റെയ്ഡിൽ നിർണായക തെളിവുകൾ; വീണാ വിജയനെ ചോദ്യം ചെയ്യാൻ വിളിച്ചുവരുത്തുമെന്ന് ഇഡി
കൊച്ചി: സിഎംആർഎൽ-എക്സാലോജിക് സാമ്പത്തിക ഇടപാടുമായി ബന്ധപ്പെട്ട് കഴിഞ്ഞ ദിവസം നടത്തിയ റെയ്ഡുകളിൽ നിർണായക തെളിവുകൾ ലഭിച്ചതായി എൻഫോഴ്സ്മെന്റ് ഡയറക്ടറേറ്റ് വ്യക്തമാക്കി. ഇതിന്റെ അടിസ്ഥാനത്തിൽ പ്രതിപക്ഷ നേതാവ് പിണറായി വിജയന്റെ മകൾ വീണയെ ഉടൻ തന്നെ ചോദ്യം ചെയ്യലിനായി വിളിച്ചുവരുത്തും. കേന്ദ്ര ആസ്ഥാനത്ത് നിന്നും കൃത്യമായ മറുപടി ലഭിച്ച ശേഷം രണ്ട് ദിവസത്തിനകം വീണയ്ക്ക് ഔദ്യോഗികമായി സമൻസ് അയക്കാനാണ് ഇഡിയുടെ നീക്കം. കഴിഞ്ഞ ദിവസത്തെ പരിശോധനയിൽ 200ലധികം പ്രധാന രേഖകളാണ് ഇഡി പിടിച്ചെടുത്തത്. ഇതിനുപുറമെ വീണാ വിജയന്റെ മൂന്ന് ബാങ്ക് അക്കൗണ്ടുകൾ ഉൾപ്പെടെ 242 അക്കൗണ്ടുകളിലായി ഏകദേശം 18.36 കോടി രൂപ നിലവിൽ മരവിപ്പിച്ചിട്ടുണ്ട്. പിടിച്ചെടുത്ത ബാങ്ക് വിവരങ്ങളുടെ വിശദമായ പരിശോധന ആരംഭിച്ച ഇഡി, കേസുമായി ബന്ധപ്പെട്ട ഡയറിയിലുള്ള മറ്റു പ്രമുഖരെ കേന്ദ്രീകരിച്ചും അന്വേഷണം ഊർജ്ജിതമാക്കിയിട്ടുണ്ട്.
പരിശോധന വേളയിൽ വീണയുടെ ഫോണും സിഎംആർഎൽ എംഡി ശശിധരൻ കർത്തയുടെ ലാപ്ടോപ്പും ഇഡി പിടിച്ചെടുത്തിരുന്നു. ഇവ കൂടുതൽ ശാസ്ത്രീയ പരിശോധനകൾക്കായി കേന്ദ്ര ലാബിലേക്ക് അയച്ചിരിക്കുകയാണ്. ഒരു തരത്തിലുമുള്ള സമ്മർദ്ദങ്ങൾക്കും വഴങ്ങാതെ കേസ് അന്വേഷണം വേഗത്തിൽ പൂർത്തിയാക്കാനാണ് കൊച്ചി സോണൽ ഓഫീസിന് ഇഡി ഡയറക്ടറേറ്റ് നൽകിയിരിക്കുന്ന നിർദേശം. കരിമണൽ കമ്പനിയിലെ ജീവനക്കാരെയും വീണയെയും മുഖാമുഖം ഇരുത്തി ചോദ്യം ചെയ്യാനാണ് അന്വേഷണ സംഘത്തിന്റെ തീരുമാനം. അതേസമയം, കേന്ദ്ര ഏജൻസിയുടെ ഈ നീക്കങ്ങൾക്കെതിരെയും അന്വേഷണം തടയണമെന്നും ആവശ്യപ്പെട്ട് സിഎംആർഎൽ മാനേജ്മെന്റ് ഉടൻ തന്നെ വീണ്ടും ഹൈക്കോടതിയിൽ അപ്പീൽ നൽകുമെന്നാണ് വിവരം.
അതിനിടെ, തിരുവനന്തപുരത്തെ പിണറായി വിജയന്റെ വസതിയിൽ റെയ്ഡ് കഴിഞ്ഞ് മടങ്ങിയ ഇഡി സംഘത്തെ ആക്രമിച്ച കേസിൽ അറസ്റ്റിലായ 13 സിപിഎം പ്രവർത്തകരെ ഇന്ന് കോടതിയിൽ ഹാജരാക്കി റിമാൻഡ് ചെയ്യും. ഈ അക്രമ സംഭവവുമായി ബന്ധപ്പെട്ട് ഇതുവരെ 18 സിപിഎം പ്രവർത്തകരാണ് പോലീസിന്റെ പിടിയിലായിട്ടുള്ളത്. ഇതിനുപുറമെ, ഡിവൈഎഫ്ഐ സംസ്ഥാന പ്രസിഡന്റ് വസീഫ് ഉൾപ്പെടെയുള്ള 57 നേതാക്കൾക്കെതിരെ മെഡിക്കൽ കോളേജ് പോലീസ് കേസെടുത്തിട്ടുണ്ട്. എംഎൽഎ പി.എ. മുഹമ്മദ് റിയാസിന്റെ വീട്ടിൽ നടന്ന ഇഡി റെയ്ഡിൽ പ്രതിഷേധിച്ച് നിയമവിരുദ്ധമായി സംഘം ചേർന്നതിനും പൊതുഗതാഗതം തടസ്സപ്പെടുത്തിയതിനുമാണ് ഇവർക്കെതിരെ കേസെടുത്തിട്ടുള്ളത്.
