‘രാഹുൽ ഗാന്ധിക്ക് സ്ഥിരതയില്ല’; ഇന്ത്യ സഖ്യത്തിൻ്റെ നിർണായക യോഗത്തിന് തൊട്ടുമുമ്പ് ഡൽഹിയിൽ ഫ്ലക്സ്
ന്യൂഡൽഹി: ഇന്ത്യ സഖ്യത്തിൻ്റെ നിർണായക യോഗം നടക്കാനിരിക്കെ, ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെ ഡൽഹിയിൽ വ്യാപകമായി ഫ്ലെക്സ് ബോർഡുകൾ പ്രത്യക്ഷപ്പെട്ടു. രാഹുൽ ഗാന്ധിക്ക് സ്ഥിരതയില്ലെന്ന് ചൂണ്ടിക്കാണിച്ചാണ് നഗരത്തിലെ പ്രധാന നിരത്തുകളിൽ ബോർഡുകൾ സ്ഥാപിച്ചിട്ടുള്ളത്.
ഇന്ത്യ സഖ്യത്തിലെ പ്രമുഖ നേതാക്കളായ ശരദ് പവാർ, മമത ബാനർജി, ഉദയനിധി സ്റ്റാലിൻ, അരവിന്ദ് കെജ്രിവാൾ തുടങ്ങിയവർ മുൻപ് രാഹുലിനെതിരെ ഉന്നയിച്ച വിമർശനങ്ങളാണ് ഫ്ലെക്സുകളിൽ ഉൾപ്പെടുത്തിയിരിക്കുന്നത്. ഡൽഹി അശോക് റോഡ് ഉൾപ്പെടെയുള്ള ഭാഗങ്ങളിൽ എം.കെ സ്റ്റാലിൻ, ഭഗവന്ത് മൻ, പിണറായി വിജയൻ എന്നിവരുടെ ചിത്രങ്ങളടങ്ങിയ ബോർഡുകളും ഉയർന്നിട്ടുണ്ട്.
സഖ്യത്തിൻ്റെ ഭാവി നിർണയിക്കുന്ന സുപ്രധാന യോഗമാണ് ഇന്ന് ഡൽഹിയിൽ നടക്കുന്നത്. എന്നാൽ, അതൃപ്തിയിലുള്ള ഡിഎംകെയും എഎപിയും ഇന്നത്തെ യോഗത്തിൽ പങ്കെടുത്തേക്കില്ലെന്നാണ് വിവരം. മുന്നണിയിൽ ഭിന്നത രൂക്ഷമാകുന്നതിനിടെയാണ് രാഹുൽ ഗാന്ധിയെ ലക്ഷ്യമിട്ടുള്ള ഫ്ലെക്സ് വിവാദം.
