ഇറാൻ യുദ്ധത്തിൽ വൈറ്റ് ഹൗസിൽ പൊട്ടിത്തെറി; യുഎസ് ഭീകരവിരുദ്ധ ഏജൻസി മേധാവി രാജിവെച്ചു

വാഷിങ്ടൺ: ഇറാനെതിരായ അമേരിക്കയുടെയും ഇസ്രയേലിന്റെയും സൈനിക നീക്കങ്ങളിൽ പ്രതിഷേധിച്ച് വൈറ്റ് ഹൗസിൽ പൊട്ടിത്തെറി. യുഎസ് ദേശീയ ഭീകരവിരുദ്ധൃ സെന്റർ(എൻസിടിസി) ഡയറക്ടർ ജോ കെന്റ് രാജിവെച്ചു. ഇറാൻ യുദ്ധം അമേരിക്കയുടെ ആഭ്യന്തര സുരക്ഷയെ അപകടത്തിലാക്കുമെന്നും രാജ്യം വലിയൊരു ഭീകരാക്രമണ ഭീഷണി നേരിടുകയാണെന്നും ചൂണ്ടിക്കാട്ടിയാണ് അപ്രതീക്ഷിത രാജി. പ്രസിഡന്റ് ഡൊണാൾഡ് ട്രംപിന്റെ വിശ്വസ്തനായി അറിയപ്പെട്ടിരുന്ന കെന്റിന്റെ നീക്കം വൈറ്റ് ഹൗസിനെ ഞെട്ടിച്ചിരിക്കുകയാണ്. ഇറാൻ അമേരിക്കയ്ക്ക് ഭീഷണിയല്ലെന്നും ഇസ്രയേലിന്റെ സമ്മർദത്തിനു വഴങ്ങിയാണ് അമേരിക്ക യുദ്ധത്തിനിറങ്ങിയതെന്നും വിമർശിച്ചുകൊണ്ടാണു രാജി.

പശ്ചിമേഷ്യൻ യുദ്ധം മൂന്നാം വാരം പിന്നിടാനിരിക്കുമ്പോഴാണ് ഒരു ഉന്നതവൃത്തം രാജി പ്രഖ്യാപിച്ചിരിക്കുന്നത്. യുദ്ധം അമേരിക്കയെ വലിയൊരു ഭീകരാക്രമണത്തിലേക്ക് നയിക്കുമെന്ന് കെന്റ് മുന്നറിയിപ്പ് നൽകുന്നു. ‘നമ്മുടെ വിഭവങ്ങളും ശ്രദ്ധയും പൂർണമായും പശ്ചിമേഷ്യയിലെ ഒരു അനാവശ്യ യുദ്ധത്തിലേക്ക് മാറ്റുന്നത് അമേരിക്കൻ മണ്ണിൽ ശത്രുക്കൾക്ക് അവസരമൊരുക്കും. ഇസ്രയേലിന്റെ താൽപര്യങ്ങൾ സംരക്ഷിക്കുന്നതിനായി അമേരിക്കൻ പൗരന്മാരുടെ സുരക്ഷ ബലികഴിക്കാൻ കഴിയില്ല,’ കെന്റ് രാജിക്കത്തിൽ വ്യക്തമാക്കി.

ട്രംപ് ഭരണകൂടത്തിലെ തീവ്രവാദ വിരുദ്ധ വിഭാഗത്തിന്റെ തലവനായ ജോ കെന്റ്, ഇറാനിലെ സൈനിക ഇടപെടൽ രാജ്യത്തിന്റെ ആഗോള സുരക്ഷാ തന്ത്രങ്ങൾക്ക് വിരുദ്ധമാണെന്നാണു ചൂണ്ടിക്കാട്ടുന്നത്. ഫെബ്രുവരി 28-ന് ആരംഭിച്ച ‘ഓപറേഷൻ എപിക് ഫ്യൂറി’ വഴി ഇറാന്റെ ആണവ-സൈനിക കേന്ദ്രങ്ങൾ തകർക്കാൻ ശ്രമിക്കുമ്പോൾ, അത് വലിയ തോതിലുള്ള ഭീകരവാദ സംഘങ്ങളുടെ ഉദയത്തിന് കാരണമാകുമെന്നാണ് അദ്ദേഹത്തിന്റെ വിലയിരുത്തൽ.

പശ്ചിമേഷ്യയിലെ യുദ്ധം മൂലം അമേരിക്കയ്ക്കുള്ളിൽ ‘ലോൺ വുൾഫ്’ ആക്രമണങ്ങൾക്കും ഇറാൻ അനുകൂല സായുധ ഗ്രൂപ്പുകളുടെ നീക്കങ്ങൾക്കും സാധ്യതയുണ്ടെന്ന് എൻസിടിസി മുന്നറിയിപ്പ് നൽകിയിരുന്നു. ഇസ്രയേലിന്റെ യുദ്ധലക്ഷ്യങ്ങൾക്കായി അമേരിക്കൻ സൈനികരെയും വിഭവങ്ങളെയും അമിതമായി ഉപയോഗിക്കുന്നതിൽ പെന്റഗണിലെ ഒരു വിഭാഗം ഉദ്യോഗസ്ഥർക്കും അതൃപ്തിയുണ്ട്.

സഖ്യകക്ഷികളായ ബ്രിട്ടനും കാനഡയും ജർമനിയുമെല്ലാം പിന്മാറിയതിന് പിന്നാലെ സ്വന്തം ഭരണകൂടത്തിലെ ഉന്നത ഉദ്യോഗസ്ഥൻ തന്നെ രാജിവച്ചത് ട്രംപിന്റെ യുദ്ധതന്ത്രങ്ങൾക്ക് വലിയ തിരിച്ചടിയാണ്. എന്നാൽ, കെന്റിന്റെ രാജി യുദ്ധത്തെ ബാധിക്കില്ലെന്നും ഇറാനെതിരായ നീക്കം തുടരുമെന്നുമാണ് വൈറ്റ് ഹൗസ് വക്താക്കൾ വ്യക്തമാക്കുന്നത്.