർട്ടുകൾ ഇതെല്ലാം നമ്മുടെ തെ രഞ്ഞെടുപ്പുകളുടെ സമഗ്രതയെക്കുറിച്ച് പൗരന്മാർ സമാധാനപരമായി ചോദ്യങ്ങൾ ഉന്നയിക്കുന്നത് തടയാൻ വേണ്ടിയാണ്.” – അദ്ദേഹം കുറിച്ചു.

നഗരത്തിൽ നടപ്പിലാക്കിയ കടുത്ത നിയന്ത്രണങ്ങളെ രൂക്ഷമായി അപലപിച്ച തരൂർ, അവയെ തീർത്തും പിന്തിരിപ്പൻ നയങ്ങളെന്നാണ് വിശേഷിപ്പിച്ചത്. “ഏറ്റവും പിന്തിരിപ്പൻ ദേശീയ തലസ്ഥാനത്തിന്റെ ഹൃദയഭാഗത്ത് ഇന്റർനെറ്റ് താൽക്കാലികമായി നിർത്തിവച്ചതാണ്. സഞ്ചാര സ്വാതന്ത്ര്യം പൂർണമായും പരിമിതപ്പെടുത്തിയിരിക്കുന്നു. ഡൽഹിയുടെ മധ്യഭാഗത്ത് പൗരന്മാർക്ക് വിയോജിപ്പ് പ്രകടിപ്പിക്കാൻ കഴിയുന്ന തരത്തിലാണ് ജന്തർ മന്തർ നിർമ്മിച്ചത്. എന്നാൽ ഇന്ന് അതിലേക്കുള്ള റോഡുകൾ പോലും അടച്ചിരിക്കുന്നു.”

ഇത്തരം കണിശമായ നടപടികൾ നഗരങ്ങളെ സ്ത്രീകൾക്ക് കൂടുതൽ സുരക്ഷിതമാക്കുന്നതിനായി സ്വീകരിക്കാത്തത് എന്തുകൊണ്ടാണെന്ന് തരൂർ ചോദിച്ചു. “തടങ്കലിൽ വച്ചവരെ വിട്ടയക്കേണ്ടിവരും. പ്രതിഷേധക്കാർ തിങ്കളാഴ്ച തിരിച്ചെത്തിയാൽ, അധികാരികൾ വീണ്ടും ദേശീയ തലസ്ഥാനം പൂട്ടിയിടുമോ? നമ്മുടെ GenZ ഒരു അപ്രഖ്യാപിത എമർ-GenZ-യേക്കാൾ മികച്ചത് അർഹിക്കുന്നു” – തരൂർ വ്യക്തമാക്കി.