കാപ്പാ കേസ് പ്രതിയായ ബിജെപി കൗൺസിലർക്ക് 6 മാസത്തെ അവധി; മേയറുടെ കാസ്റ്റിങ് വോട്ടോടെ അപേക്ഷ പാസായി
തിരുവനന്തപുരം: കാപ്പാ കേസിൽപ്പെട്ട് നിലവിൽ വിയ്യൂർ ജയിലിൽ കഴിയുന്ന തിരുവനന്തപുരം കോർപറേഷനിലെ ബിജെപി കൗൺസിലർ ആർ. സുഗതന് ആറ് മാസത്തെ അവധി അനുവദിച്ചു. കോർപറേഷൻ കൗൺസിൽ യോഗത്തിൽ മേയറുടെ കാസ്റ്റിങ് വോട്ടോടെയാണ് അവധി അപേക്ഷ പാസായത്. മേയറുടെ വോട്ടും യുഡിഎഫ് വിമതൻ സുധീഷിന്റെ പിന്തുണയും ഉൾപ്പെടെ 51 പേർ അപേക്ഷയെ അനുകൂലിച്ചു.
അവധി അനുവദിച്ചതിനെത്തുടർന്ന് കൗൺസിൽ യോഗത്തിൽ ശക്തമായ പ്രതിപക്ഷ പ്രതിഷേധമാണ് അരങ്ങേറിയത്. എൽഡിഎഫ് കൗൺസിലർമാർ ഡയസിന് മുന്നിലെത്തി പ്രതിഷേധിച്ചു.
കൗൺസിൽ യോഗത്തിൽ പങ്കെടുക്കാൻ എസ്കോർട്ട് പരോൾ വേണമെന്ന വാഴോട്ടുകാണം വാർഡ് കൗൺസിലറായ സുഗതന്റെ ആവശ്യം മുൻപ് ആഭ്യന്തരവകുപ്പ് തള്ളിയിരുന്നു. എന്നാൽ, മുനിസിപ്പാലിറ്റി ആക്ട് അനുസരിച്ച് വോട്ടിനിട്ട് അവധി അംഗീകരിച്ചതോടെ സുഗതന്റെ കൗൺസിലർ സ്ഥാനം സുരക്ഷിതമായി തുടരും.
