‘ഇറാൻ മിസൈലുകൾ തടുക്കാൻ ഡേവിഡ്സ് സ്ലിങ്ങിന് കഴിഞ്ഞില്ല; സാങ്കേതിക തകരാർ’-വിശദീകരണവുമായി ഐഡിഎഫ്
ഇറാന് മിസൈല് ആക്രമണത്തില് തെല് അവീവില് തകര്ന്ന കെട്ടിടങ്ങള്
തെൽ അവീവ്: ലോകത്തെ ഏറ്റവും ആധുനികമെന്ന് വിശേഷിപ്പിക്കപ്പെടുന്ന ഇസ്രയേലിന്റെ വ്യോമ പ്രതിരോധ സംവിധാനങ്ങളിൽ വലിയ വിള്ളൽ വീഴ്ത്തി ഇറാന്റെ മിസൈൽ ആക്രമണം. തെക്കൻ ഇസ്രയേലിലെ ഡിമോണ, അറാദ് നഗരങ്ങളിൽ കഴിഞ്ഞ ശനിയാഴ്ച രാത്രി ഇറാന്റെ ബാലിസ്റ്റിക് മിസൈലുകൾ പതിച്ചത് ‘ഡേവിഡ്സ് സ്ലിങ്’ എന്ന പ്രതിരോധ സംവിധാനത്തിന് സംഭവിച്ച സാങ്കേതിക തകരാർ മൂലമാണെന്ന് ഐ.ഡി.എഫ് സ്ഥിരീകരിച്ചു. ഇസ്രയേലിന്റെ ആണവ ഗവേഷണ കേന്ദ്രം സ്ഥിതി ചെയ്യുന്ന ഡിമോണയ്ക്ക് നേരെയുണ്ടായ ആക്രമണം അതീവ ഗൗരവത്തോടെയാണ് രാജ്യം കാണുന്നത്.
പ്രതിരോധം പാളിയതെങ്ങനെ?
ഇറാന്റെ ‘ഖദർ’ വിഭാഗത്തിൽപ്പെട്ട ബാലിസ്റ്റിക് മിസൈലുകളെ തടയാൻ ഡേവിഡ്സ് സ്ലിങ് ശ്രമിച്ചെങ്കിലും ഇന്റർസെപ്റ്റർ മിസൈലുകൾ ലക്ഷ്യം കാണുന്നതിൽ പരാജയപ്പെടുകയായിരുന്നു. സാധാരണയായി അന്തരീക്ഷത്തിന് പുറത്തുവെച്ച് മിസൈലുകളെ തകർക്കുന്ന ‘ഏരോ’ സംവിധാനത്തിന് പകരം, ചെലവ് കുറഞ്ഞതും എന്നാൽ ശക്തിയേറിയതുമായ ഡേവിഡ്സ് സ്ലിങ് ഉപയോഗിക്കാനാണ് സൈന്യം തീരുമാനിച്ചത്. ‘ഏരോ’ മിസൈലുകളുടെ സ്റ്റോക്ക് വരും ദിവസങ്ങളിലെ വലിയ യുദ്ധത്തിനായി കരുതിവെക്കാനുള്ള നീക്കം ഒടുവിൽ വലിയ തിരിച്ചടിയായി മാറുകയായിരുന്നു. ആക്രമണത്തിൽ പരിക്കേറ്റവരുടെ എണ്ണം 200-നോട് അടുക്കുന്നതായാണ് പുതിയ വിവരങ്ങൾ.
രണ്ട് മണിക്കൂർ വ്യത്യാസത്തിൽ രണ്ട് പ്രഹരങ്ങൾ
ശനിയാഴ്ച വൈകിട്ട് രണ്ട് മണിക്കൂർ വ്യത്യാസത്തിലാണ് ഡിമോണയിലും അറാദിലും മിസൈലുകൾ പതിച്ചത്. ഇത് കേവലം സാങ്കേതിക തകരാറുകൾ മാത്രമാണെന്നും വ്യോമ പ്രതിരോധ സംവിധാനത്തിന്റെ സമ്പൂർണ പരാജയമല്ലെന്നുമാണ് ഐ.ഡി.എഫ് അവകാശപ്പെടുന്നത്. എന്നാൽ, ഇസ്രയേലിന്റെ സുരക്ഷാ കവചമായ ‘മൾട്ടി ലെയേർഡ് ഡിഫൻസ് ഷീൽഡിന്റെ’ വിശ്വാസ്യതയാണ് ഇപ്പോൾ ചോദ്യം ചെയ്യപ്പെടുന്നത്.
ചെലവേറിയ യുദ്ധവും ചോരുന്ന ആത്മവിശ്വാസവും
അമേരിക്കയുടെയും ഇസ്രയേലിന്റെയും ശതകോടികൾ മുടക്കിയുള്ള പ്രതിരോധ സംവിധാനങ്ങളെ തകർക്കാൻ ഇറാൻ തങ്ങളുടെ കുറഞ്ഞ ചെലവിലുള്ള മിസൈലുകളും ഡ്രോണുകളും ഉപയോഗിക്കുന്നത് അമേരിക്കയെയും ആശങ്കയിലാക്കുന്നുണ്ട്. ഓരോ ഡേവിഡ്സ് സ്ലിങ് മിസൈലിനും ഏകദേശം 10 ലക്ഷം ഡോളറാണ് ചെലവ്. എന്നാൽ, ഇതിലും ആധുനികമായ ‘ഏരോ 3’ മിസൈലുകൾക്ക് 25 ലക്ഷം ഡോളറിലേറെ ചെലവ് വരും. നീണ്ടുപോകുന്ന യുദ്ധത്തിൽ ഇത്തരം പ്രതിരോധ മിസൈലുകളുടെ സ്റ്റോക്ക് തീരുന്നത് വലിയ പ്രതിസന്ധിയാണ് സൃഷ്ടിക്കുന്നത്.
ലബനാൻ, ഫലസ്തീൻ അതിർത്തികളിൽ കൂടി സംഘർഷം കടുക്കുമ്പോൾ സ്വന്തം മണ്ണിലെ ആണവ കേന്ദ്രങ്ങൾക്ക് പോലും സുരക്ഷ ഉറപ്പാക്കാൻ കഴിയാത്തത് ഇസ്രയേലിന് വൻ തിരിച്ചടിയാണ്. ഇറാൻ തങ്ങളുടെ മിസൈൽ കരുത്ത് വർധിപ്പിച്ചുകൊണ്ടിരിക്കെ, ഇസ്രയേലിന്റെ ആകാശകവചമായ അയേൺ ഡോമിനും ഡേവിഡ്സ് സ്ലിങ്ങിനും ഇനിയും എത്രത്തോളം പ്രതിരോധം തീർക്കാനാകുമെന്നത് കണ്ടറിയണം.
