വയനാട് ഉരുൾപൊട്ടൽ: വ്യാപാരികൾക്കും സംരംഭകർക്കും ആശ്വാസപ്പൊതി; ഒരു കടയ്ക്ക് 7 ലക്ഷം, സംരംഭകർക്ക് നഷ്ടത്തിൻ്റെ 50 ശതമാനം
തിരുവനന്തപുരം: വയനാട് മുണ്ടക്കൈ-ചൂരൽമല ഉരുൾപൊട്ടലിൽ സർവ്വതും നഷ്ടപ്പെട്ട വ്യാപാരികൾക്കും സംരംഭകർക്കും കൈത്താങ്ങുമായി സംസ്ഥാന സർക്കാർ. ദുരന്തത്തിൽ തൊഴിലിടങ്ങളും ഉപജീവനമാർഗവും തകർന്നവർക്ക് പ്രത്യേക ധനസഹായം നൽകാൻ മുഖ്യമന്ത്രിയുടെ അധ്യക്ഷതയിൽ ചേർന്ന മന്ത്രിസഭാ യോഗം തീരുമാനിച്ചു. മുഖ്യമന്ത്രിയുടെ ദുരിതാശ്വാസ നിധിയിൽ നിന്നാണ് ഇതിനായുള്ള തുക അനുവദിക്കുന്നത്.
പുതിയ പാക്കേജ് പ്രകാരം, ദുരന്തത്തിൽ പൂർണ്ണമായും തകർന്ന ഓരോ കടയ്ക്കും കെട്ടിടത്തിന്റെ ഘടനയോ വലുപ്പമോ പരിഗണിക്കാതെ തന്നെ 7 ലക്ഷം രൂപ വീതം നഷ്ടപരിഹാരം നൽകും. ഒരാൾക്ക് ഒന്നിലധികം കടമുറികൾ നഷ്ടപ്പെട്ടിട്ടുണ്ടെങ്കിൽ, അധികമുള്ള ഓരോ മുറിക്കും 2.5 ലക്ഷം രൂപ വീതം അധികമായി ലഭിക്കും.
തകർന്ന സംരംഭങ്ങൾ പുനരാരംഭിക്കുന്നതിനായി, അവർക്കുണ്ടായ ആകെ നഷ്ടത്തിന്റെ പകുതിയോ (50%) അല്ലെങ്കിൽ സർക്കാർ നിശ്ചയിച്ച പരമാവധി തുകയോ ധനസഹായമായി നൽകും.
വിവിധ മേഖലകളിലെ സഹായ പരിധി ഇപ്രകാരമാണ്:
- നിർമ്മാണ മേഖല: പരമാവധി 20 ലക്ഷം രൂപ.
- സർവീസ് മേഖല: പരമാവധി 10 ലക്ഷം രൂപ.
- വാണിജ്യ മേഖല: പരമാവധി 7 ലക്ഷം രൂപ.
നഷ്ടപരിഹാര തുക വിതരണം ചെയ്യുന്നതിനായി വയനാട് ജില്ലാ കളക്ടറെ ചുമതലപ്പെടുത്തിയിട്ടുണ്ട്. തോട്ടം മേഖലയിലെ സാധാരണക്കാരായ വ്യാപാരികൾക്കും ചെറുകിട സംരംഭകർക്കും വലിയ ആശ്വാസമാകുന്നതാണ് സർക്കാരിന്റെ പുനരധിവാസ പാക്കേജ്.
