‘പിണറായിയുടെ കാലത്ത് 14 പ്രാവശ്യം കുടിയൊഴിപ്പിച്ചു, ചെറുവിരൽ അനക്കിയിട്ടില്ല; മലയിടംതുരുത്ത് എട്ട് കുടുംബങ്ങൾ വഴിയാധാരമാകില്ല, സർക്കാർ സംരക്ഷണമൊരുക്കും’-മുഖ്യമന്ത്രി

തിരുവനന്തപുരം: മലയിടംതുരുത്ത് കുടിയൊഴിപ്പിക്കലുമായി ബന്ധപ്പെട്ട് കോടതി കൂടുതൽ കർശന ഉത്തരവുകൾ പുറപ്പെടുവിച്ചാൽ പോലും അവിടെയുള്ള എട്ട് കുടുംബങ്ങൾ വഴിയാധാരമാകില്ലെന്ന് മുഖ്യമന്ത്രി വി.ഡി. സതീശൻ. പ്രതിസന്ധിയിലായ ഈ കുടുംബങ്ങൾക്ക് സർക്കാർ പൂർണ്ണ സംരക്ഷണമൊരുക്കുമെന്നും അദ്ദേഹം വ്യക്തമാക്കി. പത്ത് വർഷത്തോളം അധികാരത്തിൽ ഇരുന്നിട്ടും ഈ വിഷയത്തിൽ യാതൊരു ഇടപെടലും നടത്താത്ത മുൻ ഇടത് മന്ത്രിസഭയിലെ അംഗങ്ങൾ ഇപ്പോൾ സമരപ്പന്തലിൽ എത്തിയത് തന്നെ അത്ഭുതപ്പെടുത്തിയെന്നും അദ്ദേഹം പരിഹസിച്ചു. ഇന്ന് നടന്ന മന്ത്രിസഭാ യോഗത്തിന് ശേഷം മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.

മുഖ്യ തെരഞ്ഞെടുപ്പ് കമ്മീഷണർ രത്തൻ യു. ഖേൽക്കറെ മുഖ്യമന്ത്രിയുടെ സെക്രട്ടറിയായി നിയമിച്ച നടപടിയെയും അദ്ദേഹം പൂർണ്ണമായി ന്യായീകരിച്ചു. ഈ നിയമനത്തിൽ തെറ്റായൊന്നുമില്ലെന്നും ബംഗാളിലെ രാഷ്ട്രീയ സാഹചര്യമല്ല കേരളത്തിലുള്ളതെന്നും വി.ഡി. സതീശൻ കൂട്ടിച്ചേർത്തു.

“രത്തൻ ഖേൽക്കറെ നിയമിച്ചതുമായി ബന്ധപ്പെട്ട് എന്തിനാണ് വിവാദങ്ങൾ ഉണ്ടാക്കുന്നതെന്ന് മനസ്സിലാകുന്നില്ല. തികച്ചും സ്വാഭാവികമായ ഒരു ഭരണപരമായ നടപടി മാത്രമാണിത്. മന്ത്രിസഭാ യോഗത്തിൽ ഈ വിഷയം കൃത്യമായി വിശദീകരിച്ചിട്ടുണ്ട്. രമേശ് ചെന്നിത്തല അടക്കമുള്ള മന്ത്രിമാർ ഈ തീരുമാനത്തിന് പിന്തുണ അറിയിച്ചിട്ടുമുണ്ട്. പശ്ചിമ ബംഗാളിലെ പോലെയുള്ള സാഹചര്യമല്ല കേരളത്തിലേതെന്ന് ചിന്തിച്ചാൽ തന്നെ ഇപ്പോൾ ഉയർന്നുവന്ന വിവാദങ്ങൾ അവസാനിക്കും,” മുഖ്യമന്ത്രി വ്യക്തമാക്കി.

മുൻ ഇടത് സർക്കാരിന്റെ കാലത്ത് നോമിനേറ്റ് ചെയ്ത് കൊണ്ടുവന്ന ഉദ്യോഗസ്ഥൻ യുഡിഎഫിനെ അധികാരത്തിൽ വരാൻ സഹായിച്ചു എന്ന് ആരോപിക്കുന്നതിൽ വലിയ വൈരുധ്യമുണ്ടെന്നും അദ്ദേഹം ചൂണ്ടിക്കാട്ടി. “മികച്ച പ്രകടനത്തോടെ 102 സീറ്റുകൾ നേടി ഈ സർക്കാർ അധികാരത്തിൽ വന്നതിൽ അദ്ദേഹത്തിന് എന്താണ് പങ്ക്? അദ്ദേഹത്തിന്റെ മികച്ച ട്രാക്ക് റെക്കോർഡ് മാത്രം മുൻനിർത്തിയാണ് ഈ പദവിയിലേക്ക് നിയോഗിച്ചത്,” വി.ഡി. സതീശൻ പറഞ്ഞു. ദീർഘകാല പ്രവൃത്തിപരിചയമുള്ള ഉദ്യോഗസ്ഥനാണ് ഖേൽക്കറെന്നും സംസ്ഥാനത്തെ ജില്ലാ കളക്ടർമാരെ നിയമിച്ചത് സീനിയോറിറ്റി കൃത്യമായി പാലിച്ചാണെന്നും അദ്ദേഹം കൂട്ടിച്ചേർത്തു.

മലയിടംതുരുത്ത് വിഷയത്തിൽ മുൻ സർക്കാരിനെതിരെ രൂക്ഷമായ വിമർശനമാണ് മുഖ്യമന്ത്രി ഉന്നയിച്ചത്. “അവിടെയുള്ള കുടുംബങ്ങളെ ഒഴിപ്പിക്കാൻ 14 തവണ ശ്രമമുണ്ടായപ്പോൾ മുൻ സർക്കാർ എന്താണ് ചെയ്തത്? ഇത്തരം പ്രതിസന്ധി ഘട്ടങ്ങളിലൊന്നും ആ കുടുംബങ്ങളെ തിരിഞ്ഞുനോക്കാത്ത ഇടതുപക്ഷം, പ്രതിപക്ഷത്തായപ്പോൾ സമരപ്പന്തലിലേക്ക് ഓടിയെത്തുന്നത് എന്തുമാത്രം വിരോധാഭാസമാണ്! അവിടെ എന്ത് സംഭവിച്ചാലും ആ എട്ട് കുടുംബങ്ങളെ സർക്കാർ സംരക്ഷിക്കുക തന്നെ ചെയ്യും,” വി.ഡി. സതീശൻ ഉറപ്പുനൽകി.

എ.പി. അനിൽകുമാറിന്റെ മകന്റെ വിവാഹത്തിൽ പങ്കെടുക്കാൻ ഗുരുവായൂർ ക്ഷേത്രത്തിൽ എത്തിയതുമായി ബന്ധപ്പെട്ട് ഉയർന്ന വിവാദങ്ങൾക്കും മുഖ്യമന്ത്രി മറുപടി നൽകി. വെറും നാല് പേർക്കൊപ്പമാണ് താൻ ഗുരുവായൂരിൽ എത്തിയതെന്നും തന്റെ സന്ദർശനം കാരണം ഭക്തർക്ക് ദർശനം തടസ്സപ്പെട്ടിട്ടില്ലെന്നും അദ്ദേഹം വ്യക്തമാക്കി. ഗൺമാൻമാരുടെ മർദനവുമായി ബന്ധപ്പെട്ട വിഷയത്തിൽ പ്രത്യേക അന്വേഷണ സംഘത്തിന്റെ (SIT) റിപ്പോർട്ട് വന്നതിന് ശേഷം പ്രതികരിക്കാമെന്നും സതീശൻ പറഞ്ഞു. മുൻ സർക്കാരിന്റെ കാലത്ത് സസ്പെൻഷനിലായ ഉദ്യോഗസ്ഥരുടെ കാര്യം നിലവിൽ പരിശോധിച്ച് വരികയാണെന്നും മുനമ്പത്ത് രണ്ട് മതവിഭാഗങ്ങളെ തമ്മിലടിപ്പിക്കാനുള്ള ശ്രമങ്ങൾക്ക് കഴിഞ്ഞ സർക്കാർ കൂട്ടുനിന്നുവെന്നും മുഖ്യമന്ത്രി വി.ഡി. സതീശൻ ആരോപിച്ചു.