ഇപ്പോൾ ലോക്സഭാ തെരഞ്ഞെടുപ്പ് നടന്നാൽ എൻഡിഎ 326 സീറ്റ് നേടുമെന്ന് സർവേ റിപ്പോർട്ട് | Mood of the Nation Survey Predicts NDA Win

ന്യൂഡൽഹി: രാജ്യത്ത് ഇപ്പോൾ പൊതുതെരഞ്ഞെടുപ്പ് നടക്കുകയാണെങ്കിൽ പ്രധാനമന്ത്രി നരേന്ദ്ര മോദി നയിക്കുന്ന എൻഡിഎ സഖ്യം വീണ്ടും വൻ ഭൂരിപക്ഷത്തോടെ അധികാരത്തിലെത്തുമെന്ന് പ്രവചനം(Mood of the Nation Survey Predicts NDA Win). ‘ഇന്ത്യ ടുഡേ’യും ‘സി വോട്ടറും’ സംയുക്തമായി നടത്തിയ ഏറ്റവും പുതിയ ‘മൂഡ് ഓഫ് ദി നേഷൻ’ (എംഒടിഎൻ) സർവേയാണ് ബിജെപി മുന്നണിക്ക് വൻ ഭൂരിപക്ഷം പ്രവചിക്കുന്നത്. ഇന്ന് തെരഞ്ഞെടുപ്പ് നടന്നാൽ 543 അംഗ ലോക്സഭയിൽ ഭരണകക്ഷിയായ എൻഡിഎ 326 സീറ്റുകൾ നേടി വ്യക്തമായ ആധിപത്യം ഉറപ്പിക്കും. പ്രതിപക്ഷ പാർട്ടികളുടെ വിശാല സഖ്യമായ ‘ഇൻഡ്യ’ മുന്നണിക്ക് 185 സീറ്റുകൾ മാത്രമാണ് സർവേ പ്രവചിക്കുന്നത്. മറ്റ് കക്ഷികൾക്കും സ്വതന്ത്രർക്കുമായി 32 സീറ്റുകൾ ലഭിച്ചേക്കാം. 2024-ലെ ലോക്സഭാ തെരഞ്ഞെടുപ്പിൽ എൻഡിഎ നേടിയ 293 സീറ്റുകളേക്കാൾ മികച്ച മുന്നേറ്റമാണ് നിലവിലെ രാഷ്ട്രീയ സാഹചര്യത്തിൽ സഖ്യത്തിന് പ്രവചിക്കപ്പെടുന്നത്.

കരുത്തു കൂട്ടുകയാണോ എൻഡിഎ? | Mood of the Nation Survey Predicts NDA Win

2024-ലെ പൊതുതെരഞ്ഞെടുപ്പ് പ്രചാരണ വേളയിൽ പ്രധാനമന്ത്രി നരേന്ദ്ര മോദി ഉയർത്തിയ ‘400 പാർ’ എന്ന മുദ്രാവാക്യത്തിൽനിന്ന് സർവേ ഫലത്തിലെ കണക്കുകൾ ഏറെ അകലെയാണെങ്കിലും, വോട്ടർമാർക്കിടയിൽ ഭരണമുന്നണിയോടുള്ള വിശ്വാസ്യതയ്ക്ക് തെല്ലും മങ്ങലേറ്റിട്ടില്ലെന്നാണ് കണ്ടെത്തലുകൾ വ്യക്തമാക്കുന്നത്. എന്നാൽ, 2029-ലെ പൊതുതെരഞ്ഞെടുപ്പിലേക്ക് രാജ്യം നീങ്ങുമ്പോൾ യുവതലമുറയെയും ‘ജെൻ സി’ വോട്ടർമാരെയും ഒപ്പം നിർത്തുകയെന്ന വലിയ രാഷ്ട്രീയ വെല്ലുവിളി ഭരണപക്ഷത്തിന് മുന്നിലുണ്ട്. സമീപകാലത്ത് തലസ്ഥാനത്തെ ജന്തർ മന്ദിറിൽ അരങ്ങേറിയ വിദ്യാർഥി പ്രക്ഷോഭങ്ങൾ ഇന്ത്യൻ രാഷ്ട്രീയത്തിൽ വലിയ വഴിത്തിരിവാകുമെന്ന വിലയിരുത്തലുകൾ ശക്തമായിരുന്നെങ്കിലും, മോദി സർക്കാരിന്റെ ഭരണനേതൃത്വത്തിലുള്ള ജനപ്രീതി ഇപ്പോഴും സുരക്ഷിതമാണെന്ന് അടിവരയിടുന്നതാണ് സർവേയിലെ കണക്കുകൾ.

കഴിഞ്ഞ ജനുവരിയിലെ മൂഡ് ഓഫ് ദി നേഷൻ സർവേയിൽ എൻഡിഎയ്ക്ക് 352 സീറ്റുകൾ വരെ പ്രവചിച്ചിരുന്നിടത്തുനിന്നാണ് നിലവിലെ 326 സീറ്റുകളിലേക്കുള്ള നേരിയ കുറവ്. എങ്കിലും കേവലഭൂരിപക്ഷത്തിന് ആവശ്യമായ 272 എന്ന മാന്ത്രിക സംഖ്യയെക്കാൾ ഏറെ മുന്നിലാണ് സഖ്യം. അതേസമയം 2024-ൽ 234 സീറ്റുകൾ വരെ നേടിയ പ്രതിപക്ഷ സഖ്യത്തിന് സർവേ ഫലങ്ങൾ നിരാശ നൽകുന്നതാണ്. ഉത്തർപ്രദേശ് അടക്കമുള്ള ചില സംസ്ഥാനങ്ങളിൽ പ്രതിപക്ഷം കടുത്ത മത്സരം കാഴ്ചവയ്ക്കുമ്പോഴും ബംഗാൾ, മഹാരാഷ്ട്ര തുടങ്ങിയ വലിയ സംസ്ഥാനങ്ങളിൽ എൻഡിഎ നില മെച്ചപ്പെടുത്തുമെന്നാണ് സൂചന. ഭരണവിരുദ്ധ വികാരങ്ങളെയെല്ലാം മറികടന്ന് ദേശീയതലത്തിൽ നരേന്ദ്ര മോദിയുടെ സ്വാധീനം ശക്തമായി തുടരുന്നുവെന്ന് വ്യക്തമാക്കുന്നതാണ് ഈ സർവേ ഫലം.

ജെൻ സികൾക്കും ഇളക്കാനാകില്ലേ മോദി പ്രഭാവം? | Mood of the Nation Survey Predicts NDA Win

പ്രധാനമന്ത്രി നരേന്ദ്ര മോദിയുടെ ജനപ്രീതി ഇപ്പോഴും രാജ്യത്ത് ശക്തമായി തുടരുന്നുവെന്നാണ് സർവേ സൂചിപ്പിക്കുന്നത്. മൂന്നാം തവണയും അധികാരത്തിലേറിയ എൻഡിഎ സർക്കാരിന്റെ നയങ്ങൾക്കും ഭരണനേതൃത്വത്തിനും പൊതുജനങ്ങൾക്കിടയിൽ ഇപ്പോഴും ശക്തമായ സ്വീകാര്യതയുണ്ട്. പ്രത്യേകിച്ചും വിദ്യാർഥി പ്രക്ഷോഭവത്തിനു ശേഷം മോദി വിരുദ്ധ വികാരം പുതിയ തലമുറയിൽ ശക്തമാണെന്ന വിലയിരുത്തലുകൾ വരുന്ന ഘട്ടത്തിലാണ് ഇങ്ങനെയൊരു അഭിപ്രായ സർവേ വരുന്നത്. ജെൻ സി രോഷത്തിലും ഇളകാതെ മോദി പ്രഭാവം തുടരുന്നുവെന്നാണ് സർവേ സൂചിപ്പിക്കുന്നത്.

ഭരണവിരുദ്ധ വികാരത്തെയും വിവിധ സാമ്പത്തിക-സാമൂഹിക വിഷയങ്ങളെയും അതിജീവിച്ച് നരേന്ദ്ര മോദിയുടെ നേതൃത്വം രാജ്യത്ത് പ്രബലമായി തുടരുന്നുവെന്ന് അടിവരയിടുന്നതാണ് ഏറ്റവും പുതിയ മൂഡ് ഓഫ് ദി നേഷൻ സർവേ ഫലം(Mood of the Nation Survey Predicts NDA Win).