മലപ്പുറത്ത് ജനൽ തുറന്നിട്ട് ഉറങ്ങിയ യുവതിയുടെ പാദസരം കവർന്നു; നാലര ലക്ഷം രൂപയുടെ സ്വർണം മോഷ്ടാവ് മുറിച്ചെടുത്തു
മലപ്പുറം: കടുത്ത ചൂട് കാരണം ജനൽ തുറന്നിട്ട് ഉറങ്ങിയ യുവതിയുടെ സ്വർണപാദസരം മോഷ്ടിച്ചു. മലപ്പുറം വണ്ടൂർ അക്കരുപ്പറ സ്വദേശിനി നജ്ലയുടെ നാലര ലക്ഷം രൂപ വിലമതിക്കുന്ന മൂന്നേമുക്കാൽ പവൻ്റെ പാദസരമാണ് കവർന്നത്. ഇന്ന് പുലർച്ചെയായിരുന്നു സംഭവം.
ചൂട് മൂലം ജനൽ തുറന്നിട്ടാണ് നജ്ല ഉറങ്ങിയിരുന്നത്. ഉറക്കത്തിനിടെ വലതുകാലിൽ വേദന അനുഭവപ്പെട്ട് ഉണർന്ന നജ്ല, മോഷ്ടാവ് ജനലിനരികിൽ നിൽക്കുന്നത് കണ്ട് ബഹളം വെച്ചു. വീട്ടുകാർ ഓടിയെത്തിയപ്പോഴേക്കും പ്രതി പാദസരവുമായി കടന്നുകളഞ്ഞു. സംഭവസമയത്ത് ഏഴോളം പേർ വീട്ടിലുണ്ടായിരുന്നു.
വിവരമറിഞ്ഞ് സ്ഥലത്തെത്തിയ പോലീസ് പ്രാഥമിക അന്വേഷണം നടത്തി. ഡോഗ് സ്ക്വാഡും വിരലടയാള വിദഗ്ധരും സ്ഥലത്തെത്തി തെളിവുകൾ ശേഖരിച്ചിട്ടുണ്ട്. പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ച് പ്രതിക്കായി പോലീസ് അന്വേഷണം ഊർജിതമാക്കി.
