എയിംസ്, സൗജന്യ സിലിണ്ടർ, തിരുവനന്തപുരത്തും കോഴിക്കോട്ടും മെട്രോ റെയിൽ; വമ്പൻ വാഗ്ദാനങ്ങളുമായി എൻഡിഎ പ്രകടനപത്രിക

തിരുവനന്തപുരം: വരാനിരിക്കുന്ന നിയമസഭാ തെരഞ്ഞെടുപ്പിന് മുന്നോടിയായി വമ്പൻ പ്രഖ്യാപനങ്ങളുമായി എൻഡിഎ പ്രകടനപത്രിക പുറത്തിറക്കി. തിരുവനന്തപുരത്ത് നടന്ന ചടങ്ങിൽ ബിജെപി അധ്യക്ഷൻ നിതിൻ നബീൻ ആണ് പത്രിക പ്രകാശനം ചെയ്തത്. കേരളത്തിന്റെ വികസനവും പാവപ്പെട്ടവരുടെ ക്ഷേമവും ലക്ഷ്യമിട്ടുള്ള വിപുലമായ വാഗ്ദാനങ്ങളാണ് ബിജെപി മുന്നോട്ടുവെക്കുന്നത്.

പ്രധാന വാഗ്ദാനങ്ങൾ

ക്ഷേമ പെൻഷനും കാർഡും: പാവപ്പെട്ട കുടുംബങ്ങളിലെ ഗൃഹനാഥകൾക്കും വിധവകൾക്കും 70 വയസ്സ് കഴിഞ്ഞവർക്കും പ്രതിമാസം 3,000 രൂപ ക്ഷേമ പെൻഷൻ നൽകും. കൂടാതെ, സ്ത്രീകൾക്കായി പ്രതിമാസം 2,500 രൂപ റീചാർജുള്ള ഭക്ഷ്യ ആരോഗ്യ സുരക്ഷാ കാർഡ് ലഭ്യമാക്കും.
സൗജന്യങ്ങൾ: അർഹരായ കുടുംബങ്ങൾക്ക് വർഷത്തിൽ രണ്ട് പാചകവാതക സിലിണ്ടറുകൾ (ഓണം, ക്രിസ്മസ്) സൗജന്യമായി നൽകും. ഓരോ വീടിനും പ്രതിമാസം 20,000 ലിറ്റർ കുടിവെള്ളവും സൗജന്യമാക്കും.
ആരോഗ്യവും അടിസ്ഥാന സൗകര്യവും: കേരളത്തിന്റെ ദീർഘകാല ആവശ്യമായ എയിംസ് (AIIMS) യാഥാർത്ഥ്യമാക്കും. തിരുവനന്തപുരം-കണ്ണൂർ അതിവേഗ റെയിൽ ശൃംഖല, കൊച്ചി മെട്രോ പൂർത്തീകരണം, കോഴിക്കോടും തിരുവനന്തപുരത്തും പുതിയ മെട്രോ സർവീസുകൾ എന്നിവയും പ്രധാന വാഗ്ദാനങ്ങളാണ്.
ശബരിമലയും ദേവസ്വവും: ക്ഷേത്ര ഭരണത്തിൽ ഭക്തരുടെ പങ്കാളിത്തം ഉറപ്പാക്കാൻ ദേവസ്വം ബോർഡുകൾ പുനഃസംഘടിപ്പിക്കും. ശബരിമലയിലെ സ്വർണക്കൊള്ളയിൽ സമയബന്ധിതമായ സിബിഐ അന്വേഷണം നടത്തുമെന്നും ശബരിമല അടിസ്ഥാന സൗകര്യ വികസന മിഷൻ ആരംഭിക്കുമെന്നും പത്രികയിൽ പറയുന്നു.
കാർഷികം, തൊഴിൽ: എല്ലാ വിളകൾക്കും താങ്ങുവില ഉറപ്പാക്കും. പുതിയ സംരംഭകർക്കായി ഒരു ലക്ഷം രൂപ വരെ കുറഞ്ഞ പലിശയിൽ ലോൺ നൽകുന്ന എംപ്ലോയ്‌മെന്റ് ലിങ്ക്ഡ് ഇൻസെന്റീവ് സ്കീം നടപ്പിലാക്കും.

വിഴിഞ്ഞത്തെ പ്രധാന വ്യവസായ കേന്ദ്രമായും കൊച്ചിയെ കപ്പൽ നിർമാണ തലസ്ഥാനമായും വികസിപ്പിക്കും. മുല്ലപ്പെരിയാർ വിഷയത്തിൽ തമിഴ്നാടിന്റെ ജലാവകാശവും കേരളത്തിന്റെ സുരക്ഷയും ഉറപ്പാക്കാൻ കേന്ദ്രവുമായി സഹകരിച്ച് പ്രവർത്തിക്കുമെന്നും പ്രകടനപത്രിക വ്യക്തമാക്കുന്നു.