യുദ്ധം കടുക്കുന്നു: ഹോർമുസ് കടലിടുക്കിൽ 16 ഇറാനിയൻ മൈൻ നിക്ഷേപ ബോട്ടുകൾ തകർത്ത് യുഎസ്
വാഷിങ്ടൺ: ഹോർമുസ് കടലിടുക്കിന് സമീപം മൈനുകൾ നിക്ഷേപിക്കാൻ തയ്യാറെടുക്കുകയായിരുന്ന 16 ഇറാനിയൻ ബോട്ടുകൾ തകർത്തതായി അമേരിക്ക. ലോകത്തെ എണ്ണ കയറ്റുമതിയുടെ 20 ശതമാനവും കടന്നുപോകുന്ന തന്ത്രപ്രധാനമായ ജലപാതയിൽ ഇറാൻ സ്ഫോടകവസ്തുക്കൾ സ്ഥാപിക്കുന്നത് തടയാനാണ് ആക്രമണമെന്ന് യുഎസ് സൈന്യം അറിയിച്ചു. ഇതോടെ മേഖലയിൽ സംഘർഷം അതീവ ഗുരുതരാവസ്ഥയിലേക്ക് നീങ്ങുകയാണ്.
ഇറാനിലെ സൈനിക കേന്ദ്രങ്ങൾ ലക്ഷ്യമിട്ട് ഇതുവരെയുള്ളതിൽ വച്ച് ഏറ്റവും ശക്തമായ ആക്രമണങ്ങൾ ഇന്നലെ നടന്നതായി യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് വ്യക്തമാക്കി. ഇറാന്റെ മിസൈൽ ശേഖരം, ലോഞ്ചറുകൾ, നാവികസേന എന്നിവ നശിപ്പിക്കുക എന്ന ലക്ഷ്യത്തോടെയാണ് നീക്കം. അതേസമയം, ഹോർമുസ് കടലിടുക്കിൽ ഇറാൻ മൈനുകൾ സ്ഥാപിച്ചതായി നിലവിൽ റിപ്പോർട്ടുകളൊന്നുമില്ലെന്ന് പ്രസിഡന്റ് ഡൊണാൾഡ് ട്രംപ് സോഷ്യൽ മീഡിയയിലൂടെ അറിയിച്ചു. എങ്കിലും, എണ്ണ കയറ്റുമതി തടയാൻ ശ്രമിച്ചാൽ ഇതുവരെ കണ്ടിട്ടില്ലാത്ത വിധം തിരിച്ചടി നേരിടേണ്ടി വരുമെന്ന് ട്രംപ് ഇറാനു മുന്നറിയിപ്പ് നൽകി.
യുദ്ധം 11-ാം ദിവസത്തിലേക്ക് കടന്നതോടെ ഇരുപക്ഷവും വാഗ്വാദങ്ങൾ കടുപ്പിച്ചിരിക്കുകയാണ്. തങ്ങളെ ഇല്ലാതാക്കാൻ ആർക്കും കഴിയില്ലെന്ന് ഇറാൻ സുരക്ഷാ ഉദ്യോഗസ്ഥൻ അലി ലാരിജാനി തിരിച്ചടിച്ചു. ഏറ്റുമുട്ടലിൽ ഇതുവരെ ഇറാനിൽ 1,230 പേരും ലെബനനിൽ 480-ലധികം പേരും കൊല്ലപ്പെട്ടതായാണ് കണക്കുകൾ. ഇസ്രയേൽ, ഇറാഖ്, യുഎഇ, ബഹ്റൈൻ എന്നിവിടങ്ങളിലും ആക്രമണങ്ങൾ റിപ്പോർട്ട് ചെയ്തിട്ടുണ്ട്. ഹോർമുസ് കടലിടുക്കിലെ അനിശ്ചിതത്വം ആഗോള വിപണിയിൽ എണ്ണവില വർധനവിന് കാരണമായിട്ടുണ്ട്. സ്ഥിതിഗതികൾ നിരീക്ഷിക്കാൻ അന്താരാഷ്ട്ര ഊർജ്ജ ഏജൻസി ജി7 രാജ്യങ്ങളുമായി ചർച്ചകൾ ആരംഭിച്ചു.
