സ്പെയിനിൽ അതിവേഗ ട്രെയിനുകൾ കൂട്ടിയിടിച്ചു വൻ ദുരന്തം: 40 മരണം
കൊർഡോബ: തെക്കൻ സ്പെയിനിലെ കോർഡോബ പ്രവിശ്യയിലുണ്ടായ അതിഭീകരമായ ട്രെയിൻ അപകടത്തിൽ കുറഞ്ഞത് 40 പേർ കൊല്ലപ്പെട്ടു. 120-ലധികം പേർക്ക് പരിക്കേറ്റതായാണ് പ്രാഥമിക വിവരം. ഞായറാഴ്ച വൈകുന്നേരം ആദംമുസ് നഗരത്തിനടുത്ത് രണ്ട് അതിവേഗ ട്രെയിനുകൾ തമ്മിൽ കൂട്ടിയിടിച്ചാണ് പതിറ്റാണ്ടിനിടയിലെ സ്പെയിനിലെ ഏറ്റവും വലിയ റെയിൽവേ ദുരന്തമുണ്ടായത്.
അപകടം ഇങ്ങനെ
ഞായറാഴ്ച രാത്രി പ്രാദേശിക സമയം 7:45-ഓടെയാണ് അപകടമുണ്ടായത്. മലാഘയിൽ നിന്ന് മാഡ്രിഡിലേക്ക് പോവുകയായിരുന്ന ഇറിയോ കമ്പനിയുടെ ട്രെയിൻ പാളം തെറ്റിയതാണ് ദുരന്തത്തിന് തുടക്കമിട്ടത്. എട്ട് കോച്ചുകളുള്ള ഈ ട്രെയിനിന്റെ അവസാനത്തെ രണ്ട് ബോഗികൾ പാളത്തിൽ നിന്ന് തെന്നിമാറി തൊട്ടടുത്ത ട്രാക്കിലേക്ക് വീണു. ഈ സമയം മാഡ്രിഡിൽ നിന്ന് ഹുവൽവയിലേക്ക് വരികയായിരുന്ന റെൻഫെ അൽവിയ എന്ന ട്രെയിൻ ഈ ബോഗികളിലേക്ക് ഇടിച്ചു കയറുകയായിരുന്നു.
ഇടിയുടെ ആഘാതത്തിൽ റെൻഫെ ട്രെയിനിന്റെ മുൻ ബോഗികൾ അഞ്ച് മീറ്റർ താഴ്ചയുള്ള ഒരു ബണ്ടിലേക്ക് മറിഞ്ഞു.
പ്രാഥമിക അന്വേഷണം
പാളത്തിലെ ജോയിന്റുകളിൽ ഉണ്ടായ തകരാറാണ് അപകടത്തിന് കാരണമെന്നാണ് പ്രാഥമിക നിഗമനം. ട്രാക്കിലെ ഒരു വിടവ് ശ്രദ്ധയിൽപ്പെട്ടതായും ഇത് ഇറിയോ ട്രെയിൻ പാളം തെറ്റാൻ കാരണമായെന്നും വിദഗ്ധർ വിലയിരുത്തുന്നു. അപകടം നടന്ന സ്ഥലം റെയിൽവേ ട്രാക്കിലെ വളവില്ലാത്ത ഭാഗമാണെന്നും അവിടെ ഇത്തരമൊരു അപകടം സംഭവിച്ചത് അസാധാരണമാണെന്നും സ്പാനിഷ് ഗതാഗത മന്ത്രി ഓസ്കാർ പ്യൂന്റെ പറഞ്ഞു.
തകർന്ന ബോഗികൾക്കിടയിൽ ഇനിയും ആളുകൾ കുടുങ്ങിക്കിടക്കാൻ സാധ്യതയുള്ളതിനാൽ മരണസംഖ്യ ഇനിയും ഉയർന്നേക്കാമെന്ന് അധികൃതർ മുന്നറിയിപ്പ് നൽകി.
ആദംമുസിലെ പ്രാദേശിക നിവാസികളാണ് ആദ്യം രക്ഷാപ്രവർത്തനത്തിന് എത്തിയത്. ആംബുലൻസുകൾ എത്തുന്നതിന് മുൻപ് തന്നെ നാട്ടുകാർ തങ്ങളുടെ സ്വകാര്യ വാഹനങ്ങളിൽ പരിക്കേറ്റവരെ ആശുപത്രികളിൽ എത്തിച്ചു. മരിച്ചവരിൽ ഒരു പോലീസ് ഉദ്യോഗസ്ഥനും മാധ്യമപ്രവർത്തകരും ഒരു സംഗീത പരിപാടി കഴിഞ്ഞ് മടങ്ങിയ കുടുംബവും ഉൾപ്പെടുന്നു.
ദേശീയ ദുഃഖാചരണം
പ്രധാനമന്ത്രി പെഡ്രോ സാഞ്ചസ് തിങ്കളാഴ്ച അപകടസ്ഥലം സന്ദർശിച്ചു. അപകടത്തിന്റെ യഥാർത്ഥ കാരണം കണ്ടെത്താൻ സമഗ്രമായ അന്വേഷണം നടത്തുമെന്ന് അദ്ദേഹം ഉറപ്പ് നൽകി. ദുരന്തത്തിന്റെ പശ്ചാത്തലത്തിൽ ചൊവ്വാഴ്ച മുതൽ രാജ്യത്ത് മൂന്ന് ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചു. സ്പെയിനിലെ ദേശീയ പതാകകൾ പകുതി താഴ്ത്തിക്കെട്ടും.
2013-ൽ സാന്റിയാഗോ ഡി കമ്പോസ്റ്റേലയിൽ 79 പേരുടെ മരണത്തിനിടയാക്കിയ അപകടത്തിന് ശേഷം സ്പെയിൻ കണ്ട ഏറ്റവും വലിയ റെയിൽവേ ദുരന്തമാണിത്. നിലവിൽ 48 പേർ ആശുപത്രിയിൽ ചികിത്സയിലാണ്, ഇതിൽ 12 പേരുടെ നില അതീവ ഗുരുതരമായി തുടരുന്നു.
