യുഎസ് സൈനിക വിമാനങ്ങൾക്ക് അനുമതി നിഷേധിച്ച് സ്വിറ്റ്സർലൻഡ്; ഇറാൻ യുദ്ധത്തിൽ നിഷ്പക്ഷത പാലിച്ച് സ്വിസ് സർക്കാർ
ബേൺ: ഇറാൻ യുദ്ധത്തിൽ പങ്കാളിയാകാൻ വിസമ്മതിച്ച് കൂടുതൽ യൂറോപ്യൻ രാജ്യങ്ങൾ. ഇറാനെതിരായ സൈനിക നീക്കത്തിനായി തങ്ങളുടെ വ്യോമപാത വിട്ടുനൽകണമെന്ന അമേരിക്കയുടെ രണ്ട് അപേക്ഷകൾ സ്വിറ്റ്സർലൻഡ് തള്ളി. അന്താരാഷ്ട്ര തലത്തിൽ തങ്ങൾ പുലർത്തുന്ന നിഷ്പക്ഷ നിലപാട് ഉയർത്തിപ്പിടിച്ചാണ് യുഎസ് വ്യോമസേനയ്ക്ക് നിയന്ത്രണം ഏർപ്പെടുത്തിയതെന്ന് സ്വിസ് ഭരണകൂടം അറിയിച്ചു. അതേസമയം, മാനുഷികമായ ആവശ്യങ്ങൾക്കായുള്ള മറ്റ് മൂന്ന് വിമാനങ്ങളുടെ യാത്രയ്ക്ക് സ്വിറ്റ്സർലൻഡ് അനുമതി നൽകി. തങ്ങളുടെ രാജ്യത്തെ സൈനിക താവളങ്ങൾ ഇറാനെ ആക്രമിക്കാൻ ഉപയോഗിക്കരുതെന്ന് നേരത്തെ സ്പെയിൻ വ്യക്തമാക്കിയിരുന്നു. ബ്രിട്ടനും ഫ്രാൻസും ഇതുവരെ യുഎസ് നടപടിയുടെ ഭാഗമാകാൻ കൂട്ടാക്കിയിട്ടില്ല.
ഇറാനെതിരെയുള്ള സൈനിക നീക്കത്തിൽ നേരിട്ട് പങ്കാളികളാകുന്ന അല്ലെങ്കിൽ സൈനിക സാമഗ്രികൾ എത്തിക്കുന്ന വിമാനങ്ങൾക്കാണ് സ്വിറ്റ്സർലൻഡ് അനുമതി നിഷേധിച്ചത്. തങ്ങളുടെ വ്യോമപാത യുദ്ധാവശ്യങ്ങൾക്കായി ഉപയോഗിക്കാൻ അനുവദിക്കുന്നത് സ്വിറ്റ്സർലൻഡിന്റെ ഭരണഘടനാപരമായ നിഷ്പക്ഷതയ്ക്ക് വിരുദ്ധമാണെന്ന് അധികൃതർ വ്യക്തമാക്കി. അതേസമയം, പരിക്കേറ്റ സൈനികരെ കൊണ്ടുപോകുന്നതിനും മറ്റ് മാനുഷിക സഹായങ്ങൾ എത്തിക്കുന്നതിനും വേണ്ടിയുള്ള മൂന്ന് യുഎസ് വിമാനങ്ങൾക്ക് സ്വിറ്റ്സർലൻഡ് അനുമതി നൽകി. ഇത്തരം യാത്രകൾ സൈനിക നടപടിയുടെ ഭാഗമായി കാണാൻ കഴിയില്ലെന്നാണ് സ്വിസ് ഫെഡറൽ കൗൺസിലിന്റെ നിലപാട്.
മിസൈലുകളും മറ്റ് യുദ്ധോപകരണങ്ങളും അതിവേഗം പശ്ചിമേഷ്യയിൽ എത്തിക്കാൻ സ്വിസ് വ്യോമപാത അത്യാവശ്യമാണെന്ന് അമേരിക്കൻ പ്രതിരോധ മന്ത്രാലയം വാദിച്ചിരുന്നു. സ്വിറ്റ്സർലൻഡ് അനുമതി നിഷേധിച്ചതോടെ ഈ വിമാനങ്ങൾക്ക് ദീർഘദൂര പാതകൾ തിരഞ്ഞെടുക്കേണ്ടി വരും. ഇത് സൈനിക നീക്കങ്ങളുടെ വേഗത കുറയ്ക്കാൻ കാരണമായേക്കാം.
യൂറോപ്പിലെ മിക്ക രാജ്യങ്ങളും അമേരിക്കൻ സൈന്യത്തിന് വ്യോമപാത തുറന്നുനൽകിയപ്പോൾ സ്വിറ്റ്സർലൻഡ് സ്വീകരിച്ച ഈ നിലപാട് അന്താരാഷ്ട്ര തലത്തിൽ വലിയ ചർച്ചയായിട്ടുണ്ട്. റഷ്യ-യുക്രെയ്ൻ യുദ്ധസമയത്തും സമാനമായ രീതിയിൽ നിഷ്പക്ഷത പാലിക്കാൻ സ്വിറ്റ്സർലൻഡ് ശ്രമിച്ചിരുന്നു.
ഇറാൻ-ഇസ്രായേൽ യുദ്ധം മൂന്നാം വാരത്തിലേക്ക് കടക്കുമ്പോൾ, കൂടുതൽ പാശ്ചാത്യ രാജ്യങ്ങൾ യുദ്ധത്തോടുള്ള മുഖംതിരിക്കുന്നതിന്റെ തുടർച്ചയായാണ് സ്വിറ്റ്സർലൻഡിന്റെ പുതിയ നീക്കം വിലയിരുത്തപ്പെടുന്നത്.
