‘വിദ്യാർഥികൾക്ക് മാപ്പുനൽകി ഔദാര്യം കാണിക്കേണ്ട, മോദി അവരോട് ക്ഷമ ചോദിക്കുകയാണ് വേണ്ടത്’ -രാഹുൽ ഗാന്ധി
ന്യൂഡൽഹി: വിദ്യാർഥികളുടെ ന്യായമായ ആശങ്കകളും ഭാവിയും പരിഹരിക്കുന്നതിൽ പൂർണ്ണമായും പരാജയപ്പെട്ട പ്രധാനമന്ത്രി നരേന്ദ്ര മോദിയാണ് അവരോട് ക്ഷമാപണം നടത്തേണ്ടതെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി. ഇന്ത്യയിലെ പഠിക്കുന്ന കുട്ടികൾക്ക് പ്രധാനമന്ത്രി നൽകുന്ന ഔദാര്യപൂർവ്വമായ മാപ്പിന്റെ ആവശ്യമില്ലെന്നും, പകരം സിസ്റ്റത്തിന്റെ വീഴ്ചയിൽ അദ്ദേഹം വിദ്യാർഥികളോട് ക്ഷമ ചോദിക്കുകയാണ് വേണ്ടതെന്നും രാഹുൽ വ്യക്തമാക്കി. തനിക്കെതിരെ പ്രതിഷേധിച്ച വിദ്യാർഥികൾക്ക് മാപ്പുനൽകുന്നുവെന്ന പ്രധാനമന്ത്രിയുടെ മുൻ പ്രസ്താവനയോട് പ്രതികരിക്കുകയായിരുന്നു അദ്ദേഹം.
നീറ്റ് പരീക്ഷയിലെ ക്രമക്കേടുകളും അനിശ്ചിതത്വങ്ങളും കാരണം ജീവനൊടുക്കേണ്ടി വന്ന വിദ്യാർഥികളുടെ കുടുംബാംഗങ്ങളെ മഹാബലിപുരത്തുവെച്ച് രാഹുൽ ഗാന്ധി നേരിൽകണ്ട് ആശ്വസിപ്പിച്ചു. സ്വന്തം മക്കളുടെ വേർപാടിൽ മാതാപിതാക്കൾ അനുഭവിക്കുന്ന നീറുന്ന വേദനയേക്കാൾ വലുതായി മറ്റൊന്നുമില്ലെന്നും, പൊലിഞ്ഞുപോയ ഓരോ ജീവനും അവരുടെ കുടുംബങ്ങൾക്ക് നികത്താനാകാത്ത വലിയ ആയുഷ്കാല ശൂന്യതയാണ് സമ്മാനിച്ചിരിക്കുന്നതെന്നും അദ്ദേഹം കൂട്ടിച്ചേർത്തു.
രാജ്യത്ത് തുടർച്ചയായുണ്ടാകുന്ന ചോദ്യപേപ്പർ ചോർച്ചയും അവസാന നിമിഷം പരീക്ഷകൾ റദ്ദാക്കുന്നതും വർഷങ്ങളായുള്ള അധ്വാനവും തയ്യാറെടുപ്പുകളും ഒറ്റരാത്രികൊണ്ട് തകർത്തുകളയുന്നത് തകർന്നടിഞ്ഞ വിദ്യാഭ്യാസ സമ്പ്രദായത്തെയാണ് തുറന്നുകാട്ടുന്നത്. വിദ്യാർഥികളോട് ഒട്ടും നീതി പുലർത്താത്ത ഒരു സിസ്റ്റം നിലനിൽക്കെ, അവരോട് മാത്രം സത്യസന്ധരായിരിക്കാൻ ആവശ്യപ്പെടുന്നത് അനീതിയാണെന്നും രാഹുൽ ഗാന്ധി തുറന്നടിച്ചു.
