‘മോദി സർക്കാർ ഒരു വർഷത്തിനകം താഴെവീഴും’-രാഹുലിന് ഭരണകൂട രഹസ്യങ്ങൾ ചോർത്തുന്ന ആ ‘ചാരന്‍’ ആര്?

ന്യൂഡൽഹി: ഇന്ത്യൻ രാഷ്ട്രീയത്തിന്റെ അണിയറകളിൽ വൻ ചലനങ്ങൾ സൃഷ്ടിച്ചുകൊണ്ട്, അതീവ ഗുരുതരവും ഞെട്ടിക്കുന്നതുമായൊരു പ്രവചനം കഴിഞ്ഞ ദിവസം ലോക്‌സഭാ പ്രതിപക്ഷ നേതാവ് രാഹുൽ ഗാന്ധി നടത്തി. നരേന്ദ്ര മോദി സർക്കാർ ഒരു വർഷത്തിനകം താഴെവീഴുമെന്നും, രാജ്യത്ത് വർധിച്ചുവരുന്ന ജനരോഷവും സാമ്പത്തിക പ്രതിസന്ധിയും അടിച്ചമർത്താൻ ഭരണകൂടം വീണ്ടുമൊരു അടിയന്തരാവസ്ഥ പ്രഖ്യാപിക്കാൻ നീക്കമുണ്ടെന്നുമായിരുന്നു ആ വെളിപ്പെടുത്തൽ. ഡൽഹിയിലെ ഇന്ദിരാ ഭവനിൽ ആദിവാസി കോൺഗ്രസ് സംഘടിപ്പിച്ച ‘നാഷണൽ ആദിവാസി പ്രൊഫഷണൽ കോൺക്ലേവ്’ എന്ന അതീവ രഹസ്യ സ്വഭാവമുള്ള, അടച്ചിട്ട മുറിയിൽ നടന്ന സംഗമത്തിലാണ് രാഹുൽ ഈ രാഷ്ട്രീയ ബോംബ് പൊട്ടിച്ചത്. ഈ പ്രസംഗത്തിന്റെ ദൃശ്യങ്ങൾ പുറത്തുവന്നതോടെ അതു വലിയൊരു രാഷ്ട്രീയ സംവാദത്തിന് തിരികൊളുത്തിയിരിക്കുകയാണ്.

കേവലം പ്രവചനങ്ങൾക്കപ്പുറം, നിലവിലെ ഭരണസംവിധാനത്തിന്റെ ആന്തരിക ഘടന പൂർണമായും തകർച്ചയിലാണെന്നും ഉന്നത സർക്കാർ സംവിധാനങ്ങളിൽനിന്നു തനിക്ക് രഹസ്യവിവരങ്ങൾ നേരിട്ട് ലഭിക്കുന്നുണ്ടെന്നുമുള്ള രാഹുൽ ഗാന്ധിയുടെ അവകാശവാദമാണ് ഏറെ ഞെട്ടിപ്പിക്കുന്നത്. ഭരണകൂടത്തിന്റെ ഏറ്റവും ഉന്നത തലങ്ങളിലിരിക്കുന്ന ‘ഇൻസൈഡർമാർ’ തനിക്ക് വിവരങ്ങൾ ചോർത്തി നൽകുന്നുണ്ടെന്ന വെളിപ്പെടുത്തൽ പ്രധാനമന്ത്രിയുടെ ഓഫീസിനെയും കേന്ദ്ര ആഭ്യന്തര മന്ത്രാലയത്തെയും ഒരുപോലെ പ്രതിരോധത്തിലാക്കുന്നതാണ്. ആരാണ് ഈ വിവരങ്ങൾ പ്രതിപക്ഷ നേതാവിനു ചോർത്തുന്നതെന്ന ചോദ്യം ഭരണപക്ഷത്തെ അസ്വസ്ഥമാക്കുമെന്നുറപ്പാണ്.

വീഴാൻ പോകുന്ന ‘മോദി സാമ്രാജ്യം’: രാഹുലിന്റെ നിരീക്ഷണം

‘എന്റെ കൃത്യമായ വ്യക്തിപരമായ വിലയിരുത്തലിൽ, ഒരു വർഷത്തിനകം നരേന്ദ്ര മോദി ഈ രാജ്യത്തിന്റെ പ്രധാനമന്ത്രി കസേരയിൽ ഉണ്ടാകില്ല,’ രാഹുൽ ഗാന്ധി കോൺഗ്രസ് സംഗമത്തിൽ അസന്ദിഗ്ധമായി പ്രഖ്യാപിച്ചത് ഇങ്ങനെയായിരുന്നു. മുൻകാലങ്ങളിൽ മോദി പൂർണമായും തന്റെ കൽപ്പനകൾക്ക് കീഴിൽ നിർത്തിയിരുന്ന ഭരണസംവിധാനങ്ങൾ ഇപ്പോൾ ആന്തരികമായി തകരുകയും ഉലയുകയും ചെയ്തിരിക്കുകയാണെന്നാണ് ഇതിന് പ്രധാന കാരണമായി അദ്ദേഹം ചൂണ്ടിക്കാട്ടുന്നത്. മൂന്നാം മോദി സർക്കാർ മുൻപത്തെപ്പോലെ ശക്തമല്ലെന്നും അവർക്ക് പൂർണമായും ഭരണപരമായ ആത്മവിശ്വാസം നഷ്ടപ്പെട്ടുവെന്നും രാഹുൽ വെളിപ്പെടുത്തുന്നു.

ഇന്ത്യൻ ഭരണഘടനയെയും ജനാധിപത്യ മൂല്യങ്ങളെയും തകർക്കാൻ ശ്രമിക്കുന്ന ബിജെപിക്ക് ഇന്ത്യൻ ജനത നൽകിയ ശക്തമായ തിരിച്ചടിയാണ് നിലവിലെ സാഹചര്യത്തിന് കാരണമെന്നും അദ്ദേഹം വിലയിരുത്തുന്നുണ്ട്. ഭരണകൂടത്തിന്റെ കടുത്ത നിയന്ത്രണത്തിലായിരുന്ന ഉദ്യോഗസ്ഥവൃന്ദവും വിവിധ അന്വേഷണ ഏജൻസികളും ഇപ്പോൾ പ്രതിപക്ഷവുമായി രഹസ്യമായി കൈകോർക്കുന്നുണ്ടെന്ന സൂചനയാണ് രാഹുൽ നൽകുന്നത്. മോദിയുടെ സർവാധിപതിയായുള്ള രാഷ്ട്രീയ പ്രതാപം അവസാന ഘട്ടത്തിലാണെന്നും അദ്ദേഹത്തിന് കീഴിലുള്ള ഭരണ സംവിധാനങ്ങളുടെ കടിഞ്ഞാൺ കൈവിട്ടുപോയെന്നും കോൺഗ്രസ് നേതാവ് വാദിക്കുന്നു.

‘ഇൻസ്റ്റിറ്റിയൂഷണൽ റിവോൾട്ട്’ അഥവാ ഭരണഘടനാ സ്ഥാപനങ്ങളുടെ ആഭ്യന്തര കലാപം

രാഹുൽ ഗാന്ധിയുടെ പ്രസംഗത്തിലെ ഏറ്റവും ശ്രദ്ധേയവും ഭരണകൂടത്തെ ആശങ്കപ്പെടുത്തുന്നതുമായ ഭാഗം ‘ഇൻസ്റ്റിറ്റിയൂഷണൽ റിവോൾട്ട്’ എന്ന അദ്ദേഹത്തിന്റെ പരാമർശമാണ്. അഥവാ ഭരണസംവിധാനങ്ങൾക്കകത്തുനിന്നുള്ള കലാപത്തെക്കുറിച്ചുള്ള പരാമർശമായിരുന്നു അത്. ഇന്ത്യയിലെ പരമോന്നത ജനാധിപത്യ സ്ഥാപനങ്ങൾ ഭരണകൂടത്തിന് എതിരെ തിരിയുകയാണെന്നും അകത്തുനിന്നു തന്നെ ഒരു കലാപം പൊട്ടിപ്പുറപ്പെടുമെന്നുമാണ് രാഹുൽ പ്രവചിക്കുന്നത്. ഉദ്യോഗസ്ഥർക്ക് മേലുള്ള കേന്ദ്ര സർക്കാരിന്റെ കരിനിഴൽ നീങ്ങുകയാണെന്നും അദ്ദേഹം അവകാശപ്പെടുന്നു.

അതിലേറെ കൗതുകമുണർത്തുന്ന കാര്യം മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ കുറിച്ചുള്ള രാഹുലിന്റെ വെളിപ്പെടുത്തലാണ്. ”നിങ്ങൾ വിചാരിക്കുന്നത് രാജ്യത്തെ തെരഞ്ഞെടുപ്പ് കമ്മീഷൻ ഇപ്പോഴും പൂർണമായും സർക്കാരിന്റെ നിയന്ത്രണത്തിലാണെന്നാകും. എന്നാൽ അത് മൂന്ന് വർഷം മുൻപത്തെ കഥയാണ്. ഇപ്പോൾ സ്ഥിതി മാറി. ചീഫ് ഇലക്ഷൻ കമ്മീഷണർ പോലും എനിക്ക് സന്ദേശങ്ങൾ അയക്കുന്നുണ്ട്. രാജ്യത്തെ രഹസ്യാന്വേഷണ ഏജൻസികളുടെ(ഐബി, റോ തുടങ്ങിയവ) തലവന്മാരും നീതിന്യായ വ്യവസ്ഥയിലെ ഉന്നതരായ ജഡ്ജിമാരും ഭരണകൂടത്തിന്റെ പ്രവർത്തനങ്ങളിൽ കടുത്ത അസംതൃപ്തരാണ്. അവർ ഭരണകൂടത്തിനെതിരെ ആഭ്യന്തരമായി കലാപം കൂട്ടുകയാണ്. അതിപ്രധാനമായ വിവരങ്ങളാണ് അവിടെനിന്ന് ഞങ്ങൾക്ക് ലഭിച്ചുകൊണ്ടിരിക്കുന്നത്,’ രാഹുൽ വെളിപ്പെടുത്തി.

പൊതുജനങ്ങളുടെ ഭാഗത്തുനിന്നുള്ള കടുത്ത സമ്മർദവും പ്രതിഷേധവും ഉദ്യോഗസ്ഥർ മുൻകൂട്ടി കാണുന്നുണ്ട്. ജനങ്ങൾ തെരുവിൽ ഇറങ്ങുമ്പോൾ ഭരണകൂടത്തിന്റെ പക്ഷംചേർന്ന് നിയമവിരുദ്ധമായി പ്രവർത്തിച്ചാൽ അത് ഭാവിയിൽ തങ്ങൾക്ക് വലിയ വിപത്തായി മാറുമെന്ന് ഈ ഉന്നത ഉദ്യോഗസ്ഥർ ഭയപ്പെടുന്നു. ഈ ഭയമാണ് അവരെ പ്രതിപക്ഷത്തിന് വിവരങ്ങൾ നൽകാൻ പ്രേരിപ്പിക്കുന്നതെന്ന് രാഹുൽ വ്യക്തമാക്കുന്നു.

ആരാണ് ആ ‘ഇൻസൈഡർ’? രഹസ്യങ്ങൾ ചോരുന്ന വഴി

രാഹുൽ ഗാന്ധിയുടെ വെളിപ്പെടുത്തൽ പുറത്തുവന്നതോടെ രാഷ്ട്രീയ നിരീക്ഷകരും മാധ്യമങ്ങളും അന്വേഷിക്കുന്നത് ഒരേയൊരു കാര്യമാണ്. ആരാണ് ഭരണകൂടത്തിന്റെ ഹൃദയഭാഗത്തിരുന്ന് വിവരങ്ങൾ ചോർത്തുന്ന ആ ഇൻസൈഡർ? പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ, അമിത് ഷായുടെ മകൻ ജയ് ഷാ, ദേശീയ സുരക്ഷാ ഉപദേഷ്ടാവ് അജിത് ഡോവൽ, അദ്ദേഹത്തിന്റെ മക്കൾ എന്നിവരെക്കുറിച്ചുള്ള അതിരഹസ്യമായ നീക്കങ്ങളും വിവരങ്ങളും തനിക്ക് കൃത്യമായി ലഭിക്കുന്നുണ്ടെന്നാണ് കോൺഗ്രസ് നേതാവ് അവകാശപ്പെട്ടത്.

‘ഞാൻ മോദിജിയെ നേരിട്ട് കാണുമ്പോഴും അദ്ദേഹത്തോടൊപ്പം ഔദ്യോഗിക യോഗങ്ങളിൽ പങ്കെടുക്കുമ്പോഴും എനിക്ക് അദ്ദേഹത്തെക്കുറിച്ച് എത്രമാത്രം വിവരങ്ങൾ അറിയാമെന്ന് അദ്ദേഹത്തിന് നന്നായി അറിയാം. ഞാൻ എല്ലാം അറിഞ്ഞുകൊണ്ടാണ് ഇരിക്കുന്നതെന്ന് മോദിയുടെ മുഖത്തുനോക്കുമ്പോൾ എനിക്ക് മനസ്സിലാകും. ഒരിക്കൽ അദ്ദേഹം പൂർണമായി ഭരിച്ചിരുന്ന ആ വ്യവസ്ഥിതി ഇന്ന് തകരുകയും വിവരങ്ങൾ എനിക്ക് ചോർത്തി നൽകുകയും ചെയ്യുന്നു എന്ന യാഥാർത്ഥ്യം അദ്ദേഹത്തിന് ഉൾക്കൊള്ളാൻ കഴിയുന്നില്ല. ഈ ഒരു പുതിയ സമവാക്യമാണ് ഇപ്പോൾ ഡൽഹിയിൽ നടക്കുന്നത്,’ രാഹുൽ കൂട്ടിച്ചേർത്തു.

ഇന്റലിജൻസ് തലവന്മാർ, പ്രമുഖ ജഡ്ജിമാർ, തെരഞ്ഞെടുപ്പ് കമ്മീഷണർമാർ എന്നിവരിൽ ആരെല്ലാമാണ് പ്രതിപക്ഷവുമായി ബന്ധം പുലർത്തുന്നത് എന്ന ചോദ്യം കേന്ദ്ര സർക്കാരിനെ വലിയ ആശങ്കയിലാഴ്ത്തിയിട്ടുണ്ട്. ഇത് വെറുമൊരു രാഷ്ട്രീയ അവകാശവാദമല്ലെന്നും, ഭരണകൂടത്തിന്റെ സുപ്രധാന രേഖകളും തീരുമാനങ്ങളും പ്രതിപക്ഷ നേതാവിന്റെ മേശപ്പുറത്ത് കൃത്യമായി എത്തുന്നുണ്ടെന്നുമുള്ള സൂചനയാണ് ഇതിലൂടെ ലഭിക്കുന്നത്.

വരാനിരിക്കുന്ന ‘സാമ്പത്തിക സുനാമി’

രാജ്യം ഇതുവരെ സാക്ഷ്യം വഹിക്കാത്ത തരത്തിലുള്ള അതിരൂക്ഷമായ ‘സാമ്പത്തിക സുനാമി’ക്ക് ഇന്ത്യ ഇരയാകാൻ പോകുകയാണെന്ന് രാഹുൽ ഗാന്ധി മുന്നറിയിപ്പ് നൽകുന്നുണ്ട്. അന്താരാഷ്ട്ര വിപണിയിലെ തിരിച്ചടികളിൽനിന്ന് ഇന്ത്യൻ സമ്പദ്വ്യവസ്ഥയെ സംരക്ഷിച്ചു നിർത്തിയിരുന്ന ‘ഷോക്ക് അബ്‌സോർബറുകൾ'(പരിരക്ഷാ സംവിധാനങ്ങൾ) ബിജെപി സർക്കാർ ഒന്നൊന്നായി എടുത്തുമാറ്റിയതാണ് ഇതിന് കാരണമെന്നാണു കാരണമായി ചൂണ്ടിക്കാട്ടുന്നത്.

വിലക്കയറ്റവും തൊഴിലില്ലായ്മയും ഇപ്പോൾ അതിന്റെ പ്രാരംഭ ഘട്ടത്തിൽ മാത്രമാണ്. കോർപറേറ്റുകളെ മാത്രം സഹായിക്കുന്ന നയങ്ങൾ കാരണം രാജ്യത്തെ ചെറുകിട-ഇടത്തരം വ്യവസായങ്ങൾ തകർന്നു. ജനങ്ങളുടെ വാങ്ങൽ ശേഷി ഇല്ലാതായി. ഈ സാമ്പത്തിക പ്രതിസന്ധി ജനങ്ങളെ കടുത്ത പട്ടിണിയിലേക്കും ദാരിദ്ര്യത്തിലേക്കും തള്ളിവിടുമ്പോൾ രാജ്യം വലിയൊരു അരാജകത്വത്തിലേക്ക് നീങ്ങുമെന്നും, ജനങ്ങൾ തെരുവിലിറങ്ങി സർക്കാരിനെതിരെ തിരിയുമെന്നും രാഹുൽ ഗാന്ധി പ്രവചിക്കുന്നു. ഈ ജനരോഷത്തെ തടഞ്ഞുനിർത്താൻ നിലവിലെ മോദി സർക്കാരിന് കഴിയുമോ എന്നതാണു പ്രസക്തമായ ചോദ്യം.

പരീക്ഷാ വിവാദങ്ങളും വിദ്യാർത്ഥി രോഷവും

ഈയിടെ രാജ്യത്തെ ഉലച്ച നീറ്റ്-യുജി പരീക്ഷാ ക്രമക്കേടുകളും ചോദ്യപേപ്പർ ചോർച്ചയും, സിബിഎസ്ഇ ഓൺ-സ്‌ക്രീൻ മാർക്കിങ് വിവാദവും സർക്കാരിന്റെ ജനപ്രീതി പാടേ തകർത്തതായി രാഹുൽ ചൂണ്ടിക്കാട്ടി. ലക്ഷക്കണക്കിന് വിദ്യാർത്ഥികളുടെ ഭാവിയാണ് സർക്കാർ തകർത്തത്. വിദ്യാഭ്യാസ മന്ത്രാലയത്തെ ‘ദുരന്തങ്ങളുടെ മന്ത്രാലയം’ എന്നാണ് രാഹുൽ വിശേഷിപ്പിച്ചത്. ഇത്രയും വലിയ അഴിമതികൾ നടന്നിട്ടും വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവയ്ക്കാത്തതിനെ അദ്ദേഹം ചോദ്യം ചെയ്തു.

പ്രധാനമന്ത്രി തന്റെ ‘മൻ കി ബാത്’ പരിപാടിയിൽ രാജ്യത്തെ ബാധിക്കുന്ന ഈ വലിയ വിദ്യാർത്ഥി പ്രശ്‌നങ്ങളെക്കുറിച്ച് ഒരക്ഷരം മിണ്ടാത്തത് ജനങ്ങളോടുള്ള വെല്ലുവിളിയാണെന്ന് രാഹുൽ കുറ്റപ്പെടുത്തി. ഈ യുവജന രോഷം സാമ്പത്തിക പ്രതിസന്ധിയുമായി കൂടിച്ചേരുമ്പോൾ അത് സർക്കാരിന്റെ പതനത്തിന് ആക്കം കൂട്ടും. യുവാക്കൾ തെരുവിലിറങ്ങുന്നത് ഭരണകൂടത്തിന്റെ നാശത്തിന് വഴിവെക്കും.

പുതിയ ‘അടിയന്തരാവസ്ഥ’ പ്രഖ്യാപിക്കാനുള്ള നീക്കം?

ജനങ്ങളുടെ ഭാഗത്തുനിന്നുള്ള കടുത്ത പ്രതിഷേധങ്ങളെയും സാമ്പത്തിക തകർച്ചയിൽനിന്നുള്ള ജനരോഷത്തെയും അടിച്ചമർത്താൻ മോദി സർക്കാർ ജനാധിപത്യ വിരുദ്ധമായ മാർഗങ്ങൾ തേടുമെന്ന് രാഹുൽ മുന്നറിയിപ്പ് നൽകുന്നു. ‘പൊതുജനങ്ങളിൽനിന്നുള്ള സമ്മർദം സഹിക്കാൻ കഴിയാതെ വരുമ്പോൾ, അതിനെ അടിച്ചമർത്താൻ അവർ രാജ്യത്ത് അടിയന്തരാവസ്ഥയ്ക്ക് സമാനമായ സാഹചര്യങ്ങൾ ഏർപ്പെടുത്താൻ കടുത്ത സാധ്യതയുണ്ട്. എന്നാൽ, പഴയതുപോലെ അത്ര എളുപ്പത്തിൽ കാര്യങ്ങൾ നിയന്ത്രിക്കാൻ അവർക്ക് കഴിയില്ല. കാരണം വ്യവസ്ഥിതി അവരുടെ കൈകളിൽ നിന്നും പൂർണമായും വഴുതിപ്പോയിരിക്കുന്നു,’ അദ്ദേഹം മുന്നറിയിപ്പ് നൽകി.

ഭരണഘടനാ സ്ഥാപനങ്ങളെ ദുരുപയോഗം ചെയ്ത് ജനകീയ പ്രക്ഷോഭങ്ങളെ നേരിടാനാണ് സർക്കാർ ശ്രമിക്കുന്നതെങ്കിൽ അത് രാജ്യത്ത് വലിയൊരു ആഭ്യന്തര കലാപത്തിന് സമാനമായ അന്തരീക്ഷം സൃഷ്ടിക്കുമെന്നാണ് കോൺഗ്രസ് മുന്നറിയിപ്പ് നൽകുന്നത്. ഫാസിസ്റ്റ് രീതികളിലൂടെ ജനങ്ങളെ അടിച്ചമർത്താൻ നോക്കിയാൽ അത് തിരിച്ചടിക്കുമെന്ന് രാഹുൽ ഓർമിപ്പിച്ചു.

‘ഭീതി കച്ചവടം നടത്തുന്നയാൾ’; രാഹുലിനെതിരെ ആഞ്ഞടിച്ച് ബിജെപി

രാഹുൽ ഗാന്ധിയുടെ വെളിപ്പെടുത്തലുകൾക്കെതിരെ രൂക്ഷമായ ഭാഷയിലാണ് ബിജെപി പ്രതികരിച്ചത്. രാഹുൽ ഗാന്ധി രാജ്യത്ത് ഭീതി പരത്താനും അടിസ്ഥാനരഹിതമായ ഗൂഢാലോചന സിദ്ധാന്തങ്ങൾ പ്രചരിപ്പിക്കാനുമാണ് ശ്രമിക്കുന്നതെന്ന് ബിജെപി കുറ്റപ്പെടുത്തി. കോൺഗ്രസിന്റെ ഇടുങ്ങിയ രാഷ്ട്രീയ താൽപര്യങ്ങളാണ് ഇതിന് പിന്നിലെന്നും ബിജെപി ആരോപിക്കുന്നു.

‘ഓരോ മാസങ്ങൾ ഇടവിട്ടും രാഹുൽ ഗാന്ധി പുതിയൊരു ഗൂഢാലോചന സിദ്ധാന്തം പുറത്തുവിടും. ആദ്യം ജനാധിപത്യം തകർന്നു എന്ന് പറഞ്ഞു. പിന്നെ ഭരണഘടനാ സ്ഥാപനങ്ങൾ പിടിച്ചെടുത്തു എന്ന് പറഞ്ഞു. അതിനുശേഷം തെരഞ്ഞെടുപ്പ് അട്ടിമറിച്ചു എന്ന് വാദിച്ചു. ഇപ്പോൾ പറയുന്നു രാജ്യത്തെ ചീഫ് ഇലക്ഷൻ കമ്മീഷണറും ഇന്റലിജൻസ് തലവന്മാരും ജഡ്ജിമാരും കഴിഞ്ഞ മൂന്ന് വർഷമായി അദ്ദേഹത്തിന് രഹസ്യ വിവരങ്ങൾ ചോർത്തി നൽകുകയാണെന്ന്! രാജ്യത്തെ പരമോന്നത സ്ഥാപനങ്ങളെ അപമാനിക്കുന്ന ഇത്തരം പ്രസ്താവനകൾ അദ്ദേഹത്തിന്റെ മാനസിക നിലയെയാണ് കാണിക്കുന്നത്. ഇന്ത്യയുടെ ജനാധിപത്യ പ്രക്രിയയെ ആഗോളതലത്തിൽ തരംതാഴ്ത്തിക്കാട്ടാനാണ് പ്രതിപക്ഷ നേതാവ് ശ്രമിക്കുന്നത്.’-ബിജെപി ഐടി സെൽ മേധാവി അമിത് മാളവ്യ എക്‌സ് പ്ലാറ്റ്ഫോമിൽ കുറിച്ചു.

അടിയന്തരാവസ്ഥയുടെ കറുത്ത പാരമ്പര്യം കോൺഗ്രസിന്റേതാണെന്നും മോദി സർക്കാരിന്റേതല്ലെന്നും ബിജെപി വക്താവ് ഷെഹ്സാദ് പൂനാവാല തിരിച്ചടിച്ചു. കോൺഗ്രസ് പാർട്ടിയിൽനിന്ന് നേതാക്കൾ കൂട്ടത്തോടെ രാജിവെച്ചു പോകുന്ന പശ്ചാത്തലത്തിൽ, സ്വന്തം പാർട്ടിയിലെ ആഭ്യന്തര കലാപം മറച്ചുവെക്കാനാണ് രാഹുൽ ഇത്തരം കഥകൾ കെട്ടിച്ചമയ്ക്കുന്നതെന്ന് അദ്ദേഹം പരിഹസിച്ചു. യുപിഎ ഭരണകാലത്താണ് ഇന്ത്യ വലിയ സാമ്പത്തിക പ്രതിസന്ധികൾ നേരിട്ടതെന്നും എന്നാൽ കോവിഡ്, റഷ്യ-യുക്രെയ്ൻ യുദ്ധം, ആഗോള ക്രൂഡ് ഓയിൽ പ്രതിസന്ധി എന്നിവയ്ക്കിടയിലും ഇന്ത്യൻ സമ്പദ്വ്യവസ്ഥയെ ലോകത്തെ ഏറ്റവും ശക്തമായ അവസ്ഥയിലേക്ക് ഉയർത്തിയത് നരേന്ദ്ര മോദിയാണെന്നും ബിജെപി അവകാശപ്പെട്ടു. രാഹുൽ ഗാന്ധിയുടെ പ്രവചനങ്ങൾ മുൻപും പൊളിഞ്ഞുപോയതാണെന്നും ജനം ഇത് തള്ളിക്കളയുമെന്നും ബിജെപി വക്താക്കൾ കൂട്ടിച്ചേർത്തു.