ഇടഞ്ഞോ അബ്ദുറഹ്മാന്? സ്ഥാനാര്ഥി പ്രഖ്യാപനം വന്ന് മൂന്ന് ദിവസം കഴിഞ്ഞിട്ടും പ്രചാരണത്തിന് ഇറങ്ങിയില്ല
താനൂർ: എൽഡിഎഫ് സ്വതന്ത്ര സ്ഥാനാർത്ഥിയായി പ്രഖ്യാപിക്കപ്പെട്ട് മൂന്ന് ദിവസം പിന്നിട്ടിട്ടും മണ്ഡലത്തിൽ പ്രചാരണത്തിനിറങ്ങാതെ മന്ത്രി വി അബ്ദുറഹ്മാൻ. ഞായറാഴ്ച സിപിഎം സ്ഥാനാർത്ഥി പട്ടിക പുറത്തുവിട്ടെങ്കിലും, സോഷ്യൽ മീഡിയയിൽ പോലും അദ്ദേഹം ഇതുവരെ പ്രചാരണം ആരംഭിച്ചിട്ടില്ലാത്തത് രാഷ്ട്രീയ കേന്ദ്രങ്ങളിൽ വലിയ ചർച്ചകൾക്ക് വഴിവെച്ചിരിക്കുകയാണ്.
താനൂരിൽ വീണ്ടും മത്സരിക്കാൻ താല്പര്യമില്ലെന്ന് അബ്ദുറഹ്മാൻ നേരത്തെ തന്നെ പാർട്ടി നേതൃത്വത്തെ അറിയിച്ചിരുന്നതായാണ് വിവരം. ഇത്തവണ തിരൂർ മണ്ഡലത്തിലേക്ക് മാറാനായിരുന്നു അദ്ദേഹം ആഗ്രഹിച്ചിരുന്നത്. എന്നാൽ പാർട്ടി വീണ്ടും താനൂർ തന്നെ നൽകിയതിൽ അദ്ദേഹത്തിന് നീരസമുണ്ടെന്നാണ് സൂചനകൾ. മറ്റ് മണ്ഡലങ്ങളിലെ സ്ഥാനാർത്ഥികൾ പ്രഖ്യാപനത്തിന് പിന്നാലെ റോഡ് ഷോകളും കൺവെൻഷനുകളുമായി സജീവമായപ്പോഴും അബ്ദുറഹ്മാൻ വിട്ടുനിൽക്കുന്നത് പ്രാദേശിക നേതൃത്വത്തെയും ആശയക്കുഴപ്പത്തിലാക്കുന്നുണ്ട്.
യുഡിഎഫ് സ്ഥാനാർത്ഥിയായി എംഎസ്എഫ് സംസ്ഥാന പ്രസിഡന്റ് പി.കെ നവാസ് ഇതിനോടകം മണ്ഡലത്തിൽ പ്രചാരണം ശക്തമാക്കിക്കഴിഞ്ഞു. ഈ സാഹചര്യത്തിൽ ഇടത് സ്ഥാനാർത്ഥിയുടെ മൗനം വരും ദിവസങ്ങളിൽ വലിയ രാഷ്ട്രീയ നീക്കങ്ങൾക്ക് കാരണമായേക്കാം.
