ബിജെപി വിട്ട് നടൻ ദേവൻ; വൈസ് പ്രസിഡന്റ് സ്ഥാനവും പ്രാഥമിക അംഗത്വവും രാജിവെച്ചു

ആലപ്പുഴ: ബി.ജെ.പി സംസ്ഥാന വൈസ് പ്രസിഡന്റും നടനുമായ ദേവൻ പാർട്ടിയിൽ നിന്ന് രാജിവെച്ചു. പാർട്ടി വൈസ് പ്രസിഡന്റ് സ്ഥാനവും പ്രാഥമിക അംഗത്വവും ഉപേക്ഷിച്ചതായി കണച്ചിക്കുളങ്ങര ദേവീ ക്ഷേത്രത്തിൽ നടന്ന ചടങ്ങിലാണ് അദ്ദേഹം പരസ്യമായി പ്രഖ്യാപിച്ചത്. വെള്ളാപ്പള്ളി നടേശൻ, ബി.ജെ.പി നേതാവ് രാധാകൃഷ്ണ മേനോൻ എന്നിവരെ വേദിയിലിരുത്തിയായിരുന്നു അദ്ദേഹത്തിന്റെ പ്രഖ്യാപനം.

“ആ വൈസ് പ്രസിഡന്റ് സ്ഥാനവും ഭാരതീയ ജനതാ പാർട്ടിയുടെ പ്രാഥമിക അംഗത്വവും രാജിവെക്കാനുള്ള രാജിക്കത്ത് ഞാൻ എഴുതി വെച്ചിരിക്കുന്നു. ജയ്ഹിന്ദ് ജയഗുരുദേവ്” എന്ന് ദേവൻ ചടങ്ങിൽ വ്യക്തമാക്കി. 2004-ൽ ‘കേരള പീപ്പിൾസ് പാർട്ടി’ എന്ന രാഷ്ട്രീയ പ്രസ്ഥാനം രൂപീകരിച്ച ദേവൻ, 2021 മാർച്ച് മാസത്തിൽ അമിത് ഷായുടെ സാന്നിധ്യത്തിലാണ് ബി.ജെ.പിയിൽ ചേർന്നതും തന്റെ പാർട്ടിയെ ബി.ജെ.പിയിൽ ലയിപ്പിച്ചതും.

2021 മുതലുള്ള എല്ലാ തിരഞ്ഞെടുപ്പ് പ്രചാരണങ്ങളിലും ബി.ജെ.പിക്കൊപ്പം സജീവമായി ദേവനുണ്ടായിരുന്നു. എന്നാൽ ബി.ജെ.പിയുടെ രാഷ്ട്രീയ ശൈലിയും ലൈനും തനിക്ക് അനുയോജ്യമല്ലെന്ന് തിരിച്ചറിഞ്ഞെന്നും, കഴിഞ്ഞ നാലഞ്ചു മാസമായി ഇതേക്കുറിച്ച് ആലോചിച്ചു വരികയായിരുന്നുവെന്നും അദ്ദേഹം കൂട്ടിച്ചേർത്തു. ഇന്നലെ നടത്തിയ ആത്മപരിശോധനയ്ക്കൊടുവിലാണ് അന്തിമ തീരുമാനമെടുത്തതെന്നും ദേവീസന്നിധിയിൽ വെച്ച് തന്നെ ഇത് പ്രഖ്യാപിക്കുകയാണെന്നും അദ്ദേഹം പറഞ്ഞു. 2026-ലെ തിരഞ്ഞെടുപ്പുമായി ബന്ധപ്പെട്ട് ബി.ജെ.പിക്ക് മുന്നിൽ ചില ആവശ്യങ്ങൾ മുന്നോട്ടുവെച്ചിരുന്നെങ്കിലും അത് നടപ്പായില്ലെന്നും തന്റെ പ്രസംഗത്തിൽ അദ്ദേഹം സൂചിപ്പിച്ചു.

മുൻ തിരഞ്ഞെടുപ്പിൽ സുരേഷ് ഗോപിയുടെയും പിന്നീട് രാജീവ് ചന്ദ്രശേഖറിന്റെയും വിജയത്തിൽ താൻ വഹിച്ച പങ്കിനെക്കുറിച്ച് ക്ഷേത്രച്ചടങ്ങിൽ സംസാരിക്കവെ ദേവൻ ഓർത്തെടുത്തു. ഒപ്പം ശോഭാ സുരേന്ദ്രന്റെ വിജയത്തിനായി പ്രവർത്തിച്ച കാര്യങ്ങളും അദ്ദേഹം തുറന്നുപറഞ്ഞു.

അതേസമയം, പാർട്ടിക്കുള്ളിൽ ഉണ്ടായ വ്യക്തമായ തർക്കങ്ങൾ എന്തൊക്കെയാണെന്ന് വെളിപ്പെടുത്താൻ അദ്ദേഹം തയ്യാറായില്ല. ബി.ജെ.പി സംസ്ഥാന നേതൃത്വത്തോടുള്ള കടുത്ത അതൃപ്തി വ്യക്തമാക്കിക്കൊണ്ടാണ് സംസ്ഥാന ഉപാധ്യക്ഷ സ്ഥാനവും പാർട്ടി അംഗത്വവും അദ്ദേഹം ഉപേക്ഷിച്ചത്. ഭാവി രാഷ്ട്രീയ തീരുമാനങ്ങൾ എന്താണെന്ന് അദ്ദേഹം ഇതുവരെ വ്യക്തമാക്കിയിട്ടുമില്ല.