‘മക്കൾ തിരിഞ്ഞുനോക്കുന്നില്ല’; വീടിന് മുകളിൽ നിന്ന് ചാടാൻ ശ്രമിച്ച് വയോധിക, രക്ഷപ്പെടുത്തി നാട്ടുകാർ

വർക്കല: മക്കൾ സംരക്ഷിക്കാത്തതിനെ തുടർന്ന് വയോധിക വീടിനു മുകളിൽ നിന്ന് ചാടി ജീവനൊടുക്കാൻ ശ്രമിച്ചു. വർക്കല വോലാങ്കോണം സ്വദേശിനിയായ 82 കാരി സുധയാണ് ഇന്ന് രാവിലെ വീടിന്റെ സൺഷെയ്ഡിൽ കയറി ജീവനൊടുക്കാൻ മുതിർന്നത്. പ്രദേശവാസികളും ജനപ്രതിനിധികളും ചേർന്ന് ഇവരെ പിന്തിരിപ്പിച്ച് രക്ഷപ്പെടുത്തുകയായിരുന്നു.

മൂന്ന് മക്കളുള്ള സുധയെ സംരക്ഷിച്ചിരുന്ന മകൻ നേരത്തെ മരണപ്പെട്ടിരുന്നു. എന്നാൽ മറ്റ് രണ്ട് മക്കളും ഇവരെ നോക്കാൻ തയ്യാറാകുന്നില്ലെന്നാണ് നാട്ടുകാർ ആരോപിക്കുന്നത്. കഴിഞ്ഞ രണ്ടു ദിവസമായി ഇവർ ആഹാരം പോലും കഴിച്ചിരുന്നില്ലെന്നും അയൽവാസികളാണ് ഭക്ഷണം എത്തിച്ചു നൽകിയിരുന്നതെന്നും പ്രദേശവാസികൾ പറഞ്ഞു. സുധ നിലവിൽ താമസിക്കുന്ന വീട് മരണപ്പെട്ട മകൻ പണയം വെച്ചിരുന്നതിനാൽ ജപ്തി ഭീഷണിയിലുമാണ്.

മക്കൾ നോക്കാത്ത വിഷയം മുൻപ് പഞ്ചായത്തിന്റെ ശ്രദ്ധയിൽപ്പെടുത്തിയിരുന്നതായി നാട്ടുകാർ വ്യക്തമാക്കി. സംഭവത്തെ തുടർന്ന് പോലീസ് സ്ഥലത്തെത്തിയിട്ടുണ്ട്. വയോധികയ്ക്ക് അടിയന്തരമായി സർക്കാർതലത്തിൽ സംരക്ഷണം ഉറപ്പാക്കണമെന്നാണ് നാട്ടുകാരുടെ ആവശ്യം.