സാമൂഹികമാധ്യമങ്ങളിൽ അശ്ലീല പ്രചാരണം; ലക്ഷ്മിപ്രിയയ്ക്കും ശ്വേതയ്ക്കുമെതിരെ കേസ് കൊടുത്ത് അൻസിബ

കൊച്ചി: സോഷ്യൽ മീഡിയ വഴി വ്യാജവും അശ്ലീലവുമായ വീഡിയോകൾ പ്രചരിപ്പിച്ച് സ്ത്രീത്വത്തെ അപമാനിക്കാൻ ശ്രമിച്ചെന്നാരോപിച്ച് നടി അൻസിബ ഹസ്സൻ പോലീസിൽ പരാതി നൽകി. എറണാകുളം പാലാരിവട്ടം പോലീസ് സ്റ്റേഷനിലാണ് താരം പരാതി സമർപ്പിച്ചത്. നടി ലക്ഷ്മി പ്രിയ, ‘കാൻ ചാനൽ മീഡിയ’ ഉടമ സുകുമാർ, നടി ശ്വേത മേനോൻ എന്നിവർക്കെതിരെയാണ് അൻസിബ നടപടി ആവശ്യപ്പെട്ടിരിക്കുന്നത്.

തനിക്കെതിരെ അത്യന്തം അപകീർത്തികരവും അസത്യവുമായ കാര്യങ്ങൾ പ്രചരിപ്പിച്ച് പൊതുസമൂഹത്തിൽ മോശക്കാരിയാക്കാൻ ബോധപൂർവമായ ശ്രമം നടക്കുന്നുണ്ടെന്ന് അൻസിബ പരാതിയിൽ വ്യക്തമാക്കുന്നു. ‘കാൻ ചാനൽ മീഡിയ’ എന്ന യൂട്യൂബ് ചാനലിലൂടെ ലക്ഷ്മി പ്രിയയും ചാനൽ ഉടമ സുകുമാറും ചേർന്ന് തനിക്കെതിരെ ഗുരുതരമായ ആരോപണങ്ങൾ ഉന്നയിക്കുന്ന വീഡിയോ നിർമിച്ചു പ്രചരിപ്പിച്ചെന്നാണ് പരാതി.

ഒരു നടി എന്നതിലുപരി ഒരു സ്ത്രീ എന്ന നിലയിൽ തന്നെ പൊതുസമൂഹത്തിൽ താറടിച്ചു കാണിക്കാൻ ലക്ഷ്മി പ്രിയ ബോധപൂർവം ശ്രമിച്ചുവെന്നും, ഈ സംഭവത്തിന് പിന്നിൽ ശ്വേത മേനോൻ ഗൂഢാലോചന നടത്തിയെന്നും അൻസിബ ആരോപിക്കുന്നു. ഇവരുമായി ചേർന്ന് തനിക്കെതിരെ പ്രവർത്തിച്ചവർക്കെതിരെ കർശനമായ നിയമനടപടികൾ സ്വീകരിക്കണമെന്ന് അൻസിബ പോലീസ് അധികൃതരോട് ആവശ്യപ്പെട്ടു.