കേരളം യുഡിഎഫ് തൂക്കും; ഭരണമാറ്റം പ്രവചിച്ച് എക്‌സിറ്റ് പോള്‍ ഫലങ്ങള്‍

തിരുവനന്തപുരം: നിയമസഭാ തെരഞ്ഞെടുപ്പിന്റെ ഫലം വരാൻ മണിക്കൂറുകൾ മാത്രം ബാക്കിനിൽക്കെ, കേരളത്തിൽ യുഡിഎഫിന്റെ മുന്നേറ്റം പ്രവചിച്ച് എക്‌സിറ്റ് പോൾ ഫലങ്ങൾ. പ്രമുഖ സർവേ ഏജൻസികളെല്ലാം തന്നെ യുഡിഎഫ് അധികാരത്തിൽ വരുമെന്ന് പ്രവചിക്കുമ്പോൾ, എൽഡിഎഫിന് ഭരണത്തുടർച്ചയുണ്ടാകില്ലെന്ന സൂചനകളാണ് പുറത്തുവരുന്നത്. ഐക്യ ജനാധിപത്യ മുന്നണിക്ക് 78 മുതൽ 90 വരെ സീറ്റ് ലഭിക്കുമെന്നാണ് ആക്‌സിസ് മൈ ഇന്ത്യ പ്രവചിക്കുന്നത്. ഇഞ്ചോടിഞ്ച് പോരാട്ടം പ്രവചിക്കുന്ന ഏജൻസികളുമുണ്ട്.

ആക്‌സിസ് മൈ ഇന്ത്യ: യുഡിഎഫിന് വൻ മുന്നേറ്റം
ഏറ്റവും ശ്രദ്ധേയമായ പ്രവചനം നടത്തിയത് ആക്‌സിസ് – മൈ ഇന്ത്യ ആണ്. യുഡിഎഫിന് 78 മുതൽ 90 സീറ്റുകൾ വരെ ലഭിക്കുമെന്നാണ് ഇവരുടെ കണ്ടെത്തൽ. അതേസമയം, നിലവിലെ ഭരണകക്ഷിയായ എൽഡിഎഫ് 49-62 സീറ്റുകളിലേക്ക് ഒതുങ്ങുമെന്നും എൻഡിഎ മൂന്നു വരെ സീറ്റുകൾ ഒരുപക്ഷേ നേടുമെന്നും ഇവർ പ്രവചിക്കുന്നു. ഒരു ‘യുഡിഎഫ് തരംഗം’ തന്നെ കേരളത്തിൽ ആഞ്ഞടിക്കുമെന്നാണ് ഏജൻസിയുടെ കണക്കുകൾ വ്യക്തമാക്കുന്നത്.

പ്രധാന സർവേ ഫലങ്ങൾ ഒരൊറ്റനോട്ടത്തിൽ

| ഏജൻസി | യുഡിഎഫ് | എൽഡിഎഫ് | എൻഡിഎ |
ആക്‌സിസ് – മൈ ഇന്ത്യ | 78 – 90 | 49 – 62 | 00 – 03 |
പീപ്പിൾസ് പൾസ് | 75 – 85 | 55 – 65 | 00 – 03 |
എൻഡിടിവി | 75 – 85| 55 – 65 | 00 – 03 |
ടൈംസ് നൗ-ജെവിസി | 72 – 84 | 52 – 61 | 03 – 07 |

മറ്റ് സർവേകളും യുഡിഎഫിനൊപ്പം
പീപ്പിൾസ് പൾസും എൻഡിടിവിയും സമാനമായ ഫലങ്ങളാണ് പുറത്തുവിട്ടിരിക്കുന്നത്. ഇരു സർവേകളും യുഡിഎഫിന് 75 മുതൽ 85 സീറ്റുകൾ വരെ ലഭിക്കുമെന്ന് പ്രവചിക്കുന്നു. എൽഡിഎഫ് പരമാവധി 65 സീറ്റുകളിൽ ഒതുങ്ങാനാണ് സാധ്യതയെന്നും ഇവർ വിലയിരുത്തുന്നു.

ടൈംസ് നൗ പുറത്തുവിട്ട കണക്കുകൾ പ്രകാരം യുഡിഎഫ് 72-84 സീറ്റുകളുമായി നേരിയ ഭൂരിപക്ഷത്തിൽ അധികാരത്തിലെത്തും. എൻഡിഎയ്ക്ക് മറ്റ് ഏജൻസികളെ അപേക്ഷിച്ച് കൂടുതൽ നേട്ടം (3-7 സീറ്റുകൾ) ടൈംസ് നൗ പ്രവചിക്കുന്നുണ്ട്.

കേരളത്തിൽ യുഡിഎഫ് തരംഗം പ്രകടമാണെന്നാണ് ഭൂരിഭാഗം എക്‌സിറ്റ് പോളുകളും അടിവരയിടുന്നത്. ഭരണവിരുദ്ധ വികാരം വോട്ടായി മാറിയെന്നാണ് പ്രാഥമിക വിലയിരുത്തൽ.