‘തെരഞ്ഞെടുപ്പ് അട്ടിമറിക്കപ്പെടുന്നുവെന്ന് പറയുന്നവർ പിന്നെന്തിന് മത്സരിക്കുന്നു?’; പ്രതിപക്ഷ പാർട്ടികൾ വിട്ടുനിൽക്കണമെന്ന് അഭിജീത് ദിപ്കെ
ന്യൂഡൽഹി: രാജ്യത്തെ തെരഞ്ഞെടുപ്പ് പ്രക്രിയകൾ അട്ടിമറിക്കപ്പെടുന്നുവെന്ന് വിശ്വസിക്കുന്നുണ്ടെങ്കിൽ പ്രതിപക്ഷ പാർട്ടികൾ വോട്ടെടുപ്പുകളിൽ മത്സരിക്കുന്നത് അവസാനിപ്പിക്കണമെന്ന് കോക്രോച്ച് ജനതാ പാർട്ടി സ്ഥാപകൻ അഭിജീത് ദിപ്കെ. തെരഞ്ഞെടുപ്പുകൾ കൃത്രിമമാണെന്ന് പരസ്യമായി പറയുകയും എന്നാൽ വോട്ടുതേടി മത്സരരംഗത്ത് തുടരുകയും ചെയ്യുന്നത് ഇരട്ടത്താപ്പാണെന്ന് അദ്ദേഹം എക്സ് പ്ലാറ്റ്ഫോമിലൂടെ കുറ്റപ്പെടുത്തി.
അട്ടിമറി നടക്കുന്ന തെരഞ്ഞെടുപ്പുകളിൽ വീണ്ടും പങ്കെടുക്കുന്നത് നീതിയുക്തവും സുതാര്യവുമാണെന്ന വ്യാജ പ്രതീതി സൃഷ്ടിക്കാനും അത്തരം തെറ്റായ പ്രക്രിയകൾക്ക് നിയമസാധുത നേടിക്കൊടുക്കാനുമേ സഹായിക്കൂ. രാഷ്ട്രീയ അസ്തിത്വം നഷ്ടപ്പെടുമെന്ന ഭയമാണോ പ്രതിപക്ഷത്തെ നയിക്കുന്നതെന്നും വോട്ടുകൾ മോഷ്ടിക്കപ്പെടുകയും ജനപ്രതിനിധികളെ ചാക്കിട്ടുപിടിക്കുകയും ചെയ്യുന്ന ഒരു സംവിധാനത്തിൽ മത്സരിച്ചതുകൊണ്ട് എന്ത് അതിജീവനമാണ് നേടുന്നതെന്നും ദിപ്കെ ചോദിച്ചു. സൗകര്യപൂർവ്വം ഉന്നയിക്കുന്ന ഈ വിഷയം മുൻകൂട്ടി ഒത്തുകളിച്ച ഒരു ക്രിക്കറ്റ് മത്സരത്തിന് തുല്യമാണെന്നും അദ്ദേഹം പരിഹസിച്ചു.
പാർട്ടി നേട്ടങ്ങൾക്കപ്പുറം ഭരണഘടനയെയും ജനാധിപത്യത്തെയും മുൻനിർത്തി തെരഞ്ഞെടുപ്പുകൾ ബഹിഷ്കരിക്കാൻ പ്രതിപക്ഷം തയ്യാറാകണമെന്ന് ദിപ്കെ ആവശ്യപ്പെട്ടു. വോട്ടർപട്ടിക പുതുക്കലിൽ മുഖ്യ തെരഞ്ഞെടുപ്പ് കമ്മീഷണർ ഏകപക്ഷീയമായി തീരുമാനങ്ങൾ കൈക്കൊണ്ടുവെന്ന റിപ്പോർട്ടിന് പിന്നാലെ മുഖ്യ കമ്മീഷണർ ഗ്യാനേഷ് കുമാർ രാജിവെക്കണമെന്ന് അദ്ദേഹം നേരത്തെ ആവശ്യപ്പെട്ടിരുന്നു. രാജിവെച്ചില്ലെങ്കിൽ ഡൽഹിയിൽ ‘ജന്തർ മന്തർ 2.0’ എന്ന പേരിൽ ശക്തമായ ജനകീയ സമരം ആരംഭിക്കുമെന്നും അദ്ദേഹം മുന്നറിയിപ്പ് നൽകി.
