സിജെപി പ്രതിഷേധത്തിൽ ആർഎഎഫ് ഉദ്യോഗസ്ഥർക്ക് ഭക്ഷണം പങ്കുവെച്ച് വിദ്യാർത്ഥികൾ
ന്യൂഡൽഹി: ജന്തർ മന്ദറിൽ കോക്രോച്ച് ജനതാ പാർട്ടി നടത്തുന്ന വിദ്യാർത്ഥി പ്രതിഷേധത്തിനിടെ സുരക്ഷാ ഉദ്യോഗസ്ഥരുമായി ഭക്ഷണം പങ്കുവെച്ച് പ്രതിഷേധക്കാർ. ‘കഴിക്കൂ സർ’ എന്ന് അഭ്യർത്ഥിച്ചാണ് റാപ്പിഡ് ആക്ഷൻ ഫോഴ്സ് (ആർഎഎഫ്) ഉദ്യോഗസ്ഥർക്ക് വിദ്യാർത്ഥികൾ ഭക്ഷണപ്പൊതികൾ കൈമാറിയത്. തങ്ങളുടെ പ്രതിഷേധം കേന്ദ്ര സർക്കാരിനെതിരെയാണെന്നും സുരക്ഷാ സേനയെയും അവരുടെ യൂണിഫോമിനെയും ഏറെ ബഹുമാനിക്കുന്നുണ്ടെന്നും വിദ്യാർത്ഥികളും സന്നദ്ധ പ്രവർത്തകരും വ്യക്തമാക്കി.
ജൂലൈ 20ന് നടന്ന ‘സൻസദ് ചലോ’ മാർച്ചിനിടെ പൊലീസ് നടത്തിയ ക്രൂരമായ അക്രമത്തിനു ശേഷവും ആയിരക്കണക്കിന് വിദ്യാർത്ഥികളാണ് ജന്തർ മന്ദറിൽ സമരം തുടരുന്നത്. കടുത്ത ചൂടിലും മണിക്കൂറുകളോളം ഡ്യൂട്ടിയിലുള്ള ആർ.എ.എഫ് ഉദ്യോഗസ്ഥർക്ക് ഭക്ഷണം നൽകിയ വിദ്യാർത്ഥികളുടെ പ്രവൃത്തിയെ ഏറെ പേർ അഭിനന്ദിച്ചുകൊണ്ട് രംഗത്തെത്തി.
രാജ്യത്തിന്റെ വിവിധ ഭാഗങ്ങളിൽ നിന്നും യു.എസ് ഉൾപ്പെടെയുള്ള വിദേശ രാജ്യങ്ങളിൽ നിന്നും ജനങ്ങൾ ഓൺലൈൻ ഡെലിവറി ആപ്പുകൾ വഴി അയച്ചുകൊടുക്കുന്ന ഭക്ഷണമാണ് സമരപ്പന്തലിൽ എത്തുന്നത്. സമരം ചെയ്യുന്ന വിദ്യാർത്ഥികൾക്ക് നൽകാനായി അപരിചിതരായ ആളുകൾ ഓർഡർ ചെയ്യുന്ന പിസ്സ, ബിരിയാണി, ഫ്രൂട്ട് ജ്യൂസ്, ലഘുഭക്ഷണങ്ങൾ എന്നിവ സ്ഥലത്തുള്ള സുരക്ഷാ ഉദ്യോഗസ്ഥർക്കും കൂടി വിതരണം ചെയ്താണ് സമരം നടത്തുന്നവർ ജനശ്രദ്ധ നേടുന്നത്. പ്രതിഷേധം ആരംഭിച്ച മുതൽ തന്നെ പൂക്കളും ഭരണഘടനയും കൈയിലേന്തിയ വിദ്യാർത്ഥികൾ ദേശീയ ശ്രദ്ധ നേടിയിരുന്നു.
സമരത്തിന് പിന്തുണ പ്രഖ്യാപിച്ച് നിഹംഗ് സിഖുകാർ ആരംഭിച്ച ലങ്കാർ (സൗജന്യ ഭക്ഷണശാല) വഴിയും എല്ലാവർക്കും ഭക്ഷണം ലഭ്യമാക്കുന്നുണ്ട്. കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ട് സമരം ശക്തമാകുമ്പോഴും, അക്രമരഹിതവും സമാധാനപരവുമായ രീതിയിൽ മുന്നോട്ടുപോകാനാണ് വിദ്യാർത്ഥികളുടെ തീരുമാനം.
