‘ആടിനെ പട്ടിയാക്കരുത്, സർക്കാരിന്റെ വിവിധ വകുപ്പുകളിൽ നടക്കുന്നത് തോന്നിവാസങ്ങൾ’; രൂക്ഷവിമർശനവുമായി എൻ പ്രശാന്ത്ര് ഐഎഎസ്

തിരുവനന്തപുരം: സംസ്ഥാനത്തെ വിവിധ സർക്കാർ വകുപ്പുകളുടെ പ്രവർത്തനങ്ങളിൽ ഗുരുതരമായ വീഴ്ചകളുണ്ടെന്ന രൂക്ഷവിമർശനവുമായി എൻ പ്രശാന്ത് ഐഎഎസ്. ബിജു പ്രഭാകർ ഐഎഎസിൻ്റെ പുസ്തക പ്രകാശന ചടങ്ങിലായിരുന്നു അദ്ദേഹത്തിൻ്റെ തുറന്നുപറച്ചിൽ. പവർക്കട്ടില്ലെന്ന് ആവർത്തിച്ച് പറഞ്ഞ് ജനങ്ങളെ തെറ്റിദ്ധരിപ്പിക്കുന്നത് ‘ആടിനെ പട്ടിയാക്കുന്ന’ നടപടിയാണെന്ന് അദ്ദേഹം കുറ്റപ്പെടുത്തി.

കെഎസ്ഇബി ചെയർമാനായിരുന്ന കാലത്തെ അനുഭവം മുൻനിർത്തിയായിരുന്നു പ്രശാന്തിൻ്റെ വിമർശനം. ആരും അറിയാതെ പവർക്കട്ട് നടപ്പിലാക്കാൻ സാധിക്കുമെന്നും പല പദ്ധതികളും കൃത്യമായി പ്രവർത്തിക്കുന്നില്ലെന്നും അദ്ദേഹം ചൂണ്ടിക്കാട്ടി. ലോഡ്ഷെഡിങ്ങിൻ്റെ ഉത്തരവാദിത്തത്തിൽ സർക്കാരിനെ മാത്രം കുറ്റപ്പെടുത്തിയിട്ട് കാര്യമില്ലെന്നും അത് കൈകാര്യം ചെയ്യേണ്ടത് പ്രൊഫഷണൽ എഞ്ചിനീയർമാരാണെന്നും അദ്ദേഹം പറഞ്ഞു.

അതിരപ്പള്ളി പദ്ധതി നടപ്പിലാക്കാൻ അനുവദിക്കാത്തതിന് പിന്നിൽ റിസോർട്ട് മാഫിയ ആണെന്നും പ്രശാന്ത് ആരോപിച്ചു. സംസാരിക്കാനും അഭിപ്രായം പറയാനും എല്ലാവർക്കും അവകാശമുണ്ടെന്ന് വ്യക്തമാക്കിയ അദ്ദേഹം, വകുപ്പുകളിൽ നടക്കുന്ന തോന്നിവാസങ്ങളാണ് ബിജു പ്രഭാകറിൻ്റെ പുസ്തകത്തിലുള്ളതെന്നും കൂട്ടിച്ചേർത്തു.