വിരമിച്ചിട്ടും കാറിൽ ‘ത്രീ സ്റ്റാർ’; മുൻ ഡിജിപി ടോമിൻ തച്ചങ്കരിക്കെതിരെ അന്വേഷണത്തിന് ഉത്തരവ്

തിരുവനന്തപുരം: സർവീസിൽ നിന്ന് വിരമിച്ച് മൂന്ന് വർഷം പിന്നിട്ടിട്ടും ഔദ്യോഗിക പദവി സൂചിപ്പിക്കുന്ന നക്ഷത്രങ്ങൾ വാഹനത്തിൽ ഉപയോഗിച്ച സംഭവത്തിൽ മുൻ ഡിജിപി ടോമിൻ തച്ചങ്കരിക്കെതിരെ അന്വേഷണത്തിന് ഉത്തരവിട്ടു. ഡിജിപി നൽകിയ നിർദേശത്തെത്തുടർന്ന് പരാതി അന്വേഷണത്തിനായി കോട്ടയം എസ്പിക്ക് കൈമാറി. പ്രാഥമിക അന്വേഷണം നടത്തിയ ശേഷമാണ് നടപടി.

കോട്ടയം വിജിലൻസ് കോടതിയിൽ എത്തിയപ്പോഴാണ് തച്ചങ്കരിയുടെ സ്വകാര്യ വാഹനത്തിൽ മൂന്ന് നക്ഷത്രങ്ങളുള്ള ബോർഡ് ശ്രദ്ധയിൽപ്പെട്ടത്. ബോർഡ് തുണികൊണ്ട് മറച്ച നിലയിലായിരുന്നു. എന്നാൽ കവർ നീക്കിയപ്പോൾ നക്ഷത്രങ്ങൾ വ്യക്തമായി. അതേസമയം, താൻ ത്രീ സ്റ്റാർ ബോർഡ് വെച്ച് യാത്ര ചെയ്തിട്ടില്ലെന്നും ബോർഡ് മറച്ച നിലയിലായിരുന്നു എന്നുമാണ് തച്ചങ്കരിയുടെ വിശദീകരണം.