നിലയ്ക്കാതെ മിസൈൽ വർഷം; തെൽ അവീവിലെ ബെൻ ഗുരിയൻ വിമാനത്താവളം അടച്ചു, സർവീസുകൾ റദ്ദാക്കി
തെൽ അവീവ്: പശ്ചിമേഷ്യയിൽ യുദ്ധം രൂക്ഷമാകുന്നതിനിടെ ഇസ്രയേലിന്റെ വ്യോമഗതാഗതം പൂർണമായും സ്തംഭിച്ചു. തലസ്ഥാനമായ തെൽ അവീവിലെ ബെൻ ഗുരിയൻ അന്താരാഷ്ട്ര വിമാനത്താവളം ലക്ഷ്യമാക്കി ഇറാൻ തുടർച്ചയായി മിസൈലുകൾ തൊടുത്തുവിട്ടതിനെത്തുടർന്ന് വിമാനത്താവളത്തിന്റെ പ്രവർത്തനം അടിയന്തരമായി നിർത്തിവെച്ചിരിക്കുകയാണ്. നിലവിലെ സാഹചര്യത്തിൽ ഏപ്രിൽ 16 വരെ വിമാനത്താവളം അടച്ചിടുമെന്ന് ഇസ്രയേൽ അധികൃതർ അറിയിച്ചു. ഇസ്രയേലിലെ ഏറ്റവും വലിയ വിമാനത്താവളം കൂടിയാണ് ബെൻ ഗുരിയൻ.
ചൊവ്വാഴ്ച രാത്രി മുതൽ ഇറാന്റെ ഭാഗത്തുനിന്നുണ്ടായ ശക്തമായ മിസൈൽ ആക്രമണങ്ങളാണ് വിമാനത്താവളത്തിന്റെ പ്രവർത്തനം അവതാളത്തിലാക്കിയത്. തെൽ അവീവിനും പരിസര പ്രദേശങ്ങൾക്കും നേരെ നൂറുകണക്കിന് മിസൈലുകളാണ് ഇറാൻ വിക്ഷേപിച്ചത്. വിമാനത്താവളത്തിന് തൊട്ടടുത്ത പ്രദേശങ്ങളിൽ മിസൈലുകൾ പതിച്ചതായും റൺവേയ്ക്കും മറ്റ് സാങ്കേതിക സംവിധാനങ്ങൾക്കും നാശനഷ്ടങ്ങൾ സംഭവിക്കാൻ സാധ്യതയുള്ളതിനാലുമാണ് വിമാനത്താവളം അടച്ചിടാൻ തീരുമാനിച്ചതെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്തു.
വിമാനത്താവളം അടച്ചതോടെ ആയിരക്കണക്കിന് യാത്രക്കാരാണ് ഇസ്രയേലിൽ കുടുങ്ങിക്കിടക്കുന്നത്. അന്താരാഷ്ട്ര വിമാനക്കമ്പനികൾ ഇസ്രയേലിലേക്കുള്ള സർവീസുകൾ നേരത്തെ തന്നെ റദ്ദാക്കിയിരുന്നു. നിലവിൽ ഇസ്രയേലിന്റെ ഏക വിദേശ ബന്ധം കൂടിയാണ് ഇതോടെ വിച്ഛേദിക്കപ്പെട്ടിരിക്കുന്നത്. ഏപ്രിൽ 16 വരെ വിമാനത്താവളം അടച്ചിടാനുള്ള തീരുമാനം ഇസ്രയേലിന്റെ സാമ്പത്തിക മേഖലയ്ക്കും വലിയ തിരിച്ചടിയാകും.
ഇസ്രയേലിന്റെ തന്ത്രപ്രധാന കേന്ദ്രങ്ങൾ ലക്ഷ്യമിട്ടാണ് ഇറാൻ പ്രത്യാക്രമണം നടത്തുന്നത്. നേരത്തെ ഇസ്രയേലിലെ പ്രധാന വൈദ്യുതി നിലയത്തിന് നേരെയും ആക്രമണമുണ്ടായിരുന്നു. ഇതിന് പിന്നാലെയാണ് വിമാനത്താവളം കൂടി ലക്ഷ്യം വെച്ചിരിക്കുന്നത്.
അതേസമയം, അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നോട്ടുവെച്ച സമാധാന നിർദേശങ്ങൾ ഇറാൻ തള്ളുകയും ചെയ്തു. യുദ്ധം പുതിയ തലത്തിലേക്ക് കടക്കുമ്പോൾ ഇസ്രയേലിന്റെ പ്രതിരോധ കവചങ്ങളിൽ വിള്ളൽ വീഴുന്നത് ആഗോളതലത്തിൽ വലിയ ചർച്ചയായിരിക്കുകയാണ്.
