യു.പിയിൽ സോപ്പുപൊടിയും സോയ ഓയിലും ചേർത്ത് വ്യാപകമായി വ്യാജ പാൽ നിർമാണം; മിനിറ്റുകൾക്കുള്ളിൽ 20 ലിറ്റർ പാൽ 80 ലിറ്ററാകും! വൻ തട്ടിപ്പ് പുറത്ത് | Fake Milk Factory Exposed in UP

ലഖ്നൗ: ഉത്തർപ്രദേശിൽ അലക്കുപൊടിയും(ഡിറ്റർജന്റ്) സോയ ഓയിലും ഉപയോഗിച്ച് വൻതോതിൽ വ്യാജ സിന്തറ്റിക് പാൽ നിർമിച്ച് വിതരണം ചെയ്യുന്ന വൻ മാഫിയയുടെ വിവരങ്ങൾ പുറത്ത്(Fake Milk Factory Exposed in UP). ദേശീയ മാധ്യമമായ ‘ദൈനിക് ഭാസ്‌കർ’ സംഘം നടത്തിയ ഒളികാമറാ ഓപറേഷനിലാണ് വ്യാജ പാൽ നിർമാണത്തിന്റെ ഞെട്ടിക്കുന്നതും ഭയപ്പെടുത്തുന്നതുമായ വിവരങ്ങൾ വെളിപ്പെട്ടത്. വെറും 20 ലിറ്റർ ശുദ്ധമായ പാൽ മിനിറ്റുകൾക്കുള്ളിൽ 80 ലിറ്റർ വ്യാജ പാലാക്കി മാറ്റുന്ന വിദ്യയാണ് തട്ടിപ്പ് സംഘം കാമറയ്ക്ക് മുന്നിൽ ലൈവായി ചെയ്ത് കാണിച്ചത്. ഉത്തർപ്രദേശിലെ ഗ്രാമീണ മേഖലകൾ കേന്ദ്രീകരിച്ച് ഇത്തരം വ്യാജ പാൽ ഫാക്ടറികൾ വ്യാപകമായി പ്രവർത്തിക്കുന്നുണ്ടെന്നാണ് പുറത്തുവരുന്ന വിവരങ്ങൾ.

മിനിറ്റുകൾക്കുള്ളിൽ 20 ലിറ്റർ പാൽ 80 ലിറ്ററാകും; നിർമാണ രീതി ഇങ്ങനെ
മാധ്യമപ്രവർത്തകരുടെ ഒളികാമറയ്ക്ക് മുന്നിൽ യാതൊരു ഭയവുമില്ലാതെയാണ് വ്യാജ പാൽ നിർമിക്കുന്നയാൾ ഇതിന്റെ ഫോർമുല വിവരിച്ചത്. സാധാരണക്കാരെ പൂർണമായും ഭയപ്പെടുത്തുന്നതാണ് നിർമാണ പ്രക്രിയ. ആദ്യ ഘട്ടത്തിൽ വലിയ പാത്രത്തിൽ കുറച്ചു സോയ ഓയിലും അലക്കുപൊടിയും ഒരുമിച്ച് ചേർക്കും. ഇത് കൈകൊണ്ട് നന്നായി തിരുമ്മി വെളുത്ത നിറത്തിലുള്ള ഒരു മിശ്രിതമാക്കി മാറ്റും.

പിന്നീട് ഈ വെളുത്ത പേസ്റ്റിലേക്ക് ഏകദേശം 60 ലിറ്റർ വെള്ളം ഒഴിച്ച് നന്നായി കലർത്തുന്നു. സോപ്പുപൊടിയുടെ സാന്നിധ്യം കാരണം വെള്ളം പൂർണമായും പാലിന്റെ നിറത്തിലേക്ക് മാറുകയും മുകളിൽ പത വരികയും ചെയ്യും. ഈ വെള്ളത്തിലേക്ക് കൃത്യം 20 ലിറ്റർ മാത്രം ശുദ്ധമായ പശുവിൻ പാലോ എരുമപ്പാലോ ചേർക്കും. യഥാർത്ഥ പാലിന്റെ മണവും രുചിയും ലഭിക്കാൻ വേണ്ടിയാണ് ഈ 20 ലിറ്റർ പാൽ ഉപയോഗിക്കുന്നത്.

വെറും വെള്ളവും അലക്കുപൊടിയും ചേർത്തതിനാൽ ഈ പാലിന് കട്ടി കുറവായിരിക്കും. പാലിന്റെ സാന്ദ്രത വർധിപ്പിക്കുന്നതിനായി ഇതിലേക്ക് രണ്ട് കിലോ ഗ്ലൂക്കോസ് അല്ലെങ്കിൽ ശർക്കരപ്പൊടി ചേർക്കും. ഒടുവിൽ പാൽ കൂടുതൽ കട്ടിയുള്ളതാക്കാൻ സ്‌കിമ്ഡ് മിൽക്ക് പൗഡറും കൂടി ചേർക്കുന്നതോടെ യഥാർത്ഥ പാലിനെ വെല്ലുന്ന 80 ലിറ്റർ കൃത്രിമ പാൽ(സിന്തറ്റിക് പാൽ) മിനിറ്റുകൾക്കുള്ളിൽ തയ്യാറാകും.

‘ഡിഫറൻസ് കാ ദൂത്’: പരിശോധനകളെ വെട്ടിക്കുന്ന തന്ത്രം
ഈ അധോലോക വ്യവസായത്തിൽ വ്യാജ പാലിനെ ‘ഡിഫറൻസ് കാ ദൂത്’ എന്നാണ് കോഡ് വേർഡായി വിളിക്കുന്നത്. സാധാരണ ഡയറി ഫാമുകളിലോ സർക്കാർ സംവിധാനങ്ങളിലോ നടത്തുന്ന പരിശോധനകളിൽ ഈ പാൽ വ്യാജനാണെന്ന് കണ്ടെത്താൻ കഴിയില്ല എന്നതാണ് ഏറ്റവും അപകടകരമായ വസ്തുത.

ഇതിൽ ചേർക്കുന്ന ഗ്ലൂക്കോസ് കാരണം പാലിന് അമിത മധുരം വരാതിരിക്കാൻ പ്രത്യേക കെമിക്കലുകൾ ഇവർ ഇതിൽ ഉപയോഗിക്കുന്നുണ്ട്. കൂടാതെ ലാബുകളിൽ ടെസ്റ്റ് ചെയ്യുമ്പോൾ പാലിന്റെ ഗുണനിലവാരം അളക്കുന്ന കൊഴുപ്പ്, എസ്.എൻ.എഫ് എന്നിവ കൃത്യമായ അളവിൽ കാണിക്കാൻ കെമിക്കലുകളുടെ അളവ് ഇവർ കൃത്യമായി ക്രമീകരിക്കുന്നു. അതുകൊണ്ട് തന്നെ ലാബ് പരിശോധനകളിൽ പോലും ഈ പാൽ എളുപ്പത്തിൽ ‘പാസായി’ വിപണിയിലേക്ക് എത്തുന്നു. ഉത്തർപ്രദേശിൽ മാത്രം പ്രതിദിനം ഏകദേശം 135 കോടി രൂപയുടെ വ്യാജ പാൽ ഇത്തരത്തിൽ വിപണിയിൽ വിറ്റഴിയുന്നുണ്ടെന്നാണ് ഈ രംഗത്തുള്ളവർ വെളിപ്പെടുത്തുന്നത്.

ആരോഗ്യത്തിന് അതീവ മാരകം; കാത്തിരിക്കുന്നത് മാരക രോഗങ്ങൾ
ഭക്ഷണ പദാർഥങ്ങളിൽ ചേർക്കാൻ പാടില്ലാത്ത മാരകമായ രാസവസ്തുക്കളാണ് ഈ സിന്തറ്റിക് പാലിൽ അടങ്ങിയിരിക്കുന്നത്. ഡോക്ടർമാരുടെയും ആരോഗ്യ വിദഗ്ധരുടെയും അഭിപ്രായത്തിൽ ഈ പാൽ നിരന്തരം ഉപയോഗിക്കുന്നത് മനുഷ്യശരീരത്തിന് അതീവ മാരകമാണ്.

ഈ കൃത്രിമ പാൽ ദീർഘനേരം കേടുവരാതിരിക്കാൻ ഇതിൽ ‘ഫോർമാലിൻ’ എന്ന മാരക കെമിക്കൽ ചേർക്കുന്നുണ്ട്. മൃതദേഹങ്ങൾ കേടുകൂടാതെ സൂക്ഷിക്കാൻ ഉപയോഗിക്കുന്ന ഫോർമാലിൻ മനുഷ്യശരീരത്തിൽ കാൻസറിന് കാരണമാകുന്ന പ്രധാന ഘടകമാണ്.

അലക്കുപൊടി ചേർത്ത പാൽ കുടിക്കുന്നത് മനുഷ്യന്റെ കേന്ദ്ര നാഡീവ്യൂഹത്തെ സാരമായി ബാധിക്കുകയും ഗുരുതരമായ തലച്ചോർ രോഗങ്ങൾക്ക് കാരണമാകുകയും ചെയ്യും. ഇതിൽ ചേർക്കുന്ന അന്നജം, കാസ്റ്റിക് സോഡ എന്നിവ മനുഷ്യന്റെ ദഹനപ്രക്രിയയെ പൂർണമായും തകിടം മറിക്കുന്നു. ഇത് വിട്ടുമാറാത്ത വയറിളക്കം, അൾസർ എന്നിവയ്ക്ക് കാരണമാകുന്നു.

കെമിക്കലുകളുടെ അമിത സാന്നിധ്യം മനുഷ്യന്റെ ലിവർ, കിഡ്‌നി എന്നിവയുടെ പ്രവർത്തനത്തെ പൂർണമായും തകരാറിലാക്കുന്നു. മുതിർന്നവരെ അപേക്ഷിച്ച് കുട്ടികളിലാണ് ഈ വിഷപ്പാൽ ഏറ്റവും കൂടുതൽ ആഘാതം സൃഷ്ടിക്കുന്നത്. കുട്ടികളുടെ വളർച്ചയെ ഇത് സാരമായി ബാധിക്കും.

ഉത്തർപ്രദേശിലെ ഈ വലിയ തട്ടിപ്പ് ശൃംഖലയുടെ ദൃശ്യങ്ങൾ പുറത്തുവന്നതോടെ വലിയ രീതിയിലുള്ള പ്രതിഷേധവും ആശങ്കയുമാണ് ജനങ്ങളിൽ ഉണ്ടായിരിക്കുന്നത്. ജനങ്ങളുടെ ജീവൻ വെച്ച് പന്താടുന്ന ഇത്തരം മാഫിയകൾക്കെതിരെ കർശനമായ നിയമനടപടികൾ സ്വീകരിക്കണമെന്നും സംസ്ഥാന വ്യാപകമായി ഡയറികളിൽ പരിശോധന ശക്തമാക്കണമെന്നുമാണ് പൊതുജനങ്ങളുടെ ആവശ്യം.