എസ്.ഡി.പി.ഐ പിന്തുണച്ചു; കോട്ടാങ്ങല് പഞ്ചായത്തില് പ്രസിഡന്റ് സ്ഥാനം രാജിവച്ച് യു.ഡി.എഫ്
പത്തനംതിട്ട: കോട്ടാങ്ങല് ഗ്രാമപഞ്ചായത്ത് പ്രസിഡന്റ് തെരഞ്ഞെടുപ്പില് എസ്.ഡി.പി.ഐ പിന്തുണയോടെ വിജയിച്ച യു.ഡി.എഫ് പ്രസിഡന്റ് രാജിവച്ചു. യു.ഡി.എഫ് അംഗം കെ.വി ശ്രീദേവിയാണ് സത്യപ്രതിജ്ഞ ചെയ്ത് അധികാരമേറ്റതിന് പിന്നാലെ രാജി സമര്പ്പിച്ചത്. വര്ഗീയ കക്ഷികളുടെ പിന്തുണ സ്വീകരിച്ച് ഭരിക്കേണ്ടതില്ലെന്ന യു.ഡി.എഫ് നയത്തിന്റെ ഭാഗമായാണ് രാജി.
യു.ഡി.എഫിനും ബി.ജെ.പിക്കും അഞ്ച് വീതം അംഗങ്ങളുള്ള പഞ്ചായത്തില് എസ്.ഡി.പി.ഐയുടെ നിലപാട് നിര്ണായകമായിരുന്നു. മൂന്ന് അംഗങ്ങളുള്ള എസ്.ഡി.പി.ഐ വോട്ടെടുപ്പില് യു.ഡി.എഫിന് അനുകൂലമായി വോട്ട് ചെയ്തു. എല്.ഡി.എഫിന് പഞ്ചായത്തില് ഒരു അംഗമാണുള്ളത്.
എസ്.ഡി.പി.ഐയുടെ വോട്ട് സ്വീകരിച്ച് വിജയിച്ച വിവരം അറിഞ്ഞ ഉടന് തന്നെ യു.ഡി.എഫ് ജില്ലാ നേതൃത്വം ഇടപെടുകയും, സ്ഥാനം രാജിവയ്ക്കാന് പ്രസിഡന്റിന് നിര്ദേശം നല്കുകയുമായിരുന്നു. എസ്.ഡി.പി.ഐയുടെ പിന്തുണ വേണ്ടെന്നും, അത്തരത്തില് ലഭിക്കുന്ന അധികാരം ഉപേക്ഷിക്കുകയാണെന്നും വ്യക്തമാക്കിയാണ് കെ.വി. ശ്രീദേവി രാജിനല്കിയത്.
അതേസമയം, ബിജെപിയെ ഒരു കാരണവശാലും ഭരണത്തില് കൊണ്ടുവരരുത് എന്ന തങ്ങളുടെ രാഷ്ട്രീയ നിലപാടിന്റെ ഭാഗമായാണ് കോണ്ഗ്രസിന് വോട്ട് ചെയ്തതെന്ന് എസ്ഡിപിഐ പ്രതികരിച്ചു.
