ഹമാസ് ആക്രമണത്തിന്റെ ഇരയെന്ന് അവകാശപ്പെട്ട് സഹതാപം പിടിച്ചുപറ്റി; പാർക്കിലും ഫ്‌ളാറ്റിലും യുവതിയെ ബലാത്സംഗം ചെയ്ത് ഇസ്രയേൽ യുവാവ് | Petah Tikva rape case

തെൽ അവീവ്: ഒക്ടോബർ 7 ആക്രമണത്തിന്റെ ഇരയാണെന്ന് അവകാശപ്പെട്ട് യുവതിയുടെ സഹതാപം പിടിച്ചുപറ്റി യുവതിയെ ക്രൂരമായി പീഡിപ്പിച്ച് ഇസ്രയേൽ യുവാവ്(Petah Tikva rape case). വീടിനുള്ളിൽ അതിക്രമിച്ചുകയറിയായിരുന്നു ലൈംഗിക പീഡനവും അതിക്രമവും. സംഭവത്തിൽ ഇസ്രയേലിലെ പെത തിക്വ സ്വദേശിയായ അദിയേൽ എലിയാഹു മൈക്കിൾ കോഹനെതിരെ ഇസ്രയേൽ സെൻട്രൽ ഡിസ്ട്രിക്ട് കോടതിയിൽ കുറ്റപത്രം സമർപ്പിച്ചു. ഗുരുതരമായ ബലാത്സംഗം, ലൈംഗികാതിക്രമം, അതിക്രമിച്ചു കയറൽ തുടങ്ങിയ കുറ്റങ്ങൾ ചുമത്തിയാണ് 22കാരനെതിരെ കേസ് രജിസ്റ്റർ ചെയ്തതെന്ന് ‘ജെറുസലേം പോസ്റ്റ്’ റിപ്പോര്‍ട്ട് ചെയ്തു.

സെൻട്രൽ ഡിസ്ട്രിക്ട് അറ്റോർണി ഓഫീസിലെ അറ്റോർണി താലി കെരറ്റ് ആണ് പ്രതിക്കെതിരായ കുറ്റപത്രം കോടതിയിൽ സമർപ്പിച്ചത്. തീർത്തും അപരിചിതയായ യുവതിയെ പിന്തുടർന്ന് ശല്യപ്പെടുത്തുകയും, അവരുടെ വിസമ്മതങ്ങളെ പൂർണമായി അവഗണിച്ച് ലൈംഗികമായി അതിക്രമിക്കുകയും, ഒടുവിൽ രാജ്യത്തെ പിടിച്ചുകുലുക്കിയ ഒരു ദുരന്തത്തിന്റെ പേര് പറഞ്ഞ് വീടിനുള്ളിൽ കടന്നുകയറി ക്രൂരമായി പീഡിപ്പിക്കുകയും ചെയ്ത സംഭവത്തിന്റെ വിവരങ്ങളാണ് പ്രോസിക്യൂഷൻ കോടതിക്ക് മുന്നിൽ നിരത്തിയത്.

രാത്രി സമയത്തെ കൂടിക്കാഴ്ചയും ബലപ്രയോഗവും | Petah Tikva rape case

പ്രോസിക്യൂഷൻ കോടതിയിൽ സമർപ്പിച്ച രേഖകൾ പ്രകാരം, ഏതാനും ആഴ്ചകൾക്ക് മുൻപാണു സംഭവങ്ങളുടെ തുടക്കം. രാത്രി പെത തിക്വയിലെ തെരുവിൽ വളർത്തുനായയുമായി നടക്കാനിറങ്ങിയതായിരുന്നു പരാതിക്കാരിയായ യുവതി. ഈ സമയത്താണ് പ്രതിയായ അദിയേൽ എലിയാഹു മൈക്കിൾ കോഹൻ യുവതിയെ കാണുന്നതും സ്വയം പരിചയപ്പെടുത്തുന്നതും.

യുവതിയോട് സംസാരിച്ചു തുടങ്ങിയ കോഹൻ, സമീപത്തുള്ള പാർക്കിലേക്ക് ഒപ്പം നടക്കാൻ ആവശ്യപ്പെട്ടു. എന്നാൽ, അപരിചിതനായ ഒരാളോട് സംസാരിക്കാൻ താൽപര്യമില്ലെന്നും തനിക്ക് ഒറ്റയ്ക്ക് നടക്കാനാണ് ഇഷ്ടമെന്നും യുവതി വ്യക്തമാക്കി. എങ്കിലും പ്രതി ഇത് വകവയ്ക്കാതെ യുവതിയെ പിന്തുടർന്നു. നടക്കുന്നതിനിടയിൽ, യുവതിയുടെ വ്യക്തിപരമായ ജീവിതത്തെക്കുറിച്ചും ലൈംഗിക ചുവയുള്ളതുമായ ചോദ്യങ്ങൾ ചോദിച്ച് പ്രതി അവരെ അസ്വസ്ഥയാക്കാൻ തുടങ്ങി.

യുവതി തുടർച്ചയായി എതിർപ്പ് പ്രകടിപ്പിച്ചിട്ടും പ്രതി അവരുടെ കൈയിൽ ബലമായി പിടിക്കുകയും കെട്ടിപ്പിടിക്കാൻ ശ്രമിക്കുകയും ചെയ്തു. തനിക്ക് ശാരീരികമായ യാതൊരുവിധ സമ്പർക്കവും താൽപര്യമില്ലെന്ന് യുവതി പലതവണ വ്യക്തമാക്കിയിട്ടും പ്രതി പിന്മാറാൻ തയാറായില്ല. പീഡനശ്രമങ്ങൾക്ക് പുറമെ, യുവതി രക്ഷപ്പെടാതിരിക്കാനുള്ള തന്ത്രങ്ങളും പ്രതി പയറ്റി. യുവതിയുടെ കൈയിലുണ്ടായിരുന്ന വളർത്തുനായയുടെ ചങ്ങല ബലമായി അഴിച്ചുമാറ്റിയ പ്രതി, തുടർന്ന് അവരുടെ മൊബൈൽ ഫോൺ കൈക്കലാക്കി. യുവതിയുടെ ഫോണിൽനിന്ന് സ്വന്തം നമ്പറിലേക്ക് മിസ്ഡ് കോൾ അടിച്ച്, അവരുടെ ഫോൺ നമ്പർ സ്വന്തം ഫോണിൽ സേവ് ചെയ്യുകയും ചെയ്തു. തുടർന്നാണ് ഇവരെ അടുത്തുള്ള പാർക്കിലെ പുൽത്തകിടിയിൽ ഇരുത്താൻ പ്രതി നിർബന്ധിച്ചത്.

പാർക്കിലെ അതിക്രമങ്ങൾ | Petah Tikva rape case

മൊബൈൽ ഫോണും വളർത്തുനായയും പ്രതിയുടെ നിയന്ത്രണത്തിലായതോടെ ഭയന്ന യുവതി പാർക്കിൽ ഇരിക്കാൻ നിർബന്ധിതയായി. പാർക്കിൽ വച്ച് പ്രതി യുവതിയെ ബലമായി അടുത്തേക്ക് വലിച്ചിഴയ്ക്കുകയും അവരുടെ ശരീരത്തിൽ അനാവശ്യമായി സ്പർശിക്കുകയും ഉമ്മവയ്ക്കാൻ ശ്രമിക്കുകയും ചെയ്തു. പ്രതിയുടെ നീക്കങ്ങളിൽ ഭയന്ന യുവതി, തനിക്ക് ഇയാളിൽ യാതൊരു താൽപര്യവുമില്ലെന്നും തന്നിൽനിന്ന് അകന്നുനിൽക്കണമെന്നും അപേക്ഷിച്ചു.

തുടർന്ന്, തന്റെ ഫ്‌ലാറ്റിലേക്ക് വരാൻ പ്രതി ആവശ്യപ്പെട്ടെങ്കിലും യുവതി അത് ശക്തമായി നിരസിച്ചു. ഏറെ ബുദ്ധിമുട്ടി പ്രതിയുടെ പിടിയിൽനിന്ന് രക്ഷപ്പെട്ട യുവതി, സ്വന്തം ഫ്‌ലാറ്റിലേക്ക് മടങ്ങി. എന്നാൽ, ഭയം അവിടെയും അവസാനിച്ചില്ല. യുവതി വീട്ടിലെത്തിയ ഉടൻ തന്നെ, പാർക്കിൽ വച്ച് കൈക്കലാക്കിയ ഫോൺ നമ്പർ ഉപയോഗിച്ച് പ്രതി അവരെ ഫോണിൽ വിളിക്കാൻ തുടങ്ങി.

ഫ്‌ലാറ്റിലേക്ക് വരാൻ അനുവദിക്കണമെന്ന് പ്രതി വീണ്ടും ആവശ്യപ്പെട്ടെങ്കിലും യുവതി അതിന് വഴങ്ങിയില്ല. താൻ തനിച്ചാണെന്നും അപരിചിതരായ ആളുകളെ വീട്ടിൽ കയറ്റാറില്ലെന്നും അവർ വ്യക്തമാക്കി. എന്നാൽ ഇതോടെ പ്രതി ഒരു പുതിയ തന്ത്രം മെനഞ്ഞു.

‘നോവ മ്യൂസിക് ഫെസ്റ്റിവൽ’ ഇരവാദം | Petah Tikva rape case

യുവതിയുടെ മനസ്സിൽ സഹതാപം വളർത്താനായി പ്രതി താൻ 2023 ഒക്ടോബർ 7-ന് ഹമാസ് നടത്തിയ ‘നോവ മ്യൂസിക് ഫെസ്റ്റിവൽ’ ആക്രമണത്തിൽനിന്ന് തലനാരിഴയ്ക്ക് രക്ഷപ്പെട്ട അതിജീവിതനാണെന്ന് അവകാശപ്പെട്ടു. ഇസ്രയേൽ സമൂഹത്തിൽ നോവ ഫെസ്റ്റിവലിൽ ആക്രമണം നേരിട്ടവരോടും അതിജീവിച്ചവരോടും വലിയ രീതിയിലുള്ള മാനുഷിക അനുഭാവവും വൈകാരികമായ ഐക്യദാർഢ്യവുമുണ്ട്. ഈ വൈകാരിക പശ്ചാത്തലത്തെ പ്രതി തന്റെ സ്വാർത്ഥവും ക്രൂരവുമായ ആവശ്യത്തിനായി ദുരുപയോഗം ചെയ്യുകയായിരുന്നു.

ഹമാസ് നടത്തിയ ആക്രമണത്തിൽ നൂറുകണക്കിന് യുവാക്കൾ കൊല്ലപ്പെടുകയും അനേകർക്ക് പരിക്കേൽക്കുകയും ചെയ്ത നോവ ഫെസ്റ്റിവലിന്റെ അതിജീവിതനാണ് പ്രതിയെന്ന് കേട്ടതോടെ, യുവതിയുടെ മനസ്സിൽ മാനുഷിക പരിഗണനയും സഹതാപവും തോന്നി. ഇത്രയും വലിയൊരു ദുരന്തം അതിജീവിച്ച ഒരാളോട് ക്രൂരമായി പെരുമാറേണ്ടതില്ലെന്ന് കരുതിയ യുവതി, ഫ്‌ലാാറ്റിലേക്ക് കയറ്റില്ലെന്നും എന്നാൽ കെട്ടിടത്തിന്റെ താഴത്തെ നിലയിൽ വച്ച് ഏതാനും മിനിറ്റ് സംസാരിക്കാമെന്നും സമ്മതിച്ചു.

കടന്നുകയറ്റവും തെളിവ് നശിപ്പിക്കൽ നീക്കങ്ങളും | Petah Tikva rape case

താഴത്തെ നിലയിലേക്ക് ഇറങ്ങാനായി യുവതി തന്റെ ഫ്‌ലാറ്റിന്റെ വാതിൽ തുറന്നപ്പോൾ കണ്ടത് ഞെട്ടിക്കുന്ന കാഴ്ചയായിരുന്നു. താഴെ കാത്തുനിൽക്കാമെന്ന് പറഞ്ഞ പ്രതി, അതിനകം തന്നെ യുവതി താമസിക്കുന്ന നിലയിലെത്തി വാതിലിന് പുറത്ത് നിലയുറപ്പിച്ചിട്ടുണ്ടായിരുന്നു.

അപകടം മണത്ത യുവതി പെട്ടെന്ന് തന്നെ വാതിൽ അടയ്ക്കാൻ ശ്രമിച്ചെങ്കിലും, പ്രതി തന്റെ കാൽ വാതിലിടയിൽ ബലമായി വെച്ച് വാതിൽ അടയുന്നത് തടഞ്ഞു. തുടർന്ന് യുവതിയുടെ എതിർപ്പുകളെല്ലാം തള്ളിമാറ്റി ബലമായി ഫ്‌ലാറ്റിനുള്ളിലേക്ക് അതിക്രമിച്ചു കയറി.

വീട്ടിനുള്ളിൽ കടന്ന പ്രതി, പുറത്തുനിന്നുള്ള ആരും സംഭവം കാണാതിരിക്കാൻ വളരെ കൃത്യമായ തയ്യാറെടുപ്പുകൾ നടത്തി. തെരുവിൽ നിന്നോ അയൽപക്കങ്ങളിൽ നിന്നോ ഫ്‌ലാറ്റിനുള്ളിലേക്ക് കാഴ്ച ലഭിക്കാതിരിക്കാൻ, വീട്ടിനുള്ളിലുണ്ടായിരുന്ന ഒരു സോഫ വലിച്ചിഴച്ച് ബാൽക്കണിക്ക് കുറുകെ ഇട്ടു. കൂടാതെ, അവിടെയുണ്ടായിരുന്ന ഒരു ഇൻഫ്‌ലേറ്റബിൾ സ്വിമ്മിങ് പൂൾ (വായു നിറയ്ക്കാവുന്ന പൂൾ) പ്രത്യേക രീതിയിൽ വെച്ച് ബാൽക്കണിയിലെ കാഴ്ച പൂർണമായും മറച്ചു. തുടർന്നാണു പ്രതി തന്റെ ക്രൂരമായ അതിക്രമത്തിലേക്ക് കടന്നത്.

ക്രൂരമായ പീഡനം | Petah Tikva rape case

കാഴ്ചകൾ പൂർണ്ണമായി മറച്ചതിന് ശേഷം, പ്രതി യുവതിയുടെ അരക്കെട്ടിൽ ബലമായി പിടിച്ച് തന്റെ മടിയിലേക്ക് വലിച്ചിരുത്തി. യുവതി സർവശക്തിയുമെടുത്ത് പ്രതിരോധിക്കാനും കൈകാലുകൾ ഇട്ടടിച്ച് രക്ഷപ്പെടാനും ശ്രമിച്ചെങ്കിലും കായികമായി ശക്തി കുറഞ്ഞ യുവതിയെ പ്രതി കീഴ്‌പ്പെടുത്തി.

യുവതി കരഞ്ഞു അപേക്ഷിച്ചിട്ടും ഒച്ചവച്ചിട്ടും പ്രതി അതൊന്നും വകവെച്ചില്ല. തുടർന്ന് പ്രതി യുവതിയെ ഭീഷണിപ്പെടുത്തുകയും, അവരെ ബലമായി വായടപ്പിച്ച് ലൈംഗിക പീഡനത്തിന് ഇരയാക്കുകയും ചെയ്തു. യുവതിയുടെ തുടർച്ചയായ വിസമ്മതങ്ങളെയും എതിർപ്പുകളെയും പൂർണമായി തള്ളിക്കളഞ്ഞ പ്രതി അവരെ ക്രൂരമായി ബലാത്സംഗം ചെയ്യുകയായിരുന്നു.

കുറ്റകൃത്യം പൂർത്തിയാക്കിയ ശേഷം, പ്രതി ചെയ്ത ക്രൂരതയ്ക്ക് യാതൊരു പശ്ചാത്താപവുമില്ലാതെ യുവതിയോട് മാപ്പ് പറയുകയും, അതിക്രമം ‘ആസ്വദിച്ചോ’ എന്ന് തിരികെ ചോദിക്കുകയും ചെയ്തതായി കുറ്റപത്രത്തിൽ പറയുന്നു. പ്രതിയുടെ ഈ പെരുമാറ്റം അയാളുടെ ക്രൂരമായ മനോവൈകൃതത്തെയാണ് കാണിക്കുന്നതെന്ന് പ്രോസിക്യൂഷൻ നിരീക്ഷിച്ചു.

നിയമനടപടികളും പ്രോസിക്യൂഷന്റെ വാദങ്ങളും | Petah Tikva rape case

സംഭവത്തിന് ശേഷം ഭയചകികതയായ യുവതി അധികൃതരെ വിവരമറിയിക്കുകയായിരുന്നു. തുടർന്ന് പെത തിക്വ പോലീസ് നടത്തിയ അന്വേഷണത്തിൽ അദിയേൽ എലിയാഹു മൈക്കിൾ കോഹനെ അറസ്റ്റ് ചെയ്തു. ചോദ്യം ചെയ്യലിലും തെളിവെടുപ്പിലും പ്രതിക്കെതിരെ ശക്തമായ തെളിവുകൾ ലഭിച്ചതിനെ തുടർന്ന് കേസ് സെൻട്രൽ ഡിസ്ട്രിക്ട് അറ്റോർണി ഓഫീസിന് കൈമാറി.

കോടതിയിൽ കുറ്റപത്രം സമർപ്പിച്ചതിനൊപ്പം, വിചാരണ നടപടികൾ പൂർത്തിയാകുന്നതുവരെ പ്രതിയെ കസ്റ്റഡിയിൽ തന്നെ നിലനിർത്തണമെന്ന് അറ്റോർണി താലി കെരറ്റ് ആവശ്യപ്പെട്ടു. പ്രതിക്ക് ജാമ്യം അനുവദിക്കുന്നത് സമൂഹത്തിന്, പ്രത്യേകിച്ച് സ്ത്രീകൾക്ക് വലിയ ഭീഷണിയാണെന്ന് പ്രോസിക്യൂഷൻ റിമാൻഡ് ഹരജിയിൽ ചൂണ്ടിക്കാട്ടി.

പ്രതിക്ക് മുൻപരിചയമില്ലാത്ത ഒരു യുവതിയെ ലക്ഷ്യമിട്ടാണ് ഈ ആക്രമണം നടത്തിയതെന്ന് പ്രോസിക്യൂഷൻ ചൂണ്ടിക്കാട്ടി. ഇത് പ്രതിയുടെ അക്രമസ്വഭാവത്തെ വ്യക്തമാക്കുന്നു. ആദ്യ കൂടിക്കാഴ്ച മുതൽ ആക്രമണം നടന്ന നിമിഷം വരെ യുവതി തനിക്ക് താൽപര്യമില്ലെന്ന് വാക്കാൽ പലതവണ വ്യക്തമാക്കിയിട്ടും പ്രതി അത് വകവച്ചില്ല. കാഴ്ച മറയ്ക്കുന്നതിനായി സോഫയും ഇൻഫ്‌ലേറ്റബിൾ പൂളും ഉപയോഗിച്ച രീതി പ്രതി കുറ്റകൃത്യം മുൻകൂട്ടി ആസൂത്രണം ചെയ്‌തെന്നാണു കാണിക്കുന്നത്.

ഇതിനു പുറമെ നോവ സംഗീതോത്സവ അതിജീവിതനാണെന്ന വ്യാജ അവകാശവാദം ഉന്നയിച്ച് ഇരയുടെ മാനുഷിക പരിഗണനയെയും കാരുണ്യത്തെയും ചൂഷണം ചെയ്തത് കുറ്റകൃത്യത്തിന്റെ ഗുരുതരാവസ്ഥ വർധിപ്പിക്കുന്നതായും പ്രോസിക്യൂഷൻ ചൂണ്ടിക്കാട്ടി.