‘എന്തിനാണ് രാജ്യത്തിന്റെ അന്തരീക്ഷം നശിപ്പിക്കുന്നത്?’: ഡൽഹി എയർപോർട്ടിൽ അഭിജീത് ദിപ്‌കെയ്‌ക്കെതിരെ യാത്രക്കാരൻ
ന്യൂഡൽഹി: വോട്ടർ പട്ടികയുടെ സ്പെഷ്യൽ ഇന്റൻസീവ് റിവിഷനിൽ ക്രമക്കേട് ആരോപിച്ചുള്ള പ്രക്ഷോഭങ്ങൾക്കിടെ, കോക്രോച്ച് ജനതാ പാർട്ടി സ്ഥാപകൻ അഭിജീത് ദിപ്കെ ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ യാത്രക്കാരന്റെ ചോദ്യം ചെയ്യലിന് ഇരയായി. “നിങ്ങൾ എന്തിനാണ് രാജ്യത്തിന്റെ അന്തരീക്ഷം നശിപ്പിക്കുന്നത്?” എന്ന് ചോദിച്ചായിരുന്നു യാത്രക്കാരന്റെ പ്രതിഷേധം. ഇതിനോട് പ്രതികരിക്കാതെ കൈവീശിയും തംബ്‌സ് അപ്പ് കാണിച്ചും ദിപ്കെ മുന്നോട്ടുപോയി. അടിയന്തരമായി ഇടപെട്ട സുരക്ഷാ സേനയും പോലീസും ഇദ്ദേഹത്തിന് സംരക്ഷണമൊരുക്കി.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ‘ഇലക്ഷൻ കമ്മീഷൻ തിക് കരോ’ കാമ്പയിന് നേതൃത്വം നൽകിവരികയായിരുന്നു ദിപ്കെ. ഡൽഹി വിമാനത്താവളത്തിൽ വെച്ച് അദ്ദേഹം അറസ്റ്റിലായി. ഇതിനിടെ, ജന്തർ മന്തറിലെ നിരോധനാജ്ഞ മറികടന്ന് പൂട്ടിയിട്ട ഗേറ്റുകൾ ചാടിക്കടന്ന് പ്രകടനം നടത്തുകയും ദേശീയ പതാക ഉയർത്തുകയും ചെയ്ത സിജെപി മുഖ്യനും ദേശീയ വക്താവുമായ സൗരവ് ദാസ്, അശുതോഷ് രങ്ക എന്നിവരെ പോലീസ് അറസ്റ്റ് ചെയ്തു. ഇവരെ കോടതി അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിട്ട് തിഹാർ ജയിലിലടച്ചു.
ക്രിമിനൽ അതിക്രമിച്ചു കടക്കൽ, നിയമവിരുദ്ധമായി സംഘം ചേരൽ, പൊതുപ്രവർത്തകരുടെ ജോലി തടസ്സപ്പെടുത്തൽ തുടങ്ങിയ വകുപ്പുകൾ ചുമത്തിയാണ് പോലീസ് കേസെടുത്തിരിക്കുന്നത്. യുവാക്കളുടെ നേതൃത്വത്തിൽ നടന്ന സമാധാനപരമായ പ്രതിഷേധത്തെ പോലീസ് അടിച്ചമർത്തുകയാണെന്ന് ദിപ്കെ ആരോപിച്ചു.
അതേസമയം, അറസ്റ്റിലായ സിജെപി നേതാക്കൾക്ക് പിന്തുണയുമായി പ്രതിപക്ഷ നേതാവ് രാഹുൽ ഗാന്ധി രംഗത്തെത്തി. ദേശീയ പതാക ഉയർത്തിയ യുവാക്കളെ ജയിലിലടച്ച പോലീസ് നടപടി ഭീരുത്വമാണെന്ന് വിശേഷിപ്പിച്ച അദ്ദേഹം, ജന്തർ മന്തർ പൗരന്മാർക്ക് തിരിച്ചുനൽകുമെന്ന് വ്യക്തമാക്കി. രാഹുൽ ഗാന്ധിയുടെ പിന്തുണയ്ക്ക് അഭിജീത് ദിപ്കെ എക്‌സിലൂടെ നന്ദി അറിയിച്ചു.
