ദീദിയെ കേൾക്കാൻ ഒഴുകിയെത്തിയത് യുവജന സാഗരം; മമതയുടെ ശക്തിപ്രകടനമായി തൃണമൂൽ കോൺഗ്രസ് ഛാത്ര പരിഷത്ത് സ്ഥാപക ദിന റാലി | Mamata Banerjee TMCP Foundation Day Rally

കൊൽക്കത്ത: തൃണമൂൽ കോൺഗ്രസിന്റെ വിദ്യാർഥി വിഭാഗമായ തൃണമൂൽ കോൺഗ്രസ് ഛാത്ര പരിഷത്തിന്റെ (ടിഎംസിപി) സ്ഥാപക ദിന റാലിയിലേക്ക് ഒഴുകിയെത്തി യുവജനസാഗരം(Mamata Banerjee TMCP Foundation Day Rally). കൊൽക്കത്തയിലെ കത്തീഡ്രൽ റോഡിൽ സംഘടിപ്പിച്ച പരിപാടിയിലേക്ക് സംസ്ഥാനത്തിന്റെ വിവിധ ഭാഗങ്ങളിൽ നിന്നായി പതിനായിരക്കണക്കിന് വിദ്യാർഥികളും യുവജനങ്ങളുമാണ് ഒഴുകിയെത്തിയത്. പശ്ചിമ ബംഗാൾ മുൻ മുഖ്യമന്ത്രിയും തൃണമൂൽ അധ്യക്ഷയുമായ മമത ബാനർജിയുടെ കരുത്തും ഇളകാത്ത പാർട്ടി അടിത്തറയും അടിവരയിടുന്നതായിരുന്നു റാലി.

‘തെരുവിലുണ്ടാകും; തൃണമൂൽ ശക്തമായി തിരിച്ചുവരും’ | Mamata Banerjee TMCP Foundation Day Rally

തൃണമൂൽ കോൺഗ്രസ് അധികം വൈകാതെ അധികാരത്തിൽ തിരിച്ചെത്തുമെന്നും സംസ്ഥാനത്തെ ബിജെപി സർക്കാരിനെ താഴെയിറക്കുന്നത് വരെ താൻ എങ്ങോട്ടും പോകില്ലെന്നും ചടങ്ങിൽ മമത വ്യക്തമാക്കി. പ്രവർത്തകർ ഒട്ടും നിരാശപ്പെടേണ്ടതില്ലെന്നും വീണ്ടും ജനങ്ങളിലേക്ക് ഇറങ്ങി തെരുവിൽ പോരാട്ടം തുടരുമെന്നും അവർ വ്യക്തമാക്കി.

തെരഞ്ഞെടുപ്പ് അട്ടിമറിച്ചും വോട്ട് കൊള്ളയടിച്ചുമാണ് ബിജെപി സംസ്ഥാനത്ത് ഭരണം പിടിച്ചെടുത്തതെന്ന് മമത ബാനർജി ആരോപിച്ചു. സ്വന്തമായി സംഘടനാ ശേഷിയില്ലാത്ത ബിജെപി സർക്കാരും കേന്ദ്ര നേതൃത്വവും പോലീസിനെ ഉപയോഗിച്ചാണ് സംസ്ഥാനത്ത് രാഷ്ട്രീയ വേട്ടയാടലുകൾ നടത്തുന്നത്. പോലീസ് രാജിനെതിരെ നിയമപരമായും ജനാധിപത്യപരമായും ശക്തമായി പോരാടും. ഇതിന്റെ ഭാഗമായി ഉടൻ തന്നെ സംസ്ഥാനത്തെ എല്ലാ ജില്ലകളിലും പര്യടനം ആരംഭിക്കും. പൊതുപരിപാടികൾ നടത്താൻ പോലീസ് അനുമതി നൽകിയില്ലെങ്കിൽ കാൽനടയായി സഞ്ചരിച്ച് ജനങ്ങളിലേക്ക് എത്തുമെന്നും മമത വെല്ലുവിളിച്ചു.

കഴിഞ്ഞ കുറച്ചു മാസങ്ങൾക്കിടയിൽ തൃണമൂൽ പ്രവർത്തകർക്കെതിരെ പതിനാലായിരത്തോളം കേസുകൾ കെട്ടിച്ചമച്ചതായും ഇതിനെതിരെ സുപ്രീം കോടതിയെ സമീപിക്കുമെന്നും മമത വ്യക്തമാക്കി. സന്യാസം സ്വീകരിക്കാൻ ചിലർ തന്നെ ഉപദേശിക്കുന്നുണ്ട്. എന്നാൽ ബിജെപിയുടെ ജനവിരുദ്ധ ഭരണത്തിന് അറുതിവരുത്താതെ താൻ വിശ്രമിക്കില്ല വഞ്ചനയിലൂടെ അധികാരം പിടിച്ചെടുത്തതിന്റെ ചരിത്രം ഉടൻ തിരുത്തിക്കുറിക്കപ്പെടും. പാർട്ടി വിട്ടുപോയ വിമതർ അയോഗ്യരാക്കപ്പെടുന്നത് വെറും സമയത്തിന്റെ പ്രശ്‌നം മാത്രമാണെന്നും സംസ്ഥാനത്ത് വലിയ രാഷ്ട്രീയ മാറ്റം ആസന്നമാണെന്നും മമത ബാനർജി കൂട്ടിച്ചേർത്തു.

ആവേശം വിതറി വിദ്യാർഥി മുന്നേറ്റം | Mamata Banerjee TMCP Foundation Day Rally

തൃണമൂൽ കൊടികളും ദേശീയ പതാകകളും ഏന്തിയ വിദ്യാർഥികളാൽ കത്തീഡ്രൽ റോഡും പരിസരപ്രദേശങ്ങളും തിങ്ങിനിറഞ്ഞു. പൊതുവേദിക്ക് മുൻപിൽ തീർത്ത ബാരിക്കേഡുകൾ മറികടന്ന് പ്രവർത്തകർ വേദിക്ക് അരികിലേക്ക് ഇരച്ചെത്തുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചു. മമത ബാനർജിയുടെ ഒറ്റ ആഹ്വാനത്തിൽ ജനം ആവേശഭരിതരായി മുന്നേറുന്ന കാഴ്ചകൾ അവർക്ക് ജനങ്ങളോടുള്ള ആഴത്തിലുള്ള ആത്മബന്ധത്തിന്റെ തെളിവാണെന്ന് പാർട്ടി വൃത്തങ്ങൾ ചൂണ്ടിക്കാട്ടി.

തൃണമൂലിനെ തകർക്കാൻ നടക്കുന്ന ശ്രമങ്ങൾക്ക് ജനങ്ങൾ നൽകിയ ശക്തമായ മറുപടിയാണ് ഈ മഹാറാലിയെന്ന് തൃണമൂൽ കോൺഗ്രസ് രാജ്യസഭാ എംപി സാഗരിക ഘോഷ് പറഞ്ഞു. സമാനതകളില്ലാത്ത ജനപിന്തുണയാണ് റാലിയിൽ പ്രകടമായതെന്നും ബംഗാളിൽ തൃണമൂൽ ശക്തമായ തിരിച്ചുവരവിന്റെ പാതയിലാണെന്നും അവർ വ്യക്തമാക്കി. ബിജെപി കേന്ദ്ര ഏജൻസികളെ ഉപയോഗിച്ചും മറ്റ് കുതന്ത്രങ്ങളിലൂടെയും തെരഞ്ഞെടുപ്പ് ഫലങ്ങളെ അട്ടിമറിക്കാൻ ശ്രമിച്ചാലും ബംഗാളിലെ ജനങ്ങളുടെ വിശ്വാസം നേടാൻ അവർക്കാവില്ലെന്ന് സാഗരിക ഘോഷ് കൂട്ടിച്ചേർത്തു. എത്രയൊക്കെ ആക്രമണങ്ങൾ നടത്തിയാലും ബംഗാൾ വീണ്ടും വിജയിക്കുമെന്ന മുദ്രാവാക്യവും അവർ ഉയർത്തി.

അതിനിടെ, പരിപാടി കൽക്കട്ട ഹൈക്കോടതി ഉത്തരവുകൾ ലംഘിച്ചെന്ന പരാതിയിൽ മമത ബാനർജിക്കെതിരെ കൊൽക്കത്ത പോലീസ് സ്വമേധയാ കേസെടുത്തു. മമതയെ കൂടാതെ പരിപാടിയുടെ സംഘാടകരെയും പ്രതി ചേർത്താണ് ഹേസ്റ്റിങ്‌സ് പോലീസ് സ്റ്റേഷനിൽ എഫ്‌ഐആർ രജിസ്റ്റർ ചെയ്തിരിക്കുന്നത്. കോടതി നിർദേശിച്ച മാനദണ്ഡങ്ങൾ പാലിക്കാതെ പരിപാടി സംഘടിപ്പിക്കുകയും ക്രമസമാധാന പ്രശ്‌നങ്ങൾ ഉണ്ടാക്കുകയും ചെയ്തുവെന്ന സബ് ഇൻസ്‌പെക്ടർ അപ്പു ബൈദ്യയുടെ പരാതിയിലാണ് നടപടി.

റാലിയിൽ ആളുകളെ പണം നൽകി എത്തിച്ചതാണെന്ന ആരോപണവുമായി പ്രതിപക്ഷം രംഗത്തെത്തിയെങ്കിലും, പങ്കെടുത്ത യുവജനങ്ങളുടെ ആവേശവും ജനസാഗരത്തിന്റെ ദൃശ്യങ്ങളും തൃണമൂലിന്റെ ശക്തമായ യുവജന അടിത്തറയെയാണ് വ്യക്തമാക്കുന്നത്. രാഷ്ട്രീയ പ്രതിസന്ധികളെയും വെല്ലുവിളികളെയും അതിജീവിച്ച് വിദ്യാർഥി-യുവജന സമൂഹത്തിനിടയിൽ തങ്ങളുടെ സ്വീകാര്യത അരക്കിട്ടുറപ്പിക്കാൻ ഈ റാലിയിലൂടെ തൃണമൂൽ കോൺഗ്രസിന് സാധിച്ചുവെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.